InfoHub Logo

ءبىر ماجىلىستە ءبىرجاننىڭ «جانبوتا» ءانى شىرقالىپ ايتىلعان ەدى، ىشىندە ىبىراي مەن سۇراعان انشىلەر بار ەدى.

— اپىرىم-اي، ازنابايدىڭ پوشتابايىنا ءبىر زاۋال بولمادى ما ەكەن؟ — دەگەن سۇراۋ تۋىپ قالىپ ەدى، سوندا ىبىراي جۇلىپ العانداي — ءپالي پوشتابايعا، سول جيىندا دۇرە سوعىلىپ، ءبىر ات-شاپان تولەنىپتى، — دەدى.

— ءبىر قاريا وتىرىپ، ىبەكەڭدىكى دۇرىس، مەن دە وسىلاي ەسىتىپ ەدىم دەدى. ءبىراق، ىبىراي اڭگىمەنى ودان ءارى جالعاپ، «جانبوتا» ءانىنىڭ قالاي شىققانىن، ازناباي مەن جانبوتا اراسىندا قانداي جانجال تۋعانىن ءبىرجاننىڭ ءوز اۋزىنان ەستىگەنىن جانە ورەكەڭنەن، شىڭعىس بالاسى جاقىپتان تاعى بىرنەشە ىشىندە بولعان ادامداردان ەسىتىپ-بىلىپ، جانبوتا ءبىرجان تۋرالى اڭگىمەنى مەن ءوزىم ورەكەڭ بالاسى وماردان، تىلەمبايدىڭ وسپانىنان، باعاسىنىڭ نازارىنان، سەردالىنىڭ جامشيشىنەن ەستىگەن ەدىم، سول ەستىگەن اڭگىمەلەردىڭ ءتۇيىنى جوعارعى ىبىراي ايتقان شىندىققا سوعادى. اعاسۇلتاندىق جويىلىپ كوكشەتاۋ ۋەز بولعان زاماندا، بولىستاردىڭ، بيلەردىڭ باس قوسقان ۇلكەن جينالىسى كوكشەتاۋ قالاسىنىڭ ءدال جەلكەسىندەگى، قىلشاقتى وزەنىنىڭ بويىندا ءوتىپتى. ول جەردە ۇلىقتار تۇسەتىن قىزىل ءۇي بار ەكەن. ەلدەن كەلگەندەر كيىز ۇيلەردى، سويىس مالداردى، كوشىرىپ اكەلىپ وزەن جاعاسىنا ورناتىپ تاستاپتى. سول جيىنعا اتىعاي، كەرەيدىڭ بولىسى جانبوتا قاسىندا ءبىر توپ نوكەرى، اتاقتى ءانشى، ءبىرجان سال دا كەلىپتى. ءار بولىستىڭ مىقتىلارى وسىلاي كەلىپ وزىنە تىگىلگەن ارناۋلى ۇيگە ءتۇسىپتى. ءبىرجان قالىڭ جيىننىڭ ءبىر بولەگىن ءوزىنىن، شىرقاعان انىمەن جيىپ الىپ، بوساتپاي، باستالاتىن ءبىر بولەك ماجىلىسكە بوگەت جاساپتى. قىلدى قاراۋىلدىڭ بولىسى، ازنابايعا ماجىلىسكە جۇرتتى تۇگەل جيناپ كەلتىرۋ تاپسىرىلىپتى. ازناباي پوشتاۆويىن جۇمساپ، جۇرتتى شاقىرتسا، ءبىرجان دۋماندى قىزدىرا بەرسە كەرەك. پوشتاۆوي ەكى رەت ءسوزىن تىڭداتا الماي، بولىسقا قايتىپ بارعاندا، ازناباي اشۋلانىپ، — بۇيرىقتى نەگە ورىندامايسىڭ — دەپ، ۇيدەن بوقتاپ شىعارىپتى. — ءبىرجان دەگەن قايدان شىققان قۇداي توقتاتپايسىڭ با دەپ، پوشتاۆوي وسى بەتىمەن بارا ءبىرجاننىڭ دومبىراسىن تارتىپ الىپ، قامشىمەن ۇرامىن دەگەن جەرىنەن جۇرت ايىرىپ الىپتى. وتىرعان جۇرت پوشتاۆويدىڭ بۇل قىلىعىنا ىزالانىپ، بىرجانمەن بىرگە نامىس قىلىپ، بۇعان اتىعاي — كەرەي قوسىلا ۇران شاقىرىپتى. ۇلكەن جانجال تۋىپ كەتەدى. مىنە، وسى اشۋ-ىزانىڭ ۇستىندە ءبىرجان ءوزىنىڭ بولىسى جانبوتاعا كەلىپ وكپە نازىن، پوشتاۆويدان كورگەن قورلىعىن ايتىپتى، ول جەردە ءبىرجاننىڭ ايتقان ولەڭى كوپ دەيدى. اتامىزدىڭ جانە ىبىرايدىڭ ايتۋىنا قاراعاندا ءان ءدال سول جانجال ۇستىندە ەمەس، كەيىنىرەك شىعارىلىپ تارالسا كەرەك. ءبىرجاننىڭ جانە قالىڭ اتىعايدىڭ، قاراۋىلدىڭ بولىسىنا دەگەن مۇندايلىق اشۋلى نارازىلىعى جانبوتاعا دا وڭاي تيمەگەن. وندا ءوزىنىڭ ەلدىڭ ىڭعايىمەن ازنابايعا قارسى سالماق سالىپ، — مىنا بۇزاقى پوشتاۆويىن تيا ما، تيماسا اتىعايدىڭ قولى بوس تۇرىساتىن جەرىن ايتسىن، — دەپتى. ازناباي جاعىن قولداۋشىلار از بولىپ، جانجالدىڭ ارتى ناسىرعا شاباتىنىن سەزىپ ازناباي امالسىز بىتىمگە كەلىپتى. پوشتاۆويعا دۇرە سوقتىرىپ، ءبىر ات، ءبىر شاپان ايىپ تولەپتى. ازناباي وسى جيىندا پوشتاۆويىنىڭ بۇزاقىلىعىنان وپىق جەپ ونىڭ، ۇستىنە ارتىنان ءبىرجاننىڭ ولەڭى ەلگە تارالىپ كەتىپ، كوپكە دەيىن اتىعاي — كەرەيدىڭ ءبىر قاتار ادامدارىمەن، بىرجانمەن اراز بولىپ جۇرسە كەرەك. «جانبوتا» ءانى تۋرالى مۇنىڭ بۇرىنعى قاريالاردان ەسىتىپ ەسىمدە قالعانى وسىلار. مەن ءوزىم ىبىرايدىڭ ايتقانىنا، اتامىز وماردىڭ ايتقاندارىنا يمانداي سەنەم. سول سەنگەندىگىمنەن بۇل ايتقاندارىم تۇگەل شىندىق دەپ بىلەم.

جازىپ بەرگەن ەرجان ۇلى مولداحمەت

---