InfoHub Logo

ءبىر جولى ماقاش پراۆيتەلدىڭ ۇيىنە اداي ەلىنەن جانتۇرعان بي كەلە قالادى. ماقاش جانتۇرعانعا سالەمدەسكەندە بىلاي دەپتى:

— ءاي، جانتۇرعان، بۇل قازاقتىڭ اتادان بالانى شيرەك كەم تۋادى دەيتىنى بار. وسى نە ءسوزى؟ قازاعىم سوندا مەنى دە اكەسىنەن شيرەك كەم تۋدى دەپ ايتا ما ەكەن؟ — دەپ كۇلىپتى.

— ويباي، ماقاش-اۋ، جۇرت سەنى اكەسىنەن شيرەك ەمەس، پۇت كەم تۋدى دەپ ءجۇر عوي.

جانتۇرعاننىڭ مىنا ءسوزىن ەستىگەن ماقاش وت باسقانداي ىرشىپ تۇسەدى.

— مۇنىسى قاي مازاعى؟ مەن ونى ەكى ءتۇرلى ءپان وقىدىم. پاتشادان شەن الىپ، ەكى بىردەي وكرۋگتى ۋىسىمدا ۇستاپ وتىرمىن. مىنا جۇرت اۋزىمنان شىققان ءسوزىمدى ساناپ تىڭدايدى. ال اكەم شولتىر تىم قۇرىسا قاعازعا بارماعىن دا باسا بىلمەيتىن نادان ادام ەدى. سوندا جۇرتتىڭ مەنى اكەمنەن پۇت كەم تۋدى دەۋىنىڭ قاي كەلىسى بار؟

— سابىر ەت، ماقاش، — دەپتى سوندا جانتۇرعان بي. — اكەڭ شولتىر ءوز اكەسى بەكپەنبەت بي ولگەندە ساسىقتاۋدا سانسىز جىلقىنىڭ جالى مەن قويدىڭ جاباعاسىنا يلەپ، تامدى ءوز قولىمەن سالعان ەكەن. سەن سونى كورە تۇرىپ، اكەڭ شولتىر ولگەندە مالدىڭ قيىنا يلەپ تام سالدىرعاندا ءوزىڭ ەڭكەيمەدىڭ دە. اكەسىنەن شيرەك ەمەس، پۇت كەم تۋدى دەيتىنى سودان شىعار...

* * *

بىردە ەرتەڭگىلىك جانتۇرعان مەن بەكتۇرعان بوي سەرگىتەيىن دەپ قونعان ۇيلەرىنەن سىرتقا شىقسا، ەشقانداي قوناقاسى قامى بايقالمايدى. «مىنا ماقاش، ءبىزدى كەشەگى سويعان ءبىر توقتىسىمەن جونەلتپەك قوي، شاماسى. ءبىز بولساق، ول كەلگەندە قاراداي شابىلامىز. مۇنىسى قالاي بولعانى؟» — دەپ ويلايدى ەكەۋى. اقىرى، اقىلداسا كەلىپ، قاستارىنداعى اتقوسشىسىنا:

— ۇيگە كىر دە، ورامال جايىپ، پىشاعىڭدى شيقىلداتىپ قايراي بەر. ماقاش بىردەڭە دەسە، جاۋابىن ءوزىمىز بەرەمىز، — دەيدى.

اتقوسشى بۇلاردىڭ ايتقانىن ىستەپ، ورامال جايىپ جىبەرىپ، پىشاعىن شيقىلداتىپ تىنىم تاپپاعان سوڭ ءۇي ىشىندە ارىلى-بەرىلى قىدىرىپ جۇرگەن ماقاش:

— پىشاعىن قايراپ، مىنا يت كىمنىڭ قۇلاعىن كەسەيىن دەپ وتىر؟ — دەپ سۇراپتى.

وسىنى كۇتىپ تۇرعان جانتۇرعان ىلە-شالا:

— ماقاش-اي، سەنى مەن مەنىڭ قاسىما ءقايبىر تويعان يت ەرەدى دەپ ەڭ، ءبىر اش-تاعى، — دەپتى.

ماقاش سوزدەن جىعىلعانىن سوندا ءبىر-اق ءبىلىپتى.

---