InfoHub Logo

وسى 1924 جىلدىڭ تامىز-قىركۇيەك ايىنان باستاپ ورىنبور قالاسىندا ءتورت جۇزدەي جىگىتكە شاقتالىپ اسكەري مەكتەپ اشىلادى. مەكتەپ قازاق جىگىتتەرى ءۇشىن اشىلادى. بۇل مەكتەپتىڭ ماقساتى — قازاقتىڭ بولاشاق قىزىلاسكەرىنە باستىقتار، ۇيرەتۋشىلەر دايارلاۋ. مەكتەپتىڭ وقۋى ءۇش توپقا بولىنبەك: اتتى اسكەردىڭ عىلىمىن ءام تارتىپتەرىن ۇيرەتەتىن ءبولىم، جاياۋ اسكەردىڭ عىلىمىن ءام تارتىپتەرىن ۇيرەتەتىن ءبولىم جانە زەڭبىرەكتى اسكەردىڭ عىلىمىن ءام تارتىپتەرىن ۇيرەتەتىن ءبولىم.

بۇل مەكتەپكە قانداي وقۋلى ءام قانداي جاستى جىگىتتەردىڭ الىناتىنى تۋرالى ۋاقىتىندا گۋبەرنيا-گۋبەرنياعا ءام ۋەز-ۋەزگە قاعاز جىبەرىلمەك. جانە بۇل ءتورت ءجۇز جىگىتتىڭ ورنى قازاقستاننىڭ بارلىق ۋەزدەرىنە مولشەرلەنىپ، ءبولىنىپ جىبەرىلمەك. ءار گۋبەرنيا ءام ۋەز وزىنە تيگەن ورىندارعا ارناپ جىگىتتەرىن جىبەرۋى ءتيىس بولادى.

قازاق ەڭبەكشىلەرىنىڭ جاستارى بۇل مەكتەپكە ۋاقىتىنان قالماي الدىن الا دايارلانىپ كەلۋلەرى كەرەك.

اسكەر وقۋىنا ۇمتىلۋشى جاستار كوپ. ۋاقىتىنان كەش قالعان جىگىتتەر كىرە الماي قۇر قالادى. سول سەبەپتى الدىن الا قامدانۋ كەرەك.

بۇل مەكتەپكە ءتۇسۋ ءۇشىن ونشا كوپ وقۋدىڭ كەرەگى جوق. حات بىلەتىن ءام ازىراق ەسەپ تارتىپتەرىن بىلەتىن ادام بولسا الىنار دەپ ويلايمىز.

جانە بۇل مەكتەپكە وسى كۇنى باسقا قالالاردا اسكەري مەكتەپتەردە وقىپ جۇرگەن قازاق جىگىتتەرى الىنباق (ماسەلەن، قازان قالاسىندا اسكەري مەكتەپتەردە وقىپ جۇرگەن قازاق جىگىتتەرى الىنباق)، ءبىراق بۇل جىگىتتەر الدىن الا وزدەرىنىڭ سانىن، بىلىمدەرىن ايتىپ، قازاقستاننىڭ اسكەري كوميسسارياتىنا ءبىلدىرىپ قويۋلارى كەرەك.

ەڭبەكشىل تاپقا، كەڭەس ۇكىمەتىنە قىزىلاسكەردىڭ كەرەك ەكەنىن جۇرتتىڭ ءبارى بىلەدى. قازاقستان ۇكىمەتىنە دە قىزىلاسكەردىڭ كەرەك ەكەنىن جۇرتتىڭ، اسىرەسە جاستاردىڭ ءبىلۋى ءتيىس. بۇل تۋرالى ۇگىت-ناسيحات ايتپاي-اق جاستاردىڭ وزدەرى-اق ەكپىندى قامدانىپ، بۇل مەكتەپكە تۇسۋگە تالپىنار.

پاتشالاردىڭ زامانىندا ەزىلىپ، بۇعىپ، قورعانشاق بولىپ قالعان قازاقتىڭ قالىڭ ەڭبەكشىل تابىنىڭ جاس ازاماتى، سەنى كەڭەس ۇكىمەتى اۋەلى مايدانعا، جاڭا تۇرمىسقا شاقىرادى! سەنى كەڭەس ۇكىمەتى جالپى ادامزاتتىڭ قاتارىنا، تەڭدىكتى، باقىتتى، جاڭا تۇرمىسقا شاقىرادى!

ەرتە تالپىن، جاس ازامات!

28.03.1924 جىل

---