InfoHub Logo

ساداق - سۇق جەبەسىن وقىرمان جۇرەگىنە ءدوپ قاداعان باسىلىم. قاۋىزىن جارىپ شىققان قىزعالداقتاي وزىنشە ءارلى ەدى. جاس ورەن ءۇشىن ءنار بەرەتىن. قىزىق، ءا؟ قوس قولداپ ەمەس، اقىل وڭداپ جۋرنال جولىنىڭ بولۋى. كەلەشەك كەلىمسەككە قالام ۇستا، وقى-توقى بۇل سەندىك جۋرنال دەۋى ءسوز-اق. يگىدەن ۇيرەنىپ، يتتەن جيرەنۋدى ۇلگى قىلاتىندار ازشىلىقتى قۇرايتىن. ال تالىمگەر جانىن ۇعاتىن شىن دوس پەيىل كەمدە-كەم. ساداق سول جاعىنان وزىق.

كەزىندە بەيىمبەتتىڭ بيىگىن قۇشۋ جازباسا دا، جيەنعاليدىڭ سىن ۇستاراسىنان ءوتۋ باقىتى بۇيىرعان. ەرىككەنگە ەرمەك دەپ ەلدە جوق دۇنيەنى جازاتىندار ەسىك سىرتىن جاعالايتىن. اۆتورلار ۇشتالاتىن. كەيىننەن شىڭدالاتىن. زاڭعارعا جەتپەس بۇرىن زاپىرانعا توتەپ بەرەتىن. ەندىگى كەزەكتە ماقسات-مۇددەلەرىنە دەن قويساق. سىر اتاۋلى بەتتە مە، الدە تۇپتە مە؟ البەتتە، تەرەڭدە. عاليا مەدرەسەسىنىڭ شاكىرتتەرىن ۇلتتىق اۆتونوميا جاساۋدا جاسامپازدىق تانىتۋعا شاقىردى. ونى زەرتتەۋشىلەر تاراپىنان سوككەندەرى دە بار. الايدا، ءبىز ايىپ تاقپايمىز. ول ءۇشىن ەشكىم دە ەمەسپىز. كەڭەستىك كەزەڭنىڭ لاجسىز ارەكەتى دەپ بىلەمىز. ودان تىس ۇستازدىڭ ۇلىق بولمىسىنا بولىساتىن كەڭەستەر تە كوپتەپ جاريا ەتىلدى. ءتالىم بەرۋشى قۋاتىن تەك بالاۋسا جانعا ارناسا كەمىس. ءبۇتىل حالىققا جولداسا نۇر.

سوندا دا مىنسىزدىك ءمىنى بار تىرشىلىككە جاراسپاسا كەرەك-تى. ساداقتىڭ وسال تۇسى - يدەيالىق تۇراقسىزدىعى. كۇندەلىكتى وزگەرىستى وڭ، تەرىس دەمەي تۇگەل جاڭالىققا بالاۋى ابەستىك. كىناراتتان گورى تانىم تايازدىعىنا سايادى. ءيا، جاس «ساداق» ول ءۇشىن تىم جاس. قاجەتىن جۇمساپ، كەرەكسىزىن ىسىرارمىز. وزدىك تاڭباسى ون بەس جەبەمەن ايشىقتالعان جۋرنال!

اعىبايەۆا ارۋجان وراز قىزى

---