InfoHub Logo

(كوللەدج ءمۇعالىمىنىڭ وتىنىشىنە بايلانىستى جازىلعان).

كىتاپ – ادامنىڭ جان-دۇنيەسىنىڭ اسىل قازىناسى، رۋحاني بايلىقتىڭ ولشەمى، ادام ينتەللەكتىسىنىڭ كورىنىسى. ول – ادامزات ءۇشىن عاسىردان عاسىرلارعا جالعاسىپ قىزمەت ەتىپ كەلە جاتقان عىلىم مەن ونەردىڭ، سونىڭ ىشىندەگى ءسوز ونەرىنىڭ تۋىندىسى، عالىم ادام مەن قالامگەردىڭ جەمىسى. ءاۋ باستا سول رۋحاني ولشەم مەن ادام اقىل-ويىنىڭ اجىراماس تۇنىعىنداي بولىپ كورىنىس تاپقان كىتاپ ەندى ءوزىن وقىعان، پايدالانعان ادامعا دا قىزمەت ەتە وتىرىپ، سول جاندى دا رۋحاني تۇرعىدان بايىتادى، بىلىم-بىلىگىن ۇشتايدى، سەنىمدى سەرىگى، اجىراماس دوسىنا اينالادى.

زامانا لەگىنە تەلەديدار ىلەستى، قوعام كوشىنە عالامتور يەلىك ەتە باستادى. بۇلار ادامزات ومىرىنە كىتاپتان كەيىن كەلگەن دۇنيەلەر ەدى. ءبىراق ءبىر قىزىعى، تەلەديدار دا، عالامتور دا كىتاپتىڭ ورنىن الماستىرا الىپ كەتە العان جوق. وقىرمان سانىن كەمىتتى دەگەن ءسوز الماستىردى دەگەن ءسوز ەمەس. كىتاپ ءوزىنىڭ ءاۋ باستاعى تۇعىرىندا قالا بەرەدى. مىسالى، ادام تۇراقتى تەلەديدار قاراۋشى نەمەسە ادام بەلسەندى عالامتور قولدانۋشىسى بولىپ كەلۋى مۇمكىن، ءبىراق ونىڭ جان-دۇنيەسىندە رۋحاني تۇرعىدان كەمشىندىك بولۋى دا عاجاپ ەمەس. مۇنىڭ جالعىز عانا سەبەبى ونىڭ ناشار وقىرمان بولعاندىعىندا دا جاتۋى مۇمكىن. سەبەبى باستى رۋحاني بايلىق – كىتاپتا.

كىتاپ سونىمەن بىرگە اقپارات پەن تەحنيكا ءداۋىرى، جاڭا تەحنولوگيالاردىڭ زامانىندا دا بىردەن-بىر ءبىلىم بەرۋشى قۇرال رەتىندە قالا بەرەدى. كىتاپ عالامتوردان ۋاقىت تۇرعىسىنان العاندا ۇتىلۋى مۇمكىن، ءبىراق ادامعا دايىن اقپاراتتاردى ۇسىنۋشى ەمەس، تەرەڭ سەزىمگە، وزىندىك ويلاۋعا ۇيرەتە وتىرىپ، ءبىلىم بەرەدى. ادامدى ىزدەنىمپازدىققا جەتەلەيدى، ءوي-ورىسىن ۇشتايدى.

ال سونىمەن بىرگە كەز كەلگەن قىزمەتكەردىڭ، سونىڭ ىشىندە مەملەكەتتىك قىزمەتكەردىڭ شەشەندىك ونەرىنە دە، اۋديتوريانى وزىنە قاراتا، تارتا بىلۋىنە دە كىتاپتىڭ كومەگى وتە زور. ويتكەنى ول – ءتىل بايلىعىن قالىپتاستىرۋشى قۇرال. وسىمەن بىرگە كىتاپتىڭ تالىم-تاربيەلىك، يماني قۇندىلىقتاردى ادام بويىنا سىڭىرە الاتىنداي قاسيەتى تەلەديدار مەن ينتەرنەتتەن جوعارى تۇرماسا، كەم تۇرماق ەمەس.

دەمەك، كىتاپ – بۇگىنگى كۇن تۇرعىسىنان العاندا دا ماڭىزىن جويماعان دۇنيە. ەندەشە، قوعامنىڭ سان-سالالى ماقساتتارىنىڭ ىشىندەگى اجىراماس ءبىر ماقساتى ول – ۇنەمى جاس وقىرمان تاربيەلەپ وتىرۋ. بۇل وقۋ ورىندارى ءۇشىن دە، باسقا دا قوعامدىق ۇيىمدار ءۇشىن دە ابىرويلى ءارى ۇزدىكسىز جۇرە بەرەتىن مىندەت بولماق.

---