InfoHub Logo

قازاقستاننىڭ جاس گەولوگتار كومانداسى فرانسياداعى نيسسا قالاسىندا وتكەن IESO- 2017 جەر تۋرالى عىلىمداردىڭ حالىقارالىق وليمپياداسىنا قاتىستى، دەپ حابارلايدى ق ر يدم سايتى.

جەر تۋرالى عىلىمداردىڭ حالىقارالىق وليمپياداسى (IESO - International Earth Science Olympiad) - گەولوگيا، مەتەورولوگيا، گەوفيزيكا، مۇحيتتانۋ جانە استرونوميا پاندەرىنەن ورتا مەكتەپ وقۋشىلارى اراسىندا وتكىزىلەتىن جىل سايىنعى جارىس.

وسى جىلى وعان 130-دان استام ءجاسوسپىرىم استى.

وسكەمەن قالاسى ومفيمل (وبلىستىق ماتەماتيكا، فيزيكا، ينفورماتيكا سالاسىنداعى دارىندى بالالارعا ارنالعان مامانداندىرىلعان مەكتەپ-ليسەي - رەد.) 11-سىنىبىنىڭ وقۋشىسى گلەب سميرنوۆ جەكە ەسەپتە قولا جەڭىمپاز اتاندى. وعان جۇلدە ەكى جازباشا تەست پەن 4 پراكتيكالىق تەستىنىڭ جيىنتىق بالى بويىنشا بەرىلدى.

استانا قالاسىنداعى نازاربايەۆ زياتكەرلىك مەكتەبىنىڭ 10-سىنىپ وقۋشىسى ارۋجان قالىموۆا جانە 12-سىنىپ وقۋشىسى ءمولدىر شىڭعىس ESP (Earth Science Project) جەر تۋرالى عىلىمدار جوباسى بويىنشا كوماندالىق جارىستا كۇمىس جۇلدەنى يەلەندى.  

Earth Science Project (جەر تۋرالى عىلىمدار بويىنشا جوبا) - بۇل حالىقارالىق كوماندالىق جارىس. بۇل جارىس قورشاعان ورتانى قورعاۋ، جاھاندىق جىلىنۋ پروبلەماسى، باسقا پلانەتالاردى كولونيالاۋ پروبلەمالارى ءتارىزدى ماڭىزدى تاقىرىپتار بويىنشا جۇرگىزىلدى. جارىستى جاپونيا، اقش، اۋستراليا ۋنيۆەرسيتەتتەرىنىڭ اتاقتى پروفەسسورلارىنان قۇرالعان حالىقارالىق قازىلار القاسى باعالادى.

ۇلتتىق كيىممەن بيلەگەن وقۋشىلارىمىز كورەرمەندەرگە جاقسى اسەر سىيلادى. وليمپيادا قاتىسۋشىلارى مەن قوناقتارىنا ءبىزدىڭ قوناقجاي ەلىمىز تۋرالى بەينەروليك كورسەتىلدى.

قازاقستان كومانداسىنىڭ بارلىق قاتىسۋشىلارى استانا ق. «جاس گەولوگ» ۇيىرمەسىنىڭ جانە وسكەمەن ق. ۇيىرمەسىنىڭ مۇشەلەرى. قازاقستاندىق كوماندانىڭ بارلىق شىعىندارىن (كوماندالىق جارنانى، فورمانى جانە جول ءجۇرۋدى قوسا العاندا) اكادەميك ش.ەسەنوۆ اتىنداعى ءعىلىمي-بىلىم بەرۋ قورى كوتەردى.

---