كوكتەم ساۋلەتى
قاتال قىستىڭ قۇشاعىنا ەنگەن تابيعات قىس بويى ءبىر باياۋ اعىنمەن مارعاۋ قيمىلدايتىن ءتارىزدى. اندا-ساندا سوققان بوران، ساقىلداعان اياز سامارقاۋ قىسقى دالا تىرشىلىگىنە ءبىر مەزگىل عانا شيراقتى، قاتاڭ مىنەز بەرىپ، قاتتى اشۋمەن اۋناقشىتىپ الادى دا، كەنەت توقتاي قالادى. بۇدان كەيىن دالا ءوزىنىڭ قالىپتى باياۋ سارىنىنا تۇسەدى. سىرەسكەن كوك قۇزدار استىندا تەڭىزدەر مەن داريالار دا جۋاس، ءبىر قالىپپەن جىلجيدى. دامىلسىز سىبدىراعان اعاش بۇتاقتارى دا وزدەرىنىڭ شولپىلارىن جوعالتقانداي قوزعالادى. ساي-سالادا تەڭكيگەن اپپاق قىرلار. قاھارلى قىس دۇنيەگە ءوز ءتارتىبىن ورناتقانداي.
قاتال قىستىڭ بۇل تارتىبىنەن تىس ءومىر، قالا مەن كولحوزدى اۋىلدا. ادام ءوز ءومىرىنىڭ قوزعالىس ءۇنىن ءارقاشان دا بۇزعان ەمەس. قالا مەن كولحوزدا ەڭبەك سارىنى ۇزدىكسىز جالعاسىپ، تۇتاسقان ءبىر اۋەندە العا باسا بەرەدى، ادام ءوز كەلبەتىنىڭ ءسانى بولعان ەڭبەك تۇتقاسىنان ءبىر دە ءبىر ايىرىلمايدى.
مىنە، كوكتەم كەلدى. سامارقاۋ دالا ومىرىنە بىردەن ءارى كوتەرىڭكى، ءارى شاپشاڭ قيمىل پايدا بولدى. ساي-سالادا تەڭكيە سىرەسكەن قارلار گۇرىلدەگەن سۋ تاسقىنىنا اينالدى، دالا شۋعا تولدى، كوكتەم ءوز كۇيىن تارتىپ، ءوز سارىنىنا باستى، تەك قانا دالا تىرشىلىگىنە ەمەس، تىنىمسىز سوققان ءومىر جۇرەگىنە دە، ەڭبەك دابىلىنا دا كوكتەم ايى تاعى دا ءبىر ەكپىن، تاعى دا ءبىر شىراي اكەلگەندەي... قالا مەن دالانىڭ ءون بويىندا ءبىر تۇتاس ەڭبەك مارشى وسىناۋ كوكتەم ايىندا ءوزىنىڭ ءبىر بەلەسىنە شىعىپ، ۇلان-بايتاق كەڭ دالاعا جايىلعانداي. الا قىستاي قار جامىلىپ، قيمىلسىز جاتقان دالا ومىرىنە كوكتەم كىردى، سول كوكتەممەن بىرگە ەڭبەك دابىلى قاعىلدى، دالا تىرشىلىگىنىڭ قىزىق شاعى باستالدى.
ەڭبەك دابىلى! ءبىزدىڭ ەلدە ءسوزدىڭ ماعىناسى قانداي زور. ءاربىر سوۆەت ادامى بۇل ءسوزدى ءوز قيمىلىنىڭ ءۇنى، ءوز ءىسىنىڭ ءونىمى دەپ بىلەدى. انىعىندا دا ەڭبەك دابىلى دەگەنىمىز ميلليوندار ەڭبەگىنىڭ ۇندەس شىققان ىرعاعى، ەكپىندى قوزعالىسىنىڭ جاڭعىرىعى ەمەس پە! ءسويتىپ، وتانىمىزعا كوكتەم كەلدى، ءبىزدىڭ ەل جىلداعىداي كوكتەم قۇشاعىنا ەنىپ، كوكتەم كۇيىنە باستى.
ءبىزدىڭ وتاندا ءاربىر ءۇيدىڭ، ءاربىر ادامنىڭ باقىتى مەن بولاشاعىن دامىلسىز ويلاعان سوۆەتتىك وتانىمىزدا ءار كوكتەم كەلەر جىلدىڭ مول بايلىعىنىڭ قاينار كوزى ءتارىزدى. كوكتەم ايلارى كولحوزدى اۋىل ومىرىنە جىلما-جىل تاڭعاجايىپ كورىك بەرەدى، قىستاي مارعاۋ ءومىر سۇرگەن دالا كەلبەتى كوكتەم شاعىندا بىردەن وزگەرە قالدى. كوك مۇزدار استىنداعى تەڭىزدەر بۇزىلىپ، داريالار جۋاس تا، باياۋ قالپىن تەز وزگەرتەدى. كوك قۇزداردىڭ تاس-تالقانى شىعىپ، وزەن-داريالار بۇرقان-تارقان بولادى. كەسەك-كەسەك سەڭدەر بىر-بىرىنە سوعىلادى، سۋ ءوز ەرنەۋىنەن اسىپ، دالاعا تارتادى...
مىنە، ورمان مەن توعايلار كوك جاپىراققا مالىنىپ، ادەمى ءبىر حوش يىسپەن سىبدىر قاعادى. توعاي ءىشى قۇستار داۋىسىنا تولى. سانسىز قۇستار شىرقاعان سان الۋان ءان اۋەزىن كوكتەم وركەسترى دەسە دە بولعانداي. قۇلاق سالىپ قاراڭىزشى! نەشە ءتۇرلى ءۇن، نەشە الۋان كۇي كەلەدى قۇلاققا. ءبىر جەردە تورعاي شىرىلداسا، ءبىر جەردە قاز قاڭقىلدايدى، بۇلارعا الدەقايدان شىققان اققۋ داۋىسى مەن قۇدىرەتتى ەڭبەك ءانى قۇيىلىپ، تراكتورلاردىڭ سانسىز گۇرىلى قوسىلادى، ءسويتىپ نەشە ءتۇرلى ءان، نەشە ءتۇرلى كۇيمەن دۇنيەنى مىڭ قۇبىلتىپ كوكتەم كەلەدى.
دالا! كوكتەم دالاسى. وسى ءبىر شاقتى سوزبەن ايتىپ جەتكىزۋ قيىن. دالا قۇشاعىندا تۋىپ، دالا قۇشاعىندا وتكەن ءبىزدىڭ قازاقتار دالا تابيعاتىن شەكسىز سۇيەدى، دالا جۇرەگىنىڭ سوعۋىن اۋرۋدىڭ تامىرىن ۇستاعان دارىگەر تۇسىنەدى. «تۇگىن تارتساڭ مايى شىعىپ تۇر ەكەن...» «مىنا جەردەن مالدىڭ قۇلاعى شىعىپ تۇر ەكەن!...» — دەسىپ جەر ساۋىرىنا ءبىلىمپاز عالىمدارشا ءارى باعالاي، ءارى سۇقتانا قارايدى.
وسىناۋ جاتقان ۇشى مەن قيىرى جوق دالا، ءبىر كەزدە قازاق ەلىنە ءارى ازىق، ءارى پانا بولىپ ەدى، ول زاماندا قازاقتار دالانىڭ كەڭ بولعانىن، قونىستاپ وتىرار ەلدىڭ ءوز دالاسىندا از بولعانىن تىلەۋشى ەدى، ويتكەنى ءارى مالىما جايىلىم كوپ بولسا، ءارى وزدەرى ءقاۋىپتى جاۋلارىنان قاشىپ كەڭ دالانى پانالايتىن. بۇگىن مۇندا بولسا، ەرتەڭ اندا بولىپ، ءىز تاستاپ، سوڭىنا تۇسكەن قاۋىپ-قاتەردەن تەز بۇلتارىپ وتىراتىن... ول اۋىر كۇندەر الدەقاشان تاس-تالقان بولدى. وكتيابرمەن بىرگە قازاق ەلىنە باقىت تاڭى اتتى، قورقىنىش پەن قاۋىپتەن سول ءبىر ەسكى پاتشالىق دۇنيەمەن بىرگە كەتتى. ەلىمىز وتىرىقشى، مادەنيەتتى، كولحوزدى ەلگە اينالدى. قازاقتار ەندى ءوزىنىڭ ۇلان-بايتاق ولكەسىنە قاراپ تۇرىپ، ات تۇياعى مەن اڭدار جورتۋىلىنان باسقانى كورمەگەن ادەمى، اسەم قۇنارلى كەڭ دالاعا ەل ءجيى قونىپ، ادەمى قالالار سالىنسا، ءوز قازىناسىن باۋىرىنا تىعىپ سىرەسىپ جاتقان تىڭدار ەگىن جايعا اينالسا ەكەن دەپ تىلەيتىن بولدى، دالا كوركى ادام عوي.
مىنە، قازاق ەلىنىڭ بۇل ويى دا، بۇل ارمانى دا ورىندالدى. عاسىرلار بويى ۇيقىدا جاتقان قازاق دالاسىنا ءومىر پايدا بولدى، مىڭداعان سوۆەت ادامى دالا جۇزىنە ەڭبەكپەن كورىك بەرىپ، تىرشىلىك قۇدىرەتىنىڭ سۇلۋ تۇلعاسىنا اينالدىرادى. «مەن وسىلارعا قاراپ تۇرىپ ەرتەڭگى تاماشا بولاشاقتىڭ ايبىندى دا سىمباتتى كەلبەتىن كورگەندەيمىن»، — دەيدى كولحوز شابانى تاڭكىباي قارت.
مەن ونىڭ جۇزىنە سۇيسىنە، قۇمارتا قارايمىن. ونىڭ كوزىندە ادەمى ءبىر وتتار ۇشقىنى بايقالادى، ەسكى اۋىلدىڭ ەسكى شالى ەمەس، جاڭا ويلى، بايىپتى سوۆەت ادامى.
ءبىزدىڭ كوكتەم ءبىرتۇرلى كورىكتى عوي! ويلاپ قاراڭىزشى، وتان سوعىسىنان كەيىن ءوز شارۋاشىلىعىن كوتەرۋ ىسىنە جۇمىلعان ءبىزدىڭ بەيبىت ەلىمىز قانداي تابىستارعا جەتپەدى! بۇلىنگەنىن جوندەپ، اسقان ۇيىمشىلدىقپەن، ۇلى جىگەرمەن ادام ايتقىسىز ىلگەرى باستى. سوسياليزم قۇرىپ، كوممۋنيزمگە قاراي بەتتەدى، تالاي تاماشا تابىستار كوكتەمىن وتكىزدى. سونىڭ ءبارىن دە ءوزىنىڭ قامقور اناسىنداي سوۆەت حالىقتارىن لەنيندىك پارتيامىز باستاپ وتىردى. ارداقتى پارتيا! سەنىڭ باستاۋىڭمەن دۇنيەگە كەلگەن ءومىر ءارقاشان دا ءوزىڭنىڭ باستاۋىڭمەن ىلگەرى باسا بەرمەك. سەن پروگرەسشىل ادام بالاسىنىڭ قامقورىسىڭ، سەنىڭ بار ويىڭ، بار ءىسىڭ ەڭبەكشى ادام بالاسىنىڭ باقىتى مەن بوستاندىعىنا ارنالعان. سوندىقتان ءبىزدىڭ ەلدە ءبىر ادامنىڭ جىگەر-كۇشى شارۋاشىلىقتى جىل ساناپ نىعايتۋعا، ەل سالتاناتىن، ءومىر كوركىن تۇرلەندىرە بەرۋگە جۇمسالا بەرمەك.
زاۆودتا ىستەيتىن جۇمىسشى ءوز ستانوگىندا تۇرىپ سوۆەتتىك وتانىن ءارى كۇشتى، ءارى باي بولۋىن تىلەيدى. سونىڭ ءۇشىن ءوز نورماسىن ەكى ەسە، ودان ءارى ورىندايدى. تەك نورماسىن ورىنداعانىنا ءماز بولىپ قاراپ وتىرمايدى، ءوز ستانوگىنىڭ ءار تەتىگىنە وي جىبەرەدى، تاعى دا ءبىر جاڭالىق اشسام ەكەن، ستانوك ءوز جۇمىسىن بۇدان دا شاپشاڭ، ءمىنسىز اتقاراتىن بولسا ەكەن دەيدى. وسى جولدا تالاي ۇيقىسىز تۇندەر وتكىزەدى، اقىرى جاڭا ستانوك ويلاپ تابادى، ونىمەن توقتامايدى، تاعى ويلايدى، تاعى ىزدەنەدى...
كولحوزداعى ساۋىنشى ايەل اتام زاماننان بەرى الىنىپ كەلە جاتقان سيىر ءسۇتىنىڭ ازدىعىنا قىنجىلادى، سويتەدى دە ساۋىن سيىرىنىڭ جەلىنىنە ۇڭىلەدى، عاسىرلار بويى ازاماتقا دوس، موماقان سيىر ءوز ءسۇتىن الدەقايدا جاسىرىپ تۇرعانداي كۇدىكپەن قارايدى. سويتەدى دە ويعا شومادى، ءتۇن ۇيقىسىن ءتورت ءبولىپ، سيىردان ءسۇتتى كوپ الۋدىڭ امالىن ىزدەيدى. امال تابىلدى. سيىر ءسۇتتى بۇرىنعىدان دا ەكى-ۇش ەسە كوبەيتەدى، ءبىراق ساۋىنشى ايەل تاعات قىلمايدى، سيىر ءسۇتىن تاعى دا كوبەيتسەم ەكەن دەيدى، تاعى ىزدەنەدى، تاعى دا ويعا كەتەدى...
كولحوزدار مەن سوۆحوزدارداعى تراكتورشىلار جىل سايىن كوكتەمدە ەگىس دالاسىنا شىعادى، جىل سايىن تراكتور جۇرىسىنە جاڭا ەكپىن بەرىپ، جاڭا ويلارمەن ىسكە جۇمىلادى، بىلتىرعى جەتكەن نىساناسىنا قاناعاتتانباي، جاڭا ءبىر جۇمىس بەلەسىن ىزدەيدى، جاڭا نورما تابۋعا كۇش سالادى. سويتەدى دە تراكتوردىڭ جەر جىرتۋ مۇمكىندىگىنىڭ جاڭا، عاجايىپ ءتۇرىن كورسەتەدى. وسىلايشا ەگىس دالاسىندا سوسياليستىك جارىس قىزىپ، ءىس ىلگەرى باسا بەرەدى، تراكتوريستتەر ءبىرىن-بىرى قۋىپ جەتىپ، باسىپ وزا بەرەدى، وزاتتاردىڭ جۇمىس نورماسىن. ورىنداۋى ادام ايتقىسىز جوعارى شىعادى، ءبىراق جارىس توقتامايدى.
وسى ءبىر عاجايىپ ىنتا مەن تالاپ ءاربىر سوۆەت ادامىنىڭ تال بويىنا قانىنداي ءسىڭىپ كەتكەن ادەتى ءتارىزدى. ادەت ادامنىڭ ەكىنشى قاسيەتى»،— دەيدى ءبىر دانىشپان، مىنە سوۆەت ادامدارىنىڭ قاسيەتى وسىنداي. وسى ۇلى قاسيەتكە سارقىلماس كۇش، جىگەر بەرەتىن تەتىك — ءار ادامنىڭ بويىنداعى وتانىنا، لەنيندىك ۇلى پارتياعا دەگەن شەكسىز ماحابباتى، ءاربىر سوۆەت ادامىنىڭ وتانىم ءارى اسقان باي، ءارى اسقان قۋاتتى بولسا ەكەن ادال تىلەگى. سوندىقتان ءبىزدىڭ ەلدە ور ادام حالىق بايلىعىنا ءوز قوسارى ءارى مول، قۇنارلى بولۋىن تىلەيدى.
ءاربىر ەڭبەك ادامى ەلىن سۇيگەن، پارتيانى سۇيگەن جۇرەگىمەن وتاننىڭ بايلىعىنا ۇزدىكسىز ۇلەس قوسادى. ءاربىر جاڭا كەلگەن كوكتەم ايى تىنىمسىز ىستەلىپ جاتقان ىسىمىزگە، تىنىمسىز كوبەيىپ جاتقان بايلىعىمىزعا تاعى دا ءبىر زور قارقىن بەرىپ، تاعى دا ءبىر زور ۇلەس قوسادى.
وتكەن جىلعى كوكتەم قازاقستان ءۇشىن، قازاقستان ءۇشىن دەيمىن-اۋ، ءتىپتى بۇكىل وتانىمىز ءۇشىن ۇلكەن ماڭىزى بار كوكتەم بولدى. تىڭ جانە تىڭايعان جەرلەرگە ۇلى شابۋىلدى ءبىزدىڭ سۇيىكتى پارتيا سول وتكەن جىلدىڭ كوكتەمىنەن باستادى. وسى ءبىر اسقان ۇلى ءىستىڭ ورىندالۋىندا قازاقستانعا ەرەكشە ورىن ءتيدى. ءبىزدىڭ كولحوزدار مەن سوۆحوزدار جەرى ۇشى-قيىرى جوق جالپاق دالادا ەمەس نە! ونىڭ ۇستىنە عاسىرلار بويى ەش پايداعا اسىرىلماي جاتقان جەرلەردە ەسەپ بار ما! و شەتى مەن بۇ شەتىنە اتپەن التى اي جۇرەسىن دەسە وتىرىك بولماس. تاعى اڭداردان باسقا ەشبىر ءتىرى جاندىك باسپاعان سول جەرلەرگە ادام نازارى ءبىرىنشى رەت اۋدارىلىپ، ادام قولى ءبىرىنشى رەت ءتيدى. قۇنارلى جەر ءوز يەسىمەن ماڭگى تابىسىپ، ءوز بويىنداعى ءنارىن ادام يگىلىگىنە ارنادى. ۇلى ءىس ۇلى ەلدە عانا باستالماق. ويعا العان ۇلى جورىقتى ويداعىداي ورىنداپ شىعۋ ءۇشىن كەرەكتى قۇرال-جابدىقتارىنا ساي، تىلەكتەس دوستارىڭ كوپ بولعانى ءجون عوي. ونسىز ءىس تىندىرۋ قيىن. تىڭعا جاسالعان شابۋىل دا ۇلى ءىستىڭ باسى ەدى. ءدال سول ءىس باستالار بىلتىرعى كوكتەم سىن كوكتەمى بولاتىن. مىنە، سول ىسكە اتتانار شاقتا ۇلى سوۆەت ەلىنىڭ مىزعىماس ۇلى بىرلىگى، شايقالماس ۇلى دوستىعى، ەشكىم قارسى تۇرا الماس ۇلى كۇشى ءبىزدىڭ قازاق ساحاراسىندا ءتۇيىسىپ، جۇپ جازباي تاعى ءبىر سىن وتكەلىنەن وتكەندەي بولدى، مۇنى ەستىگەن جاۋ جۇرەگى اۋىردى، دوس جۇرەگى ءلۇپىل قاعىپ قۋاندى.
دوستىق دەگەنگە، حالىقتار دوستىعى دەگەنگە نە جەتسىن! جۇرەگىمىزدىڭ تىنىسىنداي بولعان موسكۆادان، قادىرلەس، تۋىسقان كييەۆ، مينسكىدەن تراكتورشى، كومباينشى دوستار لەك-لەگىمەن قاپتادى. ءوزىنىڭ تۋىسقانى قازاق ەلىن شىن جۇرەكتەرىمەن سۇيە كەلدى. قازاق دالاسىنىڭ گۇلدەنۋىنە، ىسىمەن، ونەرىمەن كومەكتەسە كەلدى. ءبىز دە مەيماندوس قازاق جۇرەگىمەن قارسى الدىق، سۇيسىنە سۇيە قارادىق. باۋىرلار كەلىسىمەن ءىس بۇرقىراپ قايناپ كەتتى، ەن دالاعا 93 جاڭا سوۆحوز قۇرىلدى، قالالار سالىندى، قۇبا جوندارعا ايقىش-ۇيقىش جولدار ءتۇستى. بايتاق دالاعا سوقا ءتىلى سۇنگىدى. بىر-بىرىمەن قاباتتاسا شىققان تراكتور داۋسى دالانى ۇيقىسىنان وياتىپ، جان بىتىرگەندەي بولدى، تامىلجىعان كوكتەم نۇرىمەن ادەمى حوش ءيىستى دالا قۇشاعىنا بولەنگەن مىڭداعان ەڭبەك ەرلەرى شاتتانا ءان شىرقادى، ورىس ءانىنىڭ قايراتتى، سۇلۋ اۋەزىنە ۋكراين، بەلورۋس، قازاق اندەرى قوسىلا كوتەرىلگەندە، دالا سوۆەت حالىقتارىنىڭ ۇلى دوستىق مەرەكەسىنە بولەنگەندەي، تاڭعاجايىپ سۇلۋلىقپەن تەربەتىلدى. ءسويتىپ قازاقستان ءوز ۇلەسىنە تيگەن 6.300 مىڭ گەكتار تىڭ جانە تىڭايعان جەرگە ەگىن ەگۋ جوسپارىن ەكى ميلليون گەكتاردان ارتىق اسىرا ورىندادى.
بۇل كوكتەم وتانىمىزدىڭ استىق قورىن ارتتىرۋدا ۇلكەن ۇلەس قوسقان كوكتەم بولدى. كولحوز بەن سوۆحوزداردىڭ تابىستارى ادام ايتقىسىز ءوستى، جەكە كولحوزشىلار مەن سوۆحوز جۇمىسشىلارىنىڭ تۇرمىستارى بۇرىنعىدان بىرنەشە مارتەبە كوتەرىلدى. جەكە كولحوزشىلار توپ-توبىمەن جەكە مەنشىگىنە جەڭىل ماشينا الا باستادى. وتكەن جىلدىڭ كوكتەمى ناتيجەسىندە پاۆلودار وبلىسىنداعى كولحوزشىلاردىڭ 84، اقمولا وبلىسىنداعى كولحوزداردىڭ 74 پروسەنتى ميلليونەر دارەجەسىنە جەتتى، رەسپۋبليكاداعى كولحوزداردىڭ اقشاداي تابىسى 1953 جىلمەن سالىستىرعاندا بىلتىر ەكى ەسەدەن استام ءوستى. پارتيا دانالىعى، سوۆەت حالىقتارىنىڭ دوستىق كومەگى ءبىزدىڭ رەسپۋبليكادا تىڭ جەرلەردى يگەرۋدىڭ العاشقى جىلىندا وسىنداي وراسان بايلىققا جەتكىزدى.
بيىلعى كوكتەم دە مولشىلىق كوكتەمى، وتكەن جىلعى تابىستارىمىزدى ىلگەرى باستىرۋ، تاعى ءبىر ۇلى بەلەسكە جەتكىزۋ كوكتەمى. قۇنارى مول قازاقستان دالاسىندا بيىل جاڭادان 250 استىق سوۆحوزى قۇرىلىپ، تاعى جاڭا، ادەمى، باي قالالار ورنايدى. ەرجۇرەك، باۋىرمال اعامىز ورىس، تۋىسقان دوستارىمىز ۋكراين، بەلورۋستار تاعى دا وزدەرىنىڭ تاڭداۋلى ۇل، قىزدارىن ءبىزدىڭ ەلگە كومەككە جىبەرەدى، تاعى دا ۇلى ەڭبەك دابىلى قاعىلىپ، تاعى دا ادەمى اندەر شىرقالادى. وسىناۋ ءبىر ءومىر بيىكتەرىنە قاراي شىرقاپ بارا جاتقان ەڭبەك دابىلى، قازاقستان دالاسىندا كۇشتى دە ەڭبەك ەكپىنى تالاي-تالاي مادەنيەتتى، ادەمى قالالار ورناتىپ جاتىر، وسى ەكپىن ءالى تالاي فابريكالار مەن زاۆودتار دا سالماق. وسىلايشا جىلما-جىل ءورىس تارتقان قارقىندى ەڭبەك بىرەر جىل ىشىندە كولحوزدى اۋىلدىڭ بەينەسىن مۇلدە وزگەرتىپ جىبەرۋى، كىشكەنە سەلەندەر ورنىنا كوپتەگەن ءۇيلى قالالار، ءبىر قاتارلى الاسا ۇيلەر ورنىنا ەكى-ۇش قاتارلى ءمۇسىندى، بيىك ۇيلەر سالىنۋى ءسوزسىز.
وتكەن جىل ەل ارالاپ ءجۇرىپ مەن كولحوزدىڭ گۇلدەر ەككەن باقشاسىنا دۋشار بولدىم. ىشىنە كىرسەم، ادام كورىنبەيدى. سانسىز بوياۋلارمەن قارسى الدىمدا مىڭ قۇبىلعان گۇلدەر، مەنىڭ ىنتىعىمدى كۇشەيتە ءتۇستى. مەن باقشانى كەزە بەردىم. نەتكەن تاماشا! قاز-قاتار جامىراي وسكەن ءتۇرلى ءتۇستى گۇلدەر اقىرىن عانا سوققان جەلمەن جاي عانا تەربەلەدى، گۇل ۇستەرىن تاعى دا ءبىر تەڭبىل بوياۋلارمەن اشەكەيلەيىنشى دەگەندەي، سانسىز كوبەلەكتەر گۇل شاشاعىنا جابىسا قالادى، نەمەسە اق شۇبار، سارى، تەڭبىل قارا بولىپ گۇل ۇستىنەن جارىسا ۇشادى. وسى ءبىر كەرەمەت، ادەمى كورىنىستەن سەن كوزىڭدى المايسىڭ. ونىڭ ۇستىنە اقىرىن سوققان جەلى ءبىر ادەمى حوش ءيىستى بەتىڭە ءالسىن-الى جەلپىپ تۇرعانداي. جان-جاعىڭنىڭ ءبارى جاس، ءبارى ادەمى.
مەن كەۋدە كەرە دەم الدىم دا، قارسى الدىمدا تۇرعان ءبىر ادەمى گۇلدى جۇلىپ الايىن دەپ ۇمتىلا بەردىم.
— تيمەڭىز!
جالت قاراسام باقشا يەسى...
كوكتەم جايىنداعى وي مەنىڭ ەسىمە سول ءبىر تاماشا سۇلۋ گۇل باقشاسىن ءتۇسىردى. ويلاپ تۇرساڭ، ءبىزدىڭ وتان دا ءدال ءبىر گۇل باقشاسىنداي كۇن ساناپ گۇلدەپ، عاجايىپ ادەمى كورىكتەرگە بولەنە بەرەدى، ءاربىر ەڭبەك ادامى ءوزىنىن، قاجىماس قايراتىمەن وتان كوركىنە ورنەك بەرىپ، اشەكەيگە تولتىرا بەرەدى. ءاربىر ەڭبەك كۇنى ۇلى وتاننىڭ ءسانى مەن سالتاناتىن بۇرىنعىدان دا اسىرا بەرەدى. ءبىزدىڭ وتان كۇن ساناپ گۇلدەپ ەسە بەرەدى. وسى ءبىر كوكتەم كوركى دە وتان كوركىنە، وتان ساۋلەتىنە ۇقسايدى.
You Might Also Like
-
قازاقتىڭ مەملەكەتتىك اكادەميالىق دراما تەاترى كەشە جاس دراماتۋرگ ءا. ابىشيەۆ جولداستىڭ «وتان ءۇشىن» اتتى جاڭا تەمادا جازىلعان پەساسىن قويدى.
-
«ارمان» دەگەن ۇعىم وسى كەزدە وتە وزگەرىپ، وتە كەڭەيىپ كەتكەن ءتارىزدى. مەنىڭ جاس كەزىمدە قىزىلاعاش باۋىرىن قىستاپ، قاراش وزەنىن بويلاي كوشەتىن ءبىزدىڭ اۋىلدا ارمان يەلەرى كوپ بولۋشى ەدى.
