مەنىڭ رەسپۋبليكام
رەسپۋبليكام! جار سۇيەر، انا سۇيەر جۇرەگىممەن سەنى قىزعانا، ەلجىرەي، قۋانا سۇيەمىن، سەن مەنىڭ قان تامىرىما، سوعار جۇرەگىمە، كەڭ، تىنىسىما ۇقسايسىڭ، سەن ەتە قىمباتسىڭ! مەنىڭ اتا-بابام «رەسپۋبليكا!» دەگەندى كورگەن جوق. «رەسپۋبليكا!» دەگەن ءسوزدى ەستىگەن جوق.
بۇگىن جارقىراعان شام جارىعىندا، رەسپۋبليكا تۋى استىندا وتىرىپ سوناۋ وتكەن اتالار تاعدىرىنا كوز جىبەرەمىن، ويعا كەتەمىن. مەنىڭ ويىم تەك قانا قيالعا نەگىزدەلگەن بۇدىرسىز، دەرەكسىز ويلار ەمەس، اۋىر دا قاتال شىندىقتان تۋعان ءومىر قورىتىندىلارى. مەن سول قورىتىندىلاردى جيناقتاۋشىمىن، بار فاكتىلەردىڭ، باسىن قوسىپ ءبىر جۇيەلى وي، اقىل تىزبەگىنە ءتۇسىرۋشىمىن. سوندىقتان مەنىڭ ءسوزىم كەيدە مۇڭدى، كەيدە اششى، كەيدە وتكىر پايزاعا ۇقساس. مەنىڭ ايتارىم — تاريح، مەنىڭ ءتىلىم — شىندىق.
ەۆروپانىڭ بىرنەشە مەملەكەتى ەركىن سىيىپ كەتەتىن ۇلان-بايتاق كەڭ دالانى جايىلعان قازاق ەلى «رەسپۋبليكا دەگەندى كورمەگەنى قالاي، بۇل نە عاجاپ دەر ماعان بۇگىنگى ۇرپاق. بۇل زاڭدى سۇراۋ، ورىندى تاڭدانۋ. بۇعان مەنىڭ ايتار جاۋابىم دايار. سەن پاتشا بيلەگەن روسسيانى، فەودالدار بيلەگەن قازاق ەلىن كورگەن جوقسىڭ، سەن باقىتتىسىڭ. اتالار باسىنا ويناعان قىلىش پەن اتالار جونىن تىلگەن ورمەلى قامشى، انالار كوزىنەن تامعان قاندى جاس سەندەر ءۇشىن وتە الىستا، ەرتەگى ءتارىزدى.
جوق بۇل ەرتەگى ەمەس، مەنىڭ كوزىم كورگەن، مەنىڭ حالقىم باسىنان ەتكىزگەن كەشەگى كۇن، كەشەگى ءومىر.
قازاق حالقىنىڭ بۇدان قىرىق جىل بۇرىنعى تاعدىرىنا كوز جىبەرشى، سەنىڭ الدىڭدا مۇڭدى كۇيلەر، قايعىلى حالدار تىزبەگى تۇرادى، سەن ىزالى، كەكتى حالىقتى كورەسىڭ، ونىڭ اۋىر حالى، ناداندىق، قۇلدىق، قايىرشىلىق ءومىرى كور ىشىندەگى ءتىرى ارۋاقتاي ەلەس بەرەدى. سەنىڭ جۇرەگىڭدە ءارى اياۋشىلىق سەزىمى تۋىپ، ءارى الدەكىمگە قارسى كەك تۇتانادى. جاس ۇرپاق، سەن پاتشا بيلەگەن زاماندى، كاپيتاليزم مەن فەوداليزم تۇسىنداعى پراۆوسىز قۇلدىق ءداۋىرىن كىتاپتاردان عانا وقيسىڭ، ال بىزدەر ول ءومىردىڭ، قاتال سوققىسىن ءوز باسىمىزدان كەشىردىك. ءبىزدىڭ ارقا، جومىمىزدى باي مەن بەكتەردىڭ قامشىسىنان تۇسكەن تاڭبا جولى ءالى جوعالعان جوق. ءبىر جاعىنان پاتشا ىزعارى، ءبىر جاعىنان بولىس پەن بي، باي مەن مىرزالار تەگەۋىرىنى قىر ارقاسىن ايازداي سورىپ، جىرتقىش اڭداي تىرناق ۋىسىندا قىسقان قازاق ەلى، قازاق حالقى بۇدان قىرىق جىل بۇرىن ەرىكسىز دە رەسپۋبليكاسىز، مەكتەپسىز، وقۋسىز، قىر كەزىپ دالا جايىلعان مۇڭدىلار، شەرلىلەر مەكەنى بولاتىن. قازاق حالقىنىڭ ءومىرى قاۋىپتە، بولاشاعى بۇلدىر، تۇمان ەدى.
حالىق ولمەس ءومىر يەسى ەمەس پە، ونىڭ تۋىپ، ءوسىپ جاتقان قۇبىلىس كۇيىن كىم توقتاتار! حالىق وشپەس - قايرات، سارقىلماس كۇش، تەرەڭ اقىل مەن پاراساتتىڭ بەسىگى ەمەس پە، ونىڭ شالقار ويىنا، ۇشقىر قيالىنا كىم تيۋ سالار!
ساۋاتسىز، مەكتەپسىز ەل ءوز ىشتەرىنەن ءبىرجان سال، اقان سەرىلەرىن، قۇرمانعازى، ەستاي، جاياۋ مۇسالارىن تۋىنداتىپ، ادەبيەت، مۋزىكا مادەنيەتىنىڭ تاماشا، ولمەستىك قورلارىن جاسادى، ۇلى اباي ارقىلى جازبا ادەبيەتكە سارا جول تارتتى. «قوبىلاندى باتىر»، «قوزى كورپەش — بايانداي» ەتكەن ءامىرىنىڭ عاجايىپ جىرلارىن ساقتاي ءبىلدى، ءوزىنىڭ حالىقتىق سيپاتىن ەتە ساق قورعاپ، تازا ساقتادى، ەندىگى بارار بەتىن، جۇرەر جولىن باعدارلاپ وتىردى، ءوز ىشىنەن ۇنەمى جول باسشىداي — جارىق جۇلدىزىن بەلگىلەپ، جۇرەك سىرىن، اقىل-وي تىلەگىن سولارعا تاپسىردى، سولار ارقىلى سىرتقا شىعارىپ وتىردى. ون توعىزىنشى عاسىردا «مەتەورداي شىعىس كوگىندە زىرلاپ ەتكەن» شوقان ءۋاليحانوۆ، قازاق ەلىنە مادەنيەت ۇرىعىن العاش شاشقان ىبىراي التىنسارين، ۇلى اقىن اباي قازاق حالقىنىڭ بەل بالاسى، قازاق جۇرەگىنىڭ ىستىق لەبى، قازاق ويىنىڭ، قازاق ارمانىنىڭ ءمولدىر تامشىلارى ەدى. «قايدا بارام، كىممەن دوس بولامىن، قايدا قۇلاش سەرمەپ، قايدا ۇمتىلام؟» — دەگەن سۇراۋلارعا جاۋاپتى سول زاماندا-اق قازاقتىڭ ەڭبەكشى حالقى ءوزىنىڭ دانىشپان ۇلدارى شوقان، ىبىراي، اباي ويلارىمەن قورىتقان جوق پا! ورىس حالقىمەن دوستىق تىلەپ، ورىس مادەنيەتىنە قول سوزعان سول ءبىر ۇلى پەرزەنتتەرى ءوز حالقىنىڭ وي، تىلەگىن، جۇرەك سەزىمىن باياندامادى دەپ كىم ايتار!
اباي اۋدارعان «ەۆگەنيي ونەگين» جىرلارىن دومبىرا سازىمەن قۇبىلتقان. اقان سەرى ارقىلى ولەڭ-جىرلارىندا ورىس ءتىلىن كىرگىزە ءان شىرقاعان قازاق جۇرەگى سوناۋ ءبىر كونە زاماننىڭ وزىندە-اق ورىس ءتىلىن، ورىس جىرىن جاتسىنباي دوس قۇشاعىنا قىسقانى انىق.
ادام قانىندا بىر-بىرىنە قاستىق جوق، «ۇلتتار ارازدىعى» دەگەن تەورياسىماق بۋرجۋازيا يدەولوگتارىنىڭ ويلاپ شىعارعان ساندىراعى. مەن بالا كۇنىمدە قاراقۇرىم ۇيلەر ماڭىنا جينالعان قازاقتاردىڭ دومبىرامەن «پودگورنىيدى» ويناعانىن، ورىس شارۋالارىنىڭ دا قازاق ءانىن سالعانىن تالاي ەستىدىم، قازاق شارۋالارى مەن ورىس، ۋكراين كرەستياندارىنىڭ تامىر بولۋى ول كەزدە ءجيى كەزدەسەتىن ۇيرەنشىكتى ادەت ەدى، تامىق وتىمەن قورقىتار دىنگە اكىمشىلىك، بايلىق كۇشىمەن وكتەمدىك ەتكەن فەودالداردىڭ تەرىس پيعىلدارىنا قاراماستان اۋىل مەن قالادا دوستىق شىراعىنىڭ العاشقى بىلتەلەرى تۇتانىپ، دوستىق جۇرەگىنىڭ العاشقى سىرلارى سول كەزدە-اق ءبىر ارناعا قۇيىلىپ جاتتى. بۇل سەزىم، بۇل كۇي ءوزىنىڭ تۋار شاعىندا ماريام جاگور قىزىنداي قاراپايىم ورىس قىزىنىڭ عاشىق بولعان قازاق جىگىتىن — سۇيىكتى دۋدارىن كوپتەن كورە الماي ساعىنۋ زارىن توگىلدىرىپ، ونىڭ سۇيگەنىمەن قوسىلارىنا الدەكىمنىڭ بوگەت بولعالى تۇرعانىن باياندادى. ماريا جۇرەگىنىڭ اۋىر قايعىلى تىنىسىنداي ەل قۇلارىنا تيگەن ورىس قىزىنىڭ ءانى پاتشالى روسسيانىڭ تۇسىندا-اق بارلىق، قازاق ەلىنە ورتاق، وتە ءقادىرلى اندەرىنىڭ ءبىرى بولدى. قازاقستاننىڭ قاي تۇكپىرىنە بارساڭ دا، قاي اۋىلدا ويىن، تويدا بولساڭ دا «ماريام جاگور قىزىن» ايتشى دەپ تىلەمەيتىن جيىن، وسى ءبىر سۇلۋ ءاندى قۇيقىلجىتا شىرقامايتىن ءانشى بار ما ەدى؟
اۋىلعا بار دا كەمپىر مەن شالداردان سۇراپ قارا! ماريا جىرى، ماريا تاعدىرى ءار قازاقتىڭ ءوز قىزىنىڭ ارمان كۇيى، ءوز قىزىنىڭ كوكىرەگىن جارىپ شىققان مۇڭدى سازى، اسىل جىرى سەكىلدى ەمەي نەمەنە!
جوق، ادامدار، حالىقتار اراسىندا انادان تۋا، ءوز قانىنا ءسىڭىپ، ءوز بويىنا قاسيەت بولا بىتكەن قاستىق، وشپەندىلىك «ۇرىعى» جوق، ونى كاپيتاليزم، فەوداليزم سەبەدى، ولار ءۇشىن ۇلتتار اراسىنداعى دوستىق، جولداستىق ىزگىلىك ءتارىزدى ءقادىرلى، قىمبات قاسيەتتەر كەرەكسىز ءتىپتى زياندى.
تاعدىر مەن تۇرمىس ۇقساستىعى ادامداردى دوس، جولداس ەتپەي قويعان ەمەس. از عانا سالعان ەگىنىمەن كۇن كەرىگى وتىرعان ورىس پەن ۋكراين كرەستياندارى قازاق كەدەيلەرىمەن دوس بولىپ، مۇڭداس بولىپ كەتۋى دە باستارىنا تۇسكەن تۇرمىس اۋىرلىعىنىڭ پاتشانىڭ قاتال زاڭىنان تارتقان ازاپ كۇندەرىنىڭ زاردابىنان، قايعى مەن قاسىرەت ارماندارىنىڭ ۇيلەستىگىنەن بولار.
مىنە، وكتيابر ريەۆوليۋسياسىنا دەيىنگى قازاق ەلىنىڭ حالى وسىنداي بولاتىن. وتانى بار، رەسپۋبليكاسى جوق، وتتى سەزىم، ۇلى جۇرەگى، تەرەڭ اقىل. بايسالدى، پاراساتتى، دانىشپان ۇلدارى بار، مادەنيەتى جوق، كورەر كوزى، ەستىر قۇلاعى بار، ساۋاتى جوق، قىرىق قۇراۋ بولىستار مەن بيلەر جايلاعان، اۋرۋ مەن اشتىق جايلاعان «دالا پەرزەنتى» دەگەن قارعىس تاڭباسى بار ەل سەنىڭ ەلىڭ قازاق ەلى ەدى. ول بۇدان قىرىق جىل عانا ۋاقىت بۇرىن ەدى.
مىنە، بۇگىن سەن، جاس ۇرپاق، قازاق حالقىنىڭ ۇل مەن قىزدارى، سوۆەتتىك سوسياليستىك قازاق رەسپۋبليكاسىنىڭ باقىتتى ازاماتىسىڭ. سەنىڭ ەلىڭ جاپپاي ساۋاتتى. سەنىڭ الدىڭدا ونەر مەن عىلىم ەسىگى اشىق. ەندى لەنيندىك ۇلت ساياساتىنىڭ كۇن شۋاعىندا سەن يە بولماعان ماماندىق جوق.
كەشە وكتيابر ريەۆوليۋسياسىنان بۇرىن مەشەۋ ەل، بۇگىن بايلىعى تاڭ قالعانداي: كولحوزدار مەن سوۆحوزدار قالاسى، قالا باس سايىن مەكتەپ، ءۇي باسى راديوقابىلداعىش.
ماي شام، سىقسيما شام دەگەندەر ەندى تۇگەلىمەن كەلمەسكە كەتكەن. اۋىل باسى ەلەكتر شامى جارقىرايدى، «كەدەي» دەگەن قىرسىق ءسوز قالىپ، «كولحوزشى» دەگەن سىپايى ءسوز بەن بىرگە بايلىق كىرگەن اۋىل ومىرىنە. ءجۇرشى مەنىمەن بىرگە ەكەۋمىز اۋىل كەزىپ، كولحوز ارالايىق! سەن مەن ايتقان شىندىقتارمەن بىرگە اۋىل ومىرىنەن «ات ءمىنۋ» دەگەن ءسوز قالىپ، «ماشينا ايداۋ» سالت بولعانىن كورەسىڭ!
ەل ارالاپ بولعانسىن استاناعا كەلەيىك. الماتى قالاسى، نە دەگەن سۇلۋ، نە دەگەن اسەم! بۇل بۇكىل سوۆەتتىك وتانىمىزداعى ەڭ كورىكتى، ەڭ تاماشا قالانىڭ ءبىرى، مۇنداي قالا وتە سيرەك. الماتى — سوۆەتتىك قازاقستاننىڭ استاناسى. انە، كارل ماركس كوشەسىن بويلاي باس ارىققا تاياۋ ءبىر كەلبەتتى، بيىك ءۇي تۇر، بۇل: عىلىم ورداسى — قازاق اكادەمياسى. بۇدان قىرىق جىل بۇرىن قازاق تىلىندە «اكادەميا» دەگەن ءسوز جوق ەدى. بۇگىن عىلىم تۋىن اسپانعا كوتەرىپ، اكادەميانىڭ ءوزى تۇر استانادا. الماتىنى جوعارى مەكتەپتەر قالاسى دەسەدى، بۇل قالادا كيروۆ اتىنداعى ۋنيۆەرسيتەت، پەداگوگتىك ايەلدەر ينستيتۋتى، اۋىلشارۋاشىلىق ينستيتۋتى مەن پوليتەحنيكالىق ينستيتۋتى تاعى وسىلار قاتارلى تولىپ جاتقان ' جوعارى وقۋ ورىندارى، مەكتەپتەر بار.
الماتى سونىمەن بىرگە بۇكىل وتانىمىزعا ءمالىم اتاقتى اكادەميك قانىش ساتبايەۆ سەكىلدى ونداعان عالىمداردى، مۇحتار اۋەزوۆ، ءسابيت مۇقانوۆ ءتارىزدى توپتاعان اقىن، جازۋشىلارى بار ونەر، عىلىم ساڭلاقتارىنىڭ مەكەنى.
وسىنىڭ ءبارى تەك قانا قىرىق جىل ىشىندە پايدا بولدى. بۇل ەرتەگى مە؟ اڭىز با؟ جوق، ەرتەگى دە، اڭىز دا ەمەس، بۇل شىندىق. بۇل ءبىزدىڭ ءومىردىڭ، سوۆەتتىك قۇرىلىستىڭ شىندىعى.
بۇل شىندىق كاپيتاليزمنىڭ باسىنا سىيمايدى، ونىڭ ومىرىنە، ونىڭ قاعيداسىنا جات، ونىڭ بويىنا قازاق سياقتى ارتتا قالعان نادان ەلدى گۇلدەندىرۋ، مادەنيەت ساتىسىنا، عىلىم شىڭىنا كوتەرۋ جاراسپايدى، كەلىسىمسىز، لايىقسىز، ول ءبىز سەكىلدى ەلدى ءوزىنىڭ جان ازىعى، ءوز قالتاسى، ءوز مۇراتىنىڭ باسپالداعى دەپ تۇسىنەدى. ونەر، بىلىمنەن ارتتا قالعان مەشەۋ ەلدەردىڭ ادام ايتقىسىز عاجايىپ تابىستارعا جەتۋى، بارلىق سالادا تولىقسىپ ەر جەتۋى تەك قانا كوممۋنيستىك پارتيا باستاعان ءبىزدىڭ سۇيىكتى سوۆەت ەلىندەي ەلدەردە عانا بولماق.
سوسياليزم بۇگىن بار قازاقتىڭ ءۇي تىرشىلىگىنە كىردى، كوزى كورىپ، قولى ۇستاعانداي تىم جاقىن، تىم ىستىق، تىم قىمبات اسىلىنا، قيماسىنا اينالدى. سوناۋ الىس جونداعى مال وتارىنا بارىپ قارت شوپانمەن كەڭەس قۇرشى، ول ءوز بولاشاعىن جان-تانىمەن بەرىلە سۇيەر قىمبات نارەستەسىندەي قۋانا، قىزعانا باياندايدى، ونىڭ الدى داڭعىل جول ءتارىزدى تۇر، باياعى وتكەن ومىرىندەي قاراڭعى بۇلدىر، ءقاۋىپتى ەمەس. ول ەرتەڭگى كۇنى تۋرالى ۋايىم تارتپايدى، نەمەن، قالاي كۇن كورەمىن دەگەن قورقىنىش، ۇرەيلەر بۇل كۇندە ومىردەن مۇلدە جوق بولعان. مىنە، سوندىقتان دا ول ەرتەڭگى كۇنگە، كوممۋنيزم شىندىعىنا ءوز جۇرەگىنە جاقىن، ءوز دەنەسىنە جىلى، ءوز كوزىنە قىمبات دوسىنداي قارايدى، جات ادامنان، بۇزىق ويلى دۇشپانىنان قىزعانا قورعايدى، ساق تۇرادى، سەرگەك جۇرەدى!
مۇمكىن، الدەكىم مەنىڭ بۇل سوزىمە شەك كەلتىرەر، سەنە قويماس، دالەل ىزدەر، ىزدەي بەرسىن. الىسقا بارۋدىڭ قاجەتى قانشا! كەشەگى وتان سوعىسىن الا قويايىقشى، ۇلى ورىس حالقى باستاعان سوۆەت وداعىنىڭ بارلىق حالىقتارىمەن بىرگە سول كۇندەرى قازاق جاۋىنگەرلەرى دە ادام تاڭ قالاتىن ەرلىك كورسەتتى. ونىڭ ۇستىنە قازاق ەلىنىڭ ەكى قىزى ءولىم ۇستىندە سوۆەت وداعىنىڭ باتىرى اتاعىن الدى، بۇلار بۇكىل سوۆەتتىك شىعىستىڭ ماقتانى بولعان ءبىرىنشى قىزدار، ءبىرىنشى باتىرلار ەدى.
سوۆەت وداعىنىڭ باتىرلارى — پۋلەمەتشى مانشۇك مامەتوۆا مەن مەرگەن ءاليا مولداعۇلوۆا. ول ەكەۋىنىڭ اسقان ەرلىكپەن فاشيست باسقىنشىلارىن قىرعىنعا باتىرىپ، وزدەرى قازا تابۋى قازاق ەلىنىڭ سوسياليستىك وتانىن جانىمەن، بارلىق وتكىر سەزىمى، ۇلى جۇرەگىمەن، اقىل، ويىمەن سۇيەتىندىگىنىڭ ايعاعى ەمەي، ەرجۇرەك ەلدىگىنىڭ ايعاعى ەمەي نەمەنە!
ەگەر، امەريكا ما، انگليا ما، الدەقانداي يمپەرياليستىك ەلدەن باس بۇزار بىرەۋلەر سوعىس شىعارسا، سوسياليزم ەلىنە — سوۆەت ەلىنە وق اتسا، ءبىزدىڭ ۇلى دەرجاۆانىڭ قارۋلى كۇشىنە سوقتىعىپ، سوۆەت حالىقتارىنىڭ گرانيتتەي بىرلىگىنە سوقتىعىپ وزدەرى تالقان بولادى، كوممۋنيزم تۋىنىڭ ماڭگى جاسارىنا بوگەت بولار بۇل ومىردە ەشبىر كۇش جوق ەكەنى كۇمانسىز.
جاس ۇرپاق! سەن اتوم عاسىرىندا، عىلىم مەن تەحنيكا عاسىرىندا ءومىر سۇرەسىڭ! سەن كوسموستى جەڭگەن، تەك قانا ايعا ادام قوندىرۋ پروبلەماسى قالعان كەزدە، سول كوسموس كورابلدەرىن ءبىرىنشى ۇشىرعان، دۇنيە جۇزىندە تەڭدەسى جوق سسسر توپىراعىندا تۋىپ، سوندا ءوستىڭ. سەن كاپيتاليزم ادامدى ادام قۇلدانۋ، ادامنىڭ ەڭبەگىن جەۋ دەگەندى بىلمەيسىڭ، سەندەر ءۇشىن بۇل سوزدەر ءارى جۇمباق، ءارى ماعىناسىز. سەنىڭ ەسىگىڭدى رۇقساتسىز ەشكىم اشپايدى، سەنىڭ مۇلكىڭدى ەشكىم تالامايدى، سەنى ءوز پايداسى ءۇشىن، ءوز باسىنىڭ بايۋى ءۇشىن ەشكىم ەرىكسىز تاياقپەن جۇمسامايدى، سەن ءوز ەركىڭە ءوزىڭ قوجاسىن، سوۆەتتەر وداعى دەگەن ەڭ ابزال، ەڭ قۇدىرەتتى، ەڭ قىزىقتى ۇلى دەرجاۆانىڭ ەرىكتى ازاماتىسىڭ. سەنەن باقىتتى، سەنەن ارمانسىز جان جوق!
قىرىق جىل ىشىندە قازاقستان سيپاتى مۇلدە وزگەردى، كەشەگى قازاقتى بۇگىن سوۆحوزدار مەن زاۆودتاردا، قالانىڭ ءبىلىم وردالارىندا، تراكتور مەن كومبايننىڭ شتۋرۆالىندا، سامولەتتىڭ ۇشقىشتار وتىراتىن كابيناسىندا كورەسىڭ. اناۋ قاراعاندى كومىر كەنى، بالقاش، جەزقازعان، تەمىرتاۋ، قازاق ماگنيتكاسى، سارىباي-سوكولوۆ تۇستەس ءىرى الىپتار قازاقستان كەلبەتىنىڭ، قازاقستان بولاشاعىنىڭ كوركەم، كەلىستى سيپاتتامالارى عوي. تىڭ جەرلەردى يگەرۋ قازاقستان ءۇشىن، بۇكىل وتانىمىز ءۇشىن ۇلى ماڭىزى بار وقيعا بولدى، پارتيامىز ۇران تاستاعان وسى يگىلىكتى ىسكە بارلىق سوۆەت حالقى جۇمىلا اتتاندى، سولاردىڭ ورتاسىندا ءوز دوستارىمەن قۇشاقتاسا جىرلاپ، قازاق قىزدارى مەن قازاق جىگىتتەرى الشاڭ باسادى. قازاقستان بۇگىن شىن ماعىناسىنداعى سان ۇلتتاردىڭ ەڭبەكتە باس قوسقان ولكەسى، تۋىسقاندىق، دوستىق رەسپۋبليكاسى.
ادام ايتقىسىز تابىستار، سان جەتكىسىز بايلىقتار، ۇلى قۇرىلىستار بۇكىل سوۆەت ادامدارىنىڭ بەيبىتشىلىك ءۇشىن كۇرەسىنىڭ، ءوز وتانىن كۇننەن كۇنگە گۇلدەندىرۋ، وراسان بايلىققا بولەۋ جولىنداعى تىنىمسىز ەڭبەگىنىڭ ناتيجەسى.
بەيبىتشىلىك ءۇشىن، تاتۋلىق، دوستىقپەن قاتار ءومىر ءسۇرۋ ءۇشىن كۇرەس سوۆەت ەلىنىڭ، بۇكىل سوۆەت حالىقتارىنىڭ تىلەگى. وسى ءبىر تاماشا تىلەكتى ماڭگى جاساتۋ، بەيبىت ءومىردى بۇكىل دۇنيە جۇزىندە باياندى ەتۋ جولىندا ۇكىمەتىمىز بەن پارتيامىز تاۋسىلماس جىگەرمەن كۇرەس جۇرگىزىپ، وراسان زور ەڭبەك ءسىڭىرىپ كەلەدى. سوعىس ءورتىن تۇتاندىرماق بولىپ جۇرگەن يمپەرياليزم سۇمىرايلارىنىڭ قارا نيەتى ىسكە اسپاۋى ءسوزسىز، دۇنيە جۇزىندە بەيبىتشىلىك جەڭەرى ءسوزسىز.
سوۆەت حالقى ءوزىنىڭ سۇيىكتى پارتياسىنىڭ، ونىڭ ورتالىق كوميتەتىنىڭ باسشىلىعىمەن بۇدان بىلاي دا تابىستاردان تابىستارعا جەتپەك، ۇلى كوممۋنيزم قۇرىلىسىنىڭ بيىك شىڭىنا قاراي بۇرىن ادام كورمەگەن الىپ ادىمدارمەن اتتاي بەرمەك.
قىرىق جىل بويىندا قامقور اناداي ءوزىنىڭ ىستىق جۇرەگىمەن سۇيگەن، بارلىق تابىستار مەن جەڭىستەرگە باستاپ كەلە جاتقان لەنيندىك ۇلى پارتيا، ساعان، سەنىڭ ورتالىق كوميتەتىڭە قازاقستان ەڭبەككەرلەرىنىڭ، ايرىقشا قازاق حالقىنىڭ بۇگىن ايتار ۇشان-تەڭىز، العىسى بار، ءسوز قۋاتىمەن جەتكىزە الماس جۇرەك سەزىمى تولى سۇيىسپەندىك، ماحابباتى بار.
باستاي بەر ءبىزدى، ۇلى پارتيا، جاساي بەر ماڭگى، مەنىڭ سوۆەتتىك وتانىم، مەنىڭ سوسياليستىك قازاقستانىم!
You Might Also Like
-
تۋعان جەرىمىزدى مەكەندەگەن ءاربىر تۋىسقان حالىقتار تۋرالى ويلاعاندا، كەيدە ءبىر ءىرى كەزەڭدەر دە، ءوز باسىڭنان وتكەن شاقتارىڭ دا ەسكە تۇسە قالادى. سول ءبىر جايدا، سەنىڭ باسىڭا قيىندىق تۇسكەن تار كەزەڭدە...
-
قارت ورالدىڭ كۇنگەيىنەن شىعىستاعى سوناۋ قۇلىندى دالاسىنا، قىزىلجاردىڭ تەرىستىگىندەگى قايىڭ جالدارىنان قاراعاندىنىڭ كومىرلى وڭىرلەرىنە دەيىن جالپاق دۇنيەنى جايلاپ جاتقان تىڭ ولكەسى. باتىسىنان شىعىسى...
