InfoHub Logo

وبلىستىق عىلىمي جوبا جارىسىنان جۇلدەلى ورىن العان وقۋشىنىڭ عىلىمي جوبا جۇمىسى استانا قالاسىنداعى ىرىكتەۋ كەزەڭىنە جولداناتىندىعى، سول جۇمىستىڭ كومپيۋتەردە تەرىلۋى كەرەكتىگى جايلى حابار كەلگەندە، بۇلار كومپيۋتەردىڭ جوقتىعىنا بايلانىستى داعدارىپ قالدى. سەبەبى اۋىلدا كومپيۋتەر جوق ەدى. اۋداننىڭ ورتالىعىنان دا كومپيۋتەر تابا قويۋ قيىن بولاتىن. ەندى كومپيۋتەر ىزدەپ وبلىس ورتالىعىنا بارۋى كەرەك ەدى.

عىلىمي جوبا وبلىستىق جارىسقا كومپيۋتەرگە باسىلماعان كۇيى قاتىسقان بولاتىن. جارىستىڭ اتى وبلىستىق عىلىمي جوبالار جارىسى دەپ اتالعانىمەن، جارىس ول كەزدە وبلىس ورتالىعىنداعى قالا مەكتەپتەرىنىڭ اراسىندا وتەتىن. سەبەبى بۇل كەزدە وبلىستىڭ باسقا اۋداندارى عىلىمي جوبا جۇمىسىنا ءالى اتسالىسا قويماعان ەدى. تەك بۇلاردىڭ اۋدانى عانا ەكىنشى جىل اتسالىسىپ وتىر. ال ول كەزدە وبلىستا عىلىمي جوبامەن ەڭ مىقتى اينالىسىپ وتىرعان مەكتەپ سول كەزدەگى وبلىستىق گيمنازيا ەدى.

ەندى سول وبلىستان جۇلدە العان جۇمىستاردى استانا قالاسىنداعى رەسپۋبليكالىق "دارىن" عىلىمي-پراكتيكالىق ورتالىعىنىڭ ماماندارى ىرىكتەۋدەن وتكىزەدى ەكەن. استاناداعى ماماندار تاراپىنان ماقۇلدانسا، رەسپۋبليكالىق عىلىمي جوبا جارىسىنا قورعاۋعا جىبەرەدى، ال ماقۇلدانباسا...

وبلىسقا كەلگەن سوڭ ءبىلىم دەپارتامەنتىنە سوقتى. دەپارتامەنت مامانى بۇعان: "وبلىستان ءار پاننەن جۇلدەگە ىلىككەن بارلىق عىلىمي جوبا جۇمىستارىن استانا قالاسىنا تاڭەرتەڭ پويىزبەن الىپ جۇرەمىن"، - دەدى. سونان سوڭ ءۇيىنىڭ، پاتەرىنىڭ ءنومىرىن قاعازعا جازىپ بەرىپ: "ءتۇن دەمە. مەزگىلسىز ۋاقىت دەمە. جۇمىس قاي كەزدە كومپيۋتەرگە تەرىلىپ بىتەدى، ۇيىمە اكەلىپ بەرە بەر"، - دەگەن ەدى.

جۇمىس قاس قارايعاندا بارىپ كومپيۋتەرگە تەرىلىپ ءبىتتى. بۇل كەزدە قالا جارقىراتىپ شامدارىن جاققان بولاتىن. دەپارتامەنت قىزمەتكەرىنىڭ ۇيىنە جۇمىستى اكەپ تاپسىردى.

وسى جۇمىس ءار پاننەن اۋداندىق عىلىمي جوبالار جارىسى ءوتىپ جاتقان ساتتە سەيفتە جاتقان ەدى. ەندى ول وبلىستان ءوتىپ، استانا قالاسىنا بارا جاتىر. سونان سوڭ  دا وسى "حالىق اقىنى باينازار وتەپوۆ شىعارماشىلىعىنداعى ەل تاعدىرى جانە اقىن ولەڭدەرىنىڭ كوركەمدىك ءمانى" اتتى عىلىمي جوبا جۇمىسىنىڭ استاناداعى ىرىكتەۋ كەزەڭىنەن دە وتكەندىگى، رەسپۋبليكالىق عىلىمي جوبالار جارىسىنا قورعاۋعا جىبەرىلگەندىگى، رەسپۋبليكالىق عىلىمي جوبالار جارىسىنىڭ قاي كۇنى، قاي قالادا وتەتىندىگى، شاكىرتتىڭ سوندا جۇمىسىن كەلىپ قورعاۋى كەرەكتىگى جايىنداعى حابار كەلدى. بۇل استاناداعى "دارىن" عىلىمي-پراكتيكالىق ورتالىعى ۇيىمداستىرىپ وتىرعان رەسپۋبليكالىق III ۇلتتىق عىلىمي جوبا جارىسى بولاتىن.

ەندى اقانجان اعايعا بارىپ قايتقىسى كەلدى. بۇل تاقىرىپپەن جۇمىس ىستەگەن ادام اقانجان اعايعا وسى جۇمىستى قولعا العان ساتتە-اق بارىپ قايتسا، قۇبا-قۇپ بولاتىن. ويتكەنى وسى تاقىرىپ جايلى بىردەن-بىر بىردەڭە ايتا الاتىن ادامنىڭ ءبىرى اقانجان اعاي ەدى. ءبىراق بۇلار قولدا بار دەرەكتەرمەن عانا جۇمىس ىستەدى. ول دەرەكتەردىڭ نەگىزگى كوزى بۇرىنعى جەرگىلىكتى گازەت پاراقتارىندا جاريالانعان اقىننىڭ ولەڭدەرى ەدى. بۇلاردا كەڭەس بەرەتىن ادام نەمەسە عىلىمي اتاعى بار جەتەكشىسى جوق بولدى.

ەندى قورعاۋعا جىبەرىلگەن جوباعا الىپ-قوسارلارى جوق ەدى. ءبىراق اقانجان اعايدىڭ باتاسىن الىپ، الدىنان ءوتۋ - ماڭىزدى.

اقانجان اعاي وبلىس ورتالىعىندا تۇراتىن. ءوزى ول كىسىنى بۇرىن كورگەن ەمەس.

بۇل كەلگەندە اقانجان اعاي ازداپ سىرقاتتانىڭقىراپ وتىر ەكەن. قىس ايى ەدى. "نە جازدىڭدار؟ وقىشى"، - دەدى اقانجان اعاي. بۇل وقي باستاعاننان، اقانجان اعاي سەرپىلدى دە قالدى: "ءوي، دۇرىس قوي جوباسى! وسىلاي بولۋ كەرەك قوي!"

اقانجان اعاي مۇنى سونان سوڭ داستارقان باسىنا ەرتىپ كەلدى. ءوزىنىڭ كىشكەنە عانا ماگنيتوفونى بار ەكەن. سونى قوستى. "باينازار اقىننىڭ ءسوزى. تىڭدا"، - دەدى. رەسپۋبليكاعا بەلگىلى تەرمەشى ايەل ورىندايدى ەكەن. ماگنيتوفون سويلەدى:

لايقات تۋىمدى ەردىڭ تۇلعاسىنا،
كوك تيىن ويلاماسا ءبىر باسىنا.
جۇرەگى ادال ەردىڭ ەل دەپ سوعار،
ساتپايدى ار-نامىسىن پايداسىنا.
بىرەۋلەر سىرتتان وسەك ءسوز سويلەيدى،
كەمىتىپ ەردىڭ ءپاسىن بولماشىعا.
ايىبى ارقالاعان قاپ بولسا دا،
بىرەۋدىڭ كۇلەر كورىپ دورباسىنا.
ايتاتىن مۇندايلارعا ءسوزىم مىناۋ،
تۇزەتسىن ءوزىن قاراپ ايناسىنا.
پەندەنىڭ ويلاعانى بولا بەرسە،
شىققىسى كىمنىڭ كەلمەس شىڭ باسىنا.
دەگەنى ادامزاتتىڭ بولا بەرمەس،
كەي كەزدە كەلمەيدى ءىسى ىڭعاسىنا...

باينازار اقىن وسىدان كەيىن جەرگىلىكتى وڭىردە وتكەن بەلگىلى ادامداردىڭ ءىسى مەن ولاردىڭ دا پەندە ەكەنىن ايتا كەلىپ:

وسىلار زامانىندا كەم تۋماعان،
جارايتىن ادامدار ەدى قولباسىعا.
كەتەتىن ءبىر قالىپتا پەندە بولمايدى،
ب ا ق، شىركىن، تۇراعى جوق، اۋماسۋدا.
نەتەمىز پەندەلىكپەن بوسقا نالىپ،
تاعدىرعا جازىلعان ءىس بولماسىن با؟
اۋ، شورا، قاعاز بەنەن قالامدى بەر،
شەكتىنىڭ باينازارداي جورعاسىنا، - دەيدى.

رەسپۋبليكالىق عىلىمي جوبالار جارىسىنان كەلە جاتىپ، اقانجان اعايعا تاعى دا سوقتى. اقانجان اعاي شاكىرتتىڭ II ورىن الىپ كەلە جاتقانىن ەستىگەندە قاتتى قۋانىپ وتىردى.

اۋىل مەكتەبى جاڭا عاسىردىڭ العاشقى جىلىن وسىلاي ءوزىنىڭ 54 جىلدىق تاريحىندا تۇڭعىش رەت رەسپۋبليكالىق ءبىلىم بايگەسىنە شاكىرتىن اپارۋدان باستاعان ەدى. سودان بەرى دە وندا زامان تالابىنا وراي، تالاي-تالاي ىلكىمدى جۇمىستار اتقارىلىپ كەلەدى.

سول وقيعادان ءبىر جىل وتكەن سوڭ اۋىل مەكتەبىنە سۋ جاڭا كومپيۋتەرلەر كەلدى. ونى وبلىس ورتالىعىنان ارنايى ماماندار كەلىپ، قوسىپ، مەكتەپتىڭ كومپيۋتەر مامانىنا تابىستاپ كەتتى. ەندى وقۋشىلار جارىقتىڭ شەكتەلىپ بەرىلۋىنە بايلانىستى ىمىرت ۇيىرىلە عانا كەلىپ، كومپيۋتەر ساباقتارىن وقيتىن.
 

---