كوڭىلدەن كەتپەيدى
ورتامىزدان ۇلكەن ادام — ءقادىرلى مۇقان كەتتى. ورنى ۇڭىرەيىپ قالدى. ونىڭ ۇلكەندىگى جاسىنان گورى ىسىندە، بۇگىنگىسىنەن گورى ەرتەڭىندە، سۇيكىمدى، سۇلۋ مىنەز-قىلىقتارىندا ەدى. ونىڭ بۇل قاسيەتتەرىن جاندى جەمپاز ۇزاق اۋرۋ مويىتا المادى. كوڭىلىن سۇراي تالاي باردىم. جاسىعان، تىرشىلىك، تۆورچەستۆولىق، ءۇمىت ارمانداردان اينىعان ءبىر كەزىن كورە المادىم. ەتىنەن ارىلىپ، تەك سىڭىرگە ءىلىنىپ جاتسا دا جۇرتشىلىق اڭگىمەلەرى، ءتىپتى جولداستىق ءازىل-قالجىڭ اۋزىنان تۇسكەن جوق.
ەسىل ەردى سۇم اجال الىپ تىندى. ءبىراق، مۇقاننىڭ كوركەم بەينەسى، حالىقتىڭ كوڭىلىنە ەككەن جەمىستەرى كۇن وتكەن سايىن، ەسكە العان سايىن بويلاپ وسە بەرمەك.
اتتەڭ، قيماس جولداستان، اياۋلى دوستان ءومىرىنىڭ ەڭ قىزىقتى شاعىندا ايىرىلدىق. سايىپ كەلگەندە ارماننىڭ ۇلكەنى كەپ جاساۋ ەمەس، كوپ ىستەپ، بىرەگەي ىستەپ، ارتقا ۇلكەن مۇرا قالدىرۋ عوي. مۇقان قالدىرعان مۇرا حالقىنىڭ التىن قازىناسىنا قوسىلدى. جاڭا قازاقتىڭ جاڭا ان-كۇيىن جاساۋدا مۇقان تولەبايەۆ ەسىمى كورنەكتى كومپوزيتورلار قاتارىندا تۇرۋى دا كۇمانسىز. كوزدەن كەتكەنمەن كوڭىلدەن كەتپەيدى ول.
1960
You Might Also Like
-
مەنىڭ ىشىمدە ءقازىر عاجاپ وزگەرىستەر بولىپ جاتىر. تولقىعان ويدى، بويدى بيلەگەن قۋانىشتى تولىق ايتۋعا تولىمدى ءسوز تاپپاي تۇرمىن.
-
وزىنە-وزى عانا ەمەس-اۋ، بۇكىل الەمگە ءولىم، اپات ازىرلەۋشىلەر دە ادام با؟ ادام دەگەن ۇلى اتتان ساداعا كەتسىن ولار. زاۋەدە سوعىس بولا قالسا، بۇرىنعى سوعىستار مۇنىڭ قاسىندا انشەيىن توبەلەستاعى. امەريك...
