قىبىمىز قاندى
وزىنە-وزى عانا ەمەس-اۋ، بۇكىل الەمگە ءولىم، اپات ازىرلەۋشىلەر دە ادام با؟ ادام دەگەن ۇلى اتتان ساداعا كەتسىن ولار. زاۋەدە سوعىس بولا قالسا، بۇرىنعى سوعىستار مۇنىڭ قاسىندا انشەيىن توبەلەستاعى. امەريكا ويلى، ونەرلى جۇرت. بارىنە تۇسىنەدى. تۇسىنە تۇرا سول ەلدىڭ بيلەۋشىلەرى جەردى، ايدى اينالعان راكەتاعا سامولەتتى قارسى جىبەرۋى تاڭعالارلىق ءىس — اجالدى قارعانىڭ بۇركىتپەن ويناعانى سياقتى. سامولەت جەتى قابات كوكتىڭ ۇستىنە شىقسا دا راكەتانىڭ ءبىر مىتقۋىنان قالمادى. سوندا جەر بەتىندە ودان نە قۇتىلماق؟! ەڭبەكشى اتاۋلىنىڭ ۇلى قۋانىشى ۇستىندە — ءدال 1 ماي كۇنى سوۆەت كۇزەتشىلەرى قولعا تۇسىرگەن وسى اتىشۋلى اسپان قاندىبالاعىن امەريكا ۇكىمەتى قولدان اتتاندىرسا ماسقارا عوي. ەگەر اتتاندىرماسا، بىلمەي قالسا، ءتىپتى ماسقارا. قاندىبالاق سوعىس ءورتىن تۇتاتقالى ءجۇر. تۇتانىپ كەتسە دۇنيە نە بولماق؟! بۇل وقيعا ءبىزدىڭ حالقىمىزدى قاتتى جيرەنتتى، ساقتاندىردى، ويلانتتى. ويتكەنى، ءبىز تاريحتا تەڭدەسى، ۇقساسى جوق، ەڭبەكشى ادامزات ارمان ەتكەن — كوممۋنيزم اتتى جاڭا دۇنيە جاساپ جاتقان ەلمىز. ول دۇنيەنى بۇلدىرمەك تۇگىلى كىرشىك كەلتىرگەن قول كەسىلەدى. جوعارعى سوۆەت ءۇي، كەشەگى V سەسسياسىندا قابىلدانعان — جۇمىس ۋاقىتىن قىسقارتۋ، سالىقتاردى جويۋ، جەڭىلدەتۋ، اقشا وزگەرىسىن جاساۋ زاڭدارى جەتى جىلدىق جوسپاردى ورىنداۋ جولىنداعى الىپ ادىم. وسى سەسسيادا ايتىلعان دەپۋتاتتاردىڭ، اقىلدى، كەيدە ءتىپتى اشۋلى سوزدەرىنىڭ ءوزى بۇكىل سوۆەت حالقىنىڭ، ونىڭ ىشىندە قازاقتىڭ دا قىبىن قاندىردى. حالقىمەن بىرگە ءوسىپ، بىتە قايناعان جازۋشى مۇندايدا تىنىش قالا المايدى. سوندىقتان مەن ءۇن قوستىم.
1960
You Might Also Like
-
ورتامىزدان ۇلكەن ادام — ءقادىرلى مۇقان كەتتى. ورنى ۇڭىرەيىپ قالدى. ونىڭ ۇلكەندىگى جاسىنان گورى ىسىندە، بۇگىنگىسىنەن گورى ەرتەڭىندە، سۇيكىمدى، سۇلۋ مىنەز-قىلىقتارىندا ەدى. ونىڭ بۇل قاسيەتتەرىن ...
