قۇرمەتتى جولداستار! جاقىن-جاراندار!
مەنىڭ ىشىمدە ءقازىر عاجاپ وزگەرىستەر بولىپ جاتىر. تولقىعان ويدى، بويدى بيلەگەن قۋانىشتى تولىق ايتۋعا تولىمدى ءسوز تاپپاي تۇرمىن.
ياپىر-اۋ، ەمەس پە ەدىم كەشە بالا،
اسىپپىن تەڭ ورتادان مىنا قارا!
قىسىلعان سوڭ ولەڭ دە شىعىپ كەتتى اۋىزدان.
زامان شىركىن زىمىراپ بارادى. بىرەۋلەر ونىڭ شاڭىنا تۇنشىعىپ قالىپ جاتسا، بىرەۋلەر ۇزەڭگى قاعىسىپ تايتالاسىپ بارادى. مەنىڭ الپىسىمدى وسىنشا ايگىلەپ، مەيرامداۋلارىڭىز جاي ەمەسىن ابدەن بىلەمىن. گاپ الپىسقا كەلۋدە ەمەس، قالاي كەلۋدە عوي. الپىستىڭ بيىگىنە شىعىپ الىپ، ارتىما كوز جىبەرسەم التى ايلىق جولدى التى-اق اتتاپ جەتىپپىن. جالعىز جەتكەنىم جوق. بارىڭمەن بىرگە، حالىقپەن بىرگە جەتىپپىن. ماعان ءقازىر ءومىر — تەڭىز، حالىق — كەمە، پارتيا — كاپيتان بولىپ ەلەستەيدى. امان-ەسەن، ولجالى ەتىپ مەنى وسى شاققا كەلتىرگەن سول حالىق، سول پارتيا. ولاي بولسا، ماعان ارناعان سىي-قۇرمەت، يگى تىلەكتەرىڭىزدىڭ ءبارىن ءبىرىن قالدىرماستان مەن پارتياما، حالقىما ارنادىم.
«جاقسى ءسوز جان ازىعى». جان جاساي بىلسە، ازىق جەتكىلىكتى بولعان سياقتى. ءبىراق، كوڭىلدە ءبىر تۇيتكىل تۇر. الماقتىڭ سالماعى بار. ونى ەكىنىڭ ءبىرى كوتەرە بەرمەيدى. كوتەرسەم دەگەن تالاپ تاۋداي. تاۋداي تالاپ كەيدە تيتتەي تومپەشىككە ءسۇرىنىپ تە قۇلاي سالادى. ونداي ساتسىزدىككە ۇشىراي قالسا cوگe كورمەڭىزدەر.
مەنەن بۇرىن بۇل ۇيدە تالاي اعايلاردىڭ 60 جىلدىق مەرەكەسى ءوتتى. ولار وسى مىنبەدەن «الپىس، دەگەن نەمەنە ءتايىرى!» دەپ ەدى. دەگىزگەن ارينە، قۋانىش. مەنى دە قۋانىش كەرنەپ تۇر. ايتسە دە، الپىستى وڭاي دەي المايمىن. ويتكەنى، جاڭاعى اعايلار دەرى دەسە دە، بۋىندارى ءقازىر سىرتىلداپ ءجۇر. بۋىن نەلىكتەن سىرتىلدايتىنى بەلگىلى. مەن تەك بارىمدى اياماسقا ۋادە ەتەم. ناعىز جازۋشىلىق ەڭبەك ينەمەن قۇدىق قازعانمەن بىردەي. سول قۇدىقتان ءساتى ءتۇسىپ فونتان اتقىسا كوپسىنبەيمىن. تامشىلاپ، جىلىمشىلاپ اقسا سىزدەر ازسىنباڭىزدار.
ماعان كورسەتكەن قۇرمەتتەرىڭىز ادەبيەتكە كورسەتكەن قۇرمەت. حالىققا رۋحاني ازىق بولعان ادەبيەتىمىزدىڭ ءلاززاتى، ءنارى كۇننەن-كۇنگە ارتا بەرسىن! ونى جاساۋشىلاردىڭ تاۋى شاعىلماي، قالامى مۇقالماي الپىس تۇگىلى، جۇزگە جەتە بەرسىن!
1962
You Might Also Like
-
جازۋشىلاردىڭ جۋىردا كرەمل سارايىندا وتكەن ءۇشىنشى سەزى ادەبيەت جايىن التى كۇن اڭگىمە ەتتى. سوۆەت ەلىندەگى، سوسياليستىك، كاپيتاليستىك سىرتقى ەلدەردەگى ۇلىلى-كىشىلى حالىقتاردىڭ ءبارىنىڭ دەرلىك سەزگە...
-
ورتامىزدان ۇلكەن ادام — ءقادىرلى مۇقان كەتتى. ورنى ۇڭىرەيىپ قالدى. ونىڭ ۇلكەندىگى جاسىنان گورى ىسىندە، بۇگىنگىسىنەن گورى ەرتەڭىندە، سۇيكىمدى، سۇلۋ مىنەز-قىلىقتارىندا ەدى. ونىڭ بۇل قاسيەتتەرىن ...
