InfoHub Logo

بايعاني اۋدانىنىڭ ويماۋىت سوۆحوزىندا ەڭبەگىمەن ەلەنگەن، قۇرمەتكە بولەنگەن قيتىق بايدا جالشىلىقتا ءجۇرىپتى. سوۆەت وكىمەتى جىلدارىندا قىرىق جىلداي كولحوز قويىن باعىپ، وتان داۋلەتىنە مول ۇلەس قوسىپ، الپىسىنشى جىلدارى دۇنيەدەن ءوتتى.

سول قيتىق اقساقال ادال ەڭبەگى ناتيجەسىندە ۇكىمەت ناگراداسىنا ۇسىنىلىپ، 1948 جىلى سول ناگرادانى تاپسىراتىن اۋدان ورتالىعىنداعى ۇلكەن جيىنعا شاقىرىلىپتى.

قيتەكەڭ ءومىر بويى مال قامىمەن اۋدان تۇگىل، كولحوز ورتالىعىنا دا كەلىپ تۇرمايدى ەكەن. ەل باسىنان وتكەن قيىنشىلىق جاعداي ول كەزدەگى اۋىل ءومىرىنىڭ كيەر كيىم، ىشەر استىڭ تاپشىلىعى ادامداردىڭ مادەني وسۋىنە دە بوگەت بولعانى بەلگىلى. مىنە، وسى سالتاناتتى جيىنعا كيەتىن دۇرىس كيىم تاپپاي، كورشىلەس شوپاننىڭ كونەتوز بەشپەنت-شالبارىن كيىپ كەلىپتى. اۋدان ورتالىعىندا ول كەزدە قوناق ءۇي قايدان بولسىن، ءابدىعالي دەگەن قىزمەتكەر جيەنىنىڭ ۇيىنە ءتۇسىپ، قونىپ شىعادى.

ەرتەڭگىسىن بەتى-قولىن جۋۋعا تىسقا شىعىپ، جۋىنىپ، ۇيگە كىرسە، ءتور الدىنداعى كورپەدەن تومەنىرەك، شاعىن ورنەكتى ماتا جايۋلى جاتادى. قيتەكەڭ ءارى ويلاپ، بەرى ويلاپ جايۋلى ماتا ۇستىنە كەلىپ وتىرىپ الادى. شاي جاساۋعا كەلگەن كەلىن:

— اتا، شاي جاسايىن، جوعارى كورپەگە وتىرىڭىز، — دەپتى سىپايىلىقپەن. ءبىر جاعىنان ۇلكەندىگى بار قيتىق اقساقال:

— قايدان بىلەيىن، قاراعىم! قوناعىنا جايعان توسەنىشى بولار دەپ وتىرا سالىپپىن، — دەپ ىسىرىلىپ، كورپەگە وتىرادى.

جينالىس كەشتەۋ باستالاتىن بولىپ، قيتەكەڭ ۇيدە ۋاقىتىندا بارارمىن دەپ وتىرىپ قالادى دا، ءۇي يەسى ەرتەڭگىسىن جۇمىسقا كەتىپ قالادى. جينالىسقا بارماق بولىپ قيتەكەڭ بەشپەنت-شالبارىن كيەيىن دەپ ىلگىشكە كەلسە، ەكى بەشپەنت-شالبار ءىلۋلى تۇر ەكەن. ءوزىنىڭ كيىپ كەلگەنى قايسىسى، ونى بىلە الماي (جاراتىلىسىنان ۇياڭ، كىسىنىڭ الا ءجىبىن اتتاپ، قيانات جاساپ كورمەگەن قارت) ءۇي يەلەرى كەلگەنشە ۇيدە وتىرىپ قالىپ، جينالىسقا قاتىسا الماي قالىپتى دەپ اڭىز ەتەدى.

---