«لەنينشىل جاس» گازەتىنىڭ رەداكسياسىنا حات
قۇرمەتتى رەداكتور!
مەن «لەنينشىل جاس» گازەتى وقۋشىلارىنىڭ ءبىرىمىن. «لەنينشىل جاس» ءوزىنىڭ ۇزاق جىلدار بويى سىڭىرگەن يگىلىكتى ەڭبەگىمەن قازاقستان جۇرتشىلىعىنىڭ، اسىرەسە جاستاردىڭ سۇيىكتى گازەتتەرىنىڭ بىرىنە اينالدى.
جاس ۇرپاقتارىمىزدى كوممۋنيستىك رۋحتا تاربيەلەۋ جولىنداعى بۇل گازەتتىڭ اتقارىپ كەلە جاتقان ەرەكشە قىزمەتىن ءبىر سوزبەن اتاپ كورسەتۋ قيىن. گازەت سۇيىكتى، قىمباتتى گازەتىمىزدىڭ، ءبىرى. ءبىراق مەنىڭ ايتايىن دەگەنىم باسقا، ءبىرازدان بەرى كوزگە ءتۇسىپ جۇرگەن، جانىمىزعا باتىپ جۇرگەن ءبىر ەلەۋلى كەمشىلىكتەر تۋرالى بولماق. بۇل ءسوز دوستىڭ، شىن دوستىڭ كىرشىكسىز ادال جۇرەگىنەن شىققان ءسوز، ءبىزدىڭ «لەنينشىل جاسىمىز» ءمىنسىز بولسا ەكەن دەگەن تىلەكتەن تۋعان ءسوز. سونىمەن مەنىڭ توقتالايىن دەگەنىم «لەنينشىل جاس» گازەتىندە جاريالانىپ جۇرگەن كەيبىر ماقالالاردىڭ وتە شۇبالاڭ، سويلەمدەرى تەرىس، ءسوز قولدانۋلارى جاڭساق ەكەندىگى جايىندا.
«...قوناقتار تاعى دا مول وتىرماقشى ەدى» «...ءارى ونى ەكى دۇركىن كەلگەندە دە قۇلاعىنىڭ تۇبىنە سىبىرلاپ ايتتى. ىرگەلەس وتىرعان مەن زورعا ەستىدىم». «...كوپ جىل بالا تاربيەلەۋدىڭ ىستىق-سۋىعىنا قاقتالعان جان ەمەسپىن...» «تەتيا انيا ەكەۋمىز ۇزاق اڭگىمەگە كەتتىك. جاڭا كوسموس راكەتاسى تۋرالى گازەت ماتەريالدارىن وقىپ جاتقان گريشا اعاي اندا-مۇندا ماساتتانعان بىزگە ءبىلدىردى». وسى ءبىر ءبىز كەلتىرگەن مىسالدارداعى «قوناقتار مول وتىراتىن» ەدى، «ەكى دۇركىن قۇلاعىنىڭ تۇبىنە سىبىرلاپ» ايتتى، «ىرگەلەس وتىرعان مەن...» «ىستىق-سۋىعىنا قاقتالعان» دەگەن سياقتى بۇرمالانعان تەرىس سوزدەر وقۋشى جۇرتشىلىقتى رەنجىتەتىن، جاستارىمىزدىڭ ءتىل ونەرىنە جەتۋى ىسىنە ۇلكەن زيان كەلتىرەتىن جايلار. بۇل سوزدەردىڭ ەجەلدەن بەرى قولدانىپ، قالىڭ بۇقارانىڭ ساناسىنا سىڭگەن تۇرلەرى: «قوناقتار ۇزاق وتىراتىن ەدى»، «ەكى رەت قۇلاعىنا سىبىرلادى»، «قاتار وتىرعان مەن...» «ىستىعىنا كۇيىپ، سۋىعىنا توڭعان...» دەگەن سوزدەر ەمەس پە!
وسى مىسالعا الىپ وتىرعان «ۇل-قىزبەن بىرگە شەشە ءوستى» دەگەن وتە ۇزاق ماقالانى اۋىل، سەلو جاستارى بىلاي تۇرسىن، ءومىر بويى جازۋ ىسىنە ارالاسىپ كەلە جاتقان مىنا بىزدەردىڭ دە تۇسىنە قويۋىمىز وڭاي ەمەس. ماقالادا ءتىلدىڭ گرامماتيكالىق قاعيداسى مۇلدە بۇزىلعان، باسىنان اياعىنا دەيىن تەرىس قۇرالعان سويلەمدەر مەن ورنىن جوعالتقان سوزدەردەن قۇتىلا المايسىز. ونىڭ ۇستىنە بۇل ماقالا بەلگىلى ءبىر جازۋ زاڭىنا باعىنباعان، ءبىر جۇيەگە تۇسپەگەن بىرەسە انانى، بىرەسە مىنانى بايانداي بەرگەندىكتەن ايتايىن دەگەن ويى بىتىسىپ، بىتپىراعان.
ماقالا تىم ۇزاق، سوزدەرى جانسىز، پىكىرلەرى كۇڭگىرت، سوندىقتان وقىپ وتىرعان ادامدى وزىنە تارتپايدى، ايتىلىپ وتىرعان ماسەلە ىنتىقتىرمايدى، وي سالمايدى. سونىڭ سالدارىنان تەز ۇمىت بولادى دا، جۇرتشىلىق نازارىن اۋدارار ۇلكەن ماسەلەلەر ساتىسىنا كوتەرىلە المايدى.
مەنىڭشە «لەنينشىل جاس» بەتىنە جارىق كورەتىن ماقالا، حابار، اڭگىمە، وچەركتەر ساياسي ۇستامدى بولۋىمەن قاتار وتە شەبەر، سويلەمدەرى قىسقا، ايقىن، تىلگە باي بولۋى شارت. ماقالانى، يا وچەرك-اڭگىمەنى وقىپ ۇناتقان جاس ۇرپاق ءوز جولداستارىن سول ءبىر ساتتە ايعايلاپ شاقىرىپ الىپ زاۋلاتىپ وقىپ بەرە قويارلىق جەڭىل، ىڭعايلى بولۋى شارت. سولاي بولعاندا عانا ءاربىر گازەت نومەرىن وقىعان جاستىڭ ىنتىعى كۇشەيە بەرمەك، گازەت ءقادىرى بۇرىنعىسىنان دا ارتا بەرمەك. ونىڭ ۇستىنە گازەت قالىڭ وقۋشىلارىن ءتۇزۋ جازۋعا، ءتىل كوركەمدىگىن يگەرۋگە، پىكىر، ويلارىن قىسقا دا، اشىق ايتىپ ۇيرەنۋگە باۋلىپ وتىرماق.
ءبىزدىڭ ءسوز ارناپ وتىرعانىمىز «لەنينشىل جاستىڭ» وسى جىلعى 11-وكتيابردەگى نومەرىندە باسىلعان «ۇل-قىزبەن بىرگە شەشە ءوستى (؟!)» دەگەن ماقالا. ال، 14-وكتيابردە باسىلعان «اقبۇلاقتىڭ ابزالدارى»، 8-وكتيابردەگى «شابۋىل»، «ازاماتتار» (قامباروۆ، جۇماقانوۆ، جانۇزاقوۆ جولداستار جازعان) اتتى كولەمدى ماتەريالدار قىسقارتۋدى، وڭدەۋدى كەرەك ەتەدى. بۇلاردا دا ءسوز شەبەرلىگى جەتىسپەيدى، ايتايىن دەگەن وي ءدال، قىسقا ايتىلمايدى.
بۇدان رەداكسياعا تۇسكەن ماتەريالدى قاراۋ ىسىندە سالقىندىق، ءوز ىسىنە جاۋاپسىزدىق بار ەكەنىن بايقايمىز. جاۋاپسىزدىق، اۆتورلاردىڭ كوڭىلىن جىقپاۋ، كىسىنىڭ بەدەلىنە قاراپ جازعاندارىن باسا بەرۋ رەداكسيا ءۇشىن وتە زياندى قىلىق، وتە ءقاۋىپتى ادەت.
سوندىقتان رەداكسيا قىزمەتكەرلەرىن ءوز ىسىنە وتە جاۋاپتى قاراۋعا، ءوز جۇمىسىن تياناقتى اتقارۋعا ۇيرەتۋ كەرەك. ءسويتىپ گازەتتى كوپ سوزدىلىكتەن، ءتىل شالاعايلىعىنان تەز ارىلتۋ قاجەت.
مەنىڭ ايتايىن دەگەنىم وسى، بۇل پىكىرىمدى رەداكسياداعى جولداستار دۇرىس ۇعار، قورىتىندى شىعارىپ بۇدان بىلاي ونداي كەمشىلىكتەردەن ارىلار دەپ سەنەمىن.
You Might Also Like
-
جاڭا تاقىرىپ — ءبىزدىڭ سوۆەتتىك ءومىرىمىزدىڭ شىندىقتارى، ادەبيەتىمىزدىڭ نەگىزگى وزەگى بولۋعا ءتيىس. مىنە، وسى ءبىر ەڭ ماڭىزدى، ەڭ ارداقتى مىندەتىمىزدى ورىنداۋ جولىندا ءبىز، جازۋشىلار قالىڭ جۇرتشىل...
