«ليتەراتۋرنايا گازەتا» جىبەرگەن «سوسياليستىك ءومىر بەينەسى» انكەتاسىنا جاۋاپ
1. كوممۋنيستىك ۇلى ارمانعا جەتۋ جولىنداعى قىم-قۋىت ايتىس-تارتىستاردا اقىل، ءبىلىم، ءادىس، سەسكەنبەيتىن جۇرەك، قاجىمايتىن قايرات جەڭەدى. سوسياليستىك قوعام ادامدارىنىڭ، سوسياليستىك وبرازداردىڭ بويىنان مەن الدىمەن سولاردى ىزدەيمىن. ادامشىلىق باسقا قاسيەتتەردىڭ ءبارى وسىلارعا باعىنۋشى، وسىلاردى كوركەيتۋشى بولۋى كەرەك.
2. مىڭداعان سوۆەت جازۋشىلارى بار. سولاردىڭ ىشىندە سوسياليستىك ءومىردى قۇلشىنا جىرلامايتىنى كەمدە-كەم. ءبارى جابىلا جازسا دا بىردە-بىرى بۇل ءومىردىڭ، ونى جاساۋشىلاردىڭ تولىق بەينەسىن ءالى جاساي الماي كەلەدى. ويتكەنى، ول ءومىر، ول بەينەلەر كىتاپقا سىيماي جاتىر. حالقىمىز ءسۇيىپ وقيتىن شولوحوۆ شىعارمالارىنىڭ ءوزى ءومىر دارەجەسىنەن تومەن. جازۋشىدا باس بىرەۋ، قول ەكەۋ. قانشا جاسامپاز بولسا دا ونەگە الاتىنى، كورسەتەتىنى ءومىر. ءومىردى ميلليونداعان باستار، قولدار جاساعان. سوندىقتان كىتاپقا سىيمايدى. تەلەگەي-تەڭىز ءومىردىڭ ءبىر بولشەگىن عانا نەمەسە سانسىز سيپاتتى، الۋان سىرلى ادامزاتتىڭ ءبىر تۇلعاسىن ۇقساتا جاساپ بەرگەن جازۋشى دا حالقىنىڭ ارداقتى ازاماتى. مۇنداي جازۋشىلار ءبىزدىڭ ارامىزدا از ەمەس. سوندىقتان ءتىزىم جاساپ جاتپادىم.
3. جازعانىمنان كورگەنىم، بىلگەنىم، ءتىپتى باستان كەشىرگەنىم اسىپ تۇسەدى. ءبىر كەزدە تاقىرىپ از، كۇش كوپ سياقتى ەدى. ەندى تاقىرىپ كوپ، كۇش از. وعى ازايعان اڭشى ورىنسىز وق شىعارمايدى. مەن بۇدان بىلاي تەك سوۆەتتىك مەمۋار، ەستەلىكتەرمەن شۇعىلدانباقپىن. وتكەن ءومىردى بىزدەر ايتىپ كەتپەسەك، بورىش ارقالاپ كەتكەن بولار ەدىك. مەمۋار، ەستەلىكتەر تەك شىندىق بولۋ كەرەك. وتىرىكتى قوستى-اق اۆتوردى قۇداي اتقانى. كەيىنگى جاس ۇرپاقتى اداستىرماق بولعانى. ونداي اۆتورعا حالىقتا، تاريح تا لاعىنەت ايتادى.
1970
You Might Also Like
-
«كوسەگەڭ كوگەرسىن» — كونە قازاقتىڭ ۇلكەن باتاسى. جەردى كۇن كوگەرتسە كوسەگەنى وكتيابر كوگەرتتى. كوشپەلى، ساۋاتسىز اۋىلدا، ويىم قالىپتاسپاعان، قاناتىم ابدەن قاتپاعان شاعىمدا وكتيابر...
