InfoHub Logo

(قوجاباقى مەكتەبىنە 70 جىل)

بويىندا ۇلىلىقتىڭ جاتقان ءىزى،
كەلەشەك عاسىرعا دا ماقتان – ءىسى.
شۋاقتى، شەجىرەلى تاريحى بار
مەكتەبىم – اۋىلىمنىڭ ماقتانىشى.

(«قوجاباقى مەكتەبىنىڭ ءۆالسى» ءانىنىڭ ولەڭىنەن)

قازىرگى XXI عاسىر تاڭىنداعى الەمدىك كەڭىستىكتە ءوز ورنىن ايقىنداۋعا ۇمتىلىپ وتىرعان قازاقستان ءۇشىن دە وقۋشى بالانىڭ مەكتەپتە ورتا ءبىلىم الىپ شىعۋى مىندەتتى ءارى ماڭىزدى ءىس بولىپ سانالادى. ەندەشە، وتكەن تاريحىمىزداعى قازاق اۋىلدارىندا سونداي جالپى ءبىلىم بەرەتىن مەكتەپتەردىڭ قۇرىلا باستاۋى – سول كەزدەگى جۇرگىزىلىپ وتىرعان ءبىلىم ساياساتى ءۇشىن دە جانە قازىرگى ورتا ءبىلىم جۇيەسىنىڭ تاريحى ءۇشىن دە ەلەۋلى ءمانى بار دۇنيە. ويتكەنى قازاقتىڭ ءبىلىمى مەن عىلىمىندا، ادەبيەتى مەن ونەرىندە حالقىنا جارىق جۇلدىز بولىپ ساۋلەسىن شاشقان تالاي ۇل-قىزدارى وسىنداي اۋىل مەكتەپتەرىنەن قانات قاعىپ شىققان بولاتىن. سونداي مەكتەپتەردىڭ ءبىرى 1947 جىلى ىرگەتاسى ورتا مەكتەپ بولىپ قالانعان م.گوركيي مەكتەبى ەدى. بۇل – قازىرگى №25 ورتا مەكتەبى.

ەگەر «ەڭ العاش قولعا قالام ۇستاتقانىڭ» دەگەن جىر جولدارى بەلگىلى ءان جولدارىندا العاشقى ۇستازعا قاراتىپ ايتىلعان بولسا، وندا بۇل جەردە مەكتەپ اناعا قاراتىپ ايتىلار ەدى. ول – قوجاباقى اۋىلىنداعى №25 ورتا مەكتەبى.

1994 – 2002 جىلداردىڭ اراسىندا وسى كۇنگى 70 جاسقا تولىپ وتىرعان قوجاباقى مەكتەبىندە ادەبيەت، قۇقىق، تاريح پاندەرىنىڭ ءمۇعالىمى بولدىم. ەگەر مەكتەپتەگى مۇعالىمدىك جۇمىسىم 1994 جىلدان باستالسا، وسى كەزەڭدە، ياعني 1995 جىلى «ۇلتتىق رۋح جوق جەردە...» دەگەن تاقىرىپپەن العاشقى ماقالام جازىلعان ەدى، ول وسى 1995 جىلعى وبلىستىق «سىر بويى» گازەتىنىڭ بەتىندە جارىق كوردى. ال 1996 جىلى 1456 جىلدى نەگىزگە الا وتىرىپ قازاق حاندىعى قۇرىلۋىنىڭ 540 جىلدىعىنا ارنالىپ جازىلعان، ءوزىمنىڭ جازعان تاريحي تاقىرىپتاعى ساحنالىق كورىنىستەرىمنەن تۇراتىن «ءبىز، قازاق، ەجەلدەن ەركىندىك اڭساعان» اتتى العاشقى جازىلعان سەنارييىم دۇنيەگە كەلىپ، ول وسى 1996 جىلعى قازاقستان ەركىندىگىنىڭ 5 جىلدىعىنا بايلانىستى قوجاباقى اۋىلدىق مادەنيەت ءۇيىنىڭ ساحناسىندا قويىلدى. ال 1997 جىلى 8 ناۋرىز مەرەكەسىنىڭ قارساڭىندا قازاق ارۋلارى، قازاق قىزى تاقىرىبىنا ارنالىپ جازىلعان «قارىنداسقا تىلەك» دەگەن اتپەن شىققان العاشقى ولەڭىم دۇنيەگە كەلىپ، ونى وسى 1997 جىلعى 8 ناۋرىز مەرەكەسىنە بايلانىستى قوجاباقى اۋىلدىق مادەنيەت ءۇيىنىڭ ساحناسىندا وتكەن «قىز سىنى» بايقاۋىندا وسى سايىستىڭ جۇرگىزۋشىسى سامال سارسەن وقىدى. سامال فايزەكە قىزى – مەكتەپتىڭ باستاۋىش سىنىبىنىڭ ۇستازى، الماتى قالاسىنداعى قازاق ءتىلى مەن ادەبيەتىن تەرەڭدەتە وقىتاتىن مەكتەپتىڭ ءبىر كەزگى شاكىرتى. ولەڭ سول 1997 جىلعى قازالى اۋداندىق «قازىنالى قازالى» گازەتىنىڭ بەتىندە جارىق كوردى.

1988-1989 وقۋ جىلىندا وسى جوعارى وقۋ ورنىنىڭ جانىنداعى 7 ايلىق، كەشكى دايىندىق كۋرسىن ءبىتىرىپ شىققاننان سوڭ، 1989 جىلى ن.ۆ.گوگول اتىنداعى قىزىلوردا پەداگوگيكالىق ينستيتۋتىنىڭ «قازاق فيلولوگياسى جانە تاريح» فاكۋلتەتىندەگى (فاكۋلتەت جەتەكشىسى – باعدات كارىبوز ۇلى كارىبوزوۆ) «قازاق ءتىلى مەن ادەبيەتى» ماماندىعىنىڭ 1-كۋرس، كۇندىزگى بولىمىنە كەلىپ وقۋعا ءتۇستىم. ونى 1994 جىلى «قازاق ءتىلى مەن ادەبيەتى ءپانىنىڭ ءمۇعالىمى» كۆاليفيكاسياسىمەن ءبىتىرىپ شىعىپ، 1995 جىلى وسى جوعارى وقۋ ورنىنىڭ «تاريح جانە قۇقىق» فاكۋلتەتىندەگى (فاكۋلتەت جەتەكشىسى – مۇرات باقتيار ۇلى مۇحامەدوۆ) «تاريح جانە قۇقىق نەگىزدەرى» ماماندىعىنىڭ 1-كۋرس، كۇندىزگى بولىمىنە كەلىپ ەكىنشى رەت وقۋعا ءتۇستىم. وسى 1995 جىلى اتالمىش فاكۋلتەتتەگى «قۇقىق جانە قۇقىقتىق تاربيە بەرۋ ادىستەمەسى» ماماندىعىنىڭ 2-كۋرس، سىرتتاي بولىمىنە وقۋ ورنىنىڭ رەكتورى باقبەرگەن سارسەن ۇلى دوسمانبەتوۆتىڭ رۇقساتىمەنەن اۋىسىپ، 1999 جىلى قورقىت اتا اتىنداعى قىزىلوردا مەملەكەتتىك ۋنيۆەرسيتەتىن «زاڭگەر-وقىتۋشى» كۆاليفيكاسياسىمەن ءبىتىرىپ شىقتىم.

1998 جىلى №25 مەكتەپتىڭ فەستيۆال باعدارلاماسىنا ارنالىپ جازىلعان «مەن قازاقپىن تاراعان كوك تۇرىكتەن» اتتى سەنارييىم ءۇشىن قازىلار القاسىنىڭ قۇرامىنداعى – قازالى اۋداندىق ءبىلىم قىزمەتكەرلەرى كاسىپوداق كوميتەتىنىڭ ءتوراعاسى بولات جولتايەۆ پەن قازىلار القاسىنىڭ ءتوراعاسى، قازالى اۋداندىق مۋزىكا مەكتەبىنىڭ ديرەكتورى رومان اۋەزوۆتەردىڭ شەشىمىنە سايكەس اۋداندىق ءبىلىم قىزمەتكەرلەرى «ناۋرىز شاپاعاتى» ونەر فەستيۆالىنىڭ لاۋرەاتى اتاعى بەرىلىپ، ديپلومى تابىستالدى. وسى 1998 جىلى №25 مەكتەپتىڭ وزىنە ارنالعان، ونىڭ 1997 جىلى ورتا مەكتەپ بولىپ قۇرىلعان تاريحىنا جارتى عاسىر تولىپ تۇرۋ قۇرمەتىنە ارنالىپ جازىلعان، مەكتەپتىڭ بايىرعى ۇستازدارى مەن بەلگىلى تۇلەكتەرىنىڭ ەسىمدەرى اتالاتىن ولەڭىم جارىققا كەلدى. ول اۋەلدە «مەكتەبىم مەنىڭ وسىنداي» دەگەن اتپەن جازىلىپ، ونى سول 1998 جىلدىڭ قازان ايىندا، مۇعالىمدەر كۇنى مەرەكەسىندە قوجاباقى اۋىلدىق مادەنيەت ءۇيىنىڭ ساحناسىندا مەكتەپتىڭ 10-سىنىپ وقۋشىسى سەرىك وتەپبەرگەنوۆ العاش رەت دومبىرامەن ورىنداپ شىقتى. وسى 1998 جىلى مەكتەپ اكىمشىلىگىنىڭ قۇرمەت گراموتاسىن الدىم.

1999 جىلى ءوزىمنىڭ سازگەرگە وتىنىشىممەن مەكتەپتىڭ ءانى دۇنيەگە كەلدى. ونى سول 1999 جىلدىڭ 9 مامىر مەرەكەسىندە قوجاباقى اۋىلدىق مادەنيەت ءۇيىنىڭ ساحناسىنداعى كەشتە مەكتەپتىڭ 11-سىنىپ وقۋشىسى، مەكتەپتىڭ 50-تۇلەگى ايزات باينازاروۆا العاش رەت ورىنداپ شىقتى. مەكتەپ ءبىتىرىپ بارا جاتقان تۇلەك ءوز مەكتەبىنىڭ ءانىنىڭ وسىلاي تۇساۋىن كەسىپ بەرىپ كەتكەندەي بولدى. سازگەردىڭ باستاماسىمەن مەنىڭ ولەڭىمە جازىلىپ جارىققا كەلگەن «قوجاباقى بوزداقتارى» ءانى دە وسى كۇنى العاش رەت ورىندالدى. وسى 1999 جىلى مەكتەپ اكىمشىلىگىنىڭ قۇرمەت گراموتاسى بەرىلدى.

2000 جىلى قازاق ءتىلى مەن ادەبيەتى ءپانى مۇعالىمدەرىنىڭ اراسىندا وتكەن اۋداندىق وليمپيادانىڭ جۇلدەگەرى اتانىپ، ماقتاۋ قاعازى تابىستالدى. وسى 2000 جىلى مەكتەپتەگى قۇقىق نەگىزدەرى ءپانى بويىنشا اۋدان مەكتەپتەرى وقۋشىلارىنىڭ اراسىنان العاشقى بولىپ وبلىستىق عىلىمي جوبالار جارىسىنا قاتىسقان شاكىرتىم «مۇسىلماندىق قۇقىق جانە ونىڭ قولدانىستاعى قۇقىقتان ۇقساستىعى مەن ايىرماشىلىعى» دەگەن تاقىرىپتاعى وقۋشىنىڭ عىلىمي جوبا جۇمىسى ءۇشىن وبلىستىق جارىستىڭ گراموتاسىن يەلەندى. وسى 2000 جىلى وبلىستىق ءبىلىم دەپارتامەنتىنىڭ قۇرمەت گراموتاسىن الدىم.

2001 جىلى وقۋشىم مەكتەپ تاريحىندا تۇڭعىش رەت رەسپۋبليكالىق ءبىلىم بايگەسىنە قاتىستى. مەنىڭ جەتەكشىلىگىممەن اۋدان مەكتەپتەرى وقۋشىلارىنىڭ اراسىنان ادەبيەتتەن رەسپۋبليكالىق عىلىمي جوبالار جارىسىنا تۇڭعىش بولىپ قاتىسقان وقۋشىم 2000 جىلدان باستاپ بۇكىلالەمدىك عىلىم مەن تەحنيكا كورمەسىنىڭ فيليالى بولىپ تابىلاتىن «دارىن» رەسپۋبليكالىق عىلىمي-پراكتيكالىق ورتالىعىنىڭ 1999 جىلدان بەرى وتكىزىپ كەلە جاتىرعان وقۋشىلاردىڭ عىلىمي جوبا جارىسىنىڭ IV رەسپۋبليكالىق كەزەڭىنە ءوتىپ، جۇمىسىن قورعاپ، «حالىق اقىنى باينازار وتەپوۆ شىعارماشىلىعىنداعى ەل تاعدىرى جانە اقىن ولەڭدەرىنىڭ كوركەمدىك ءمانى» دەگەن تاقىرىپتاعى عىلىمي جوبا جۇمىسى ءۇشىن رەسپۋبليكالىق عىلىمي جوبالار جارىسىنىڭ II دارەجەلى ديپلومىن الدى.

بيىل وسى ورتا مەكتەپتىڭ قۇرىلعانىنا 70 جىل تولىپ وتىر. قوجاباقى مەكتەبى دە، اۋىلدىق مەكتەپ بولسا دا، ىرگەلى مەكتەپتەردىڭ قاتارىنان سانالادى. ونىڭ دالەلى – قوجاباقى مەكتەبى تەك قوجاباقى اۋىلىنىڭ بالالارىنا عانا ساباق بەرگەن مەكتەپ ەمەس، قوجاباقىدا 1947 جىلى ورتا مەكتەپ قۇرىلعاندا، ونىڭ ماڭايىنداعى اۋىلداردا ءالى ورتا مەكتەپتەر بولا قويعان جوق ەدى. سوندىقتان ول اۋىلداردىڭ كوپتەگەن بالالارى ورتا ءبىلىمدى قوجاباقى مەكتەبىنەن كەلىپ الىپ وتىردى. وسى مەكتەپتىڭ تۇلەگى اتاندى، وسى مەكتەپتەن اتتەستات الدى، وسى مەكتەپتەن ءومىر ايدىنىنا اتتاندى. بۇل ءۇردىس كۇنى كەشەگە دەيىن جالعاسىن تاۋىپ كەلدى. كەيىن سول بالالاردىڭ ىشىنەن ەسىمدەرى كوپكە بەلگىلى مەكتەپتىڭ تۇلەكتەرى شىقتى. ولار ەكى اۋىلعا دا – قوجاباقى اۋىلىنا دا، وزدەرىنىڭ كىندىك قاندارى تامعان توپىراقتارىنا دا ەسىمدەرى قاتار ايتىلا بەرەتىن ورتاق پەرزەنتتەر بولىپ قالدى.

سىرعا تولى وتكەنى،
ىزگىلىكتىڭ كوكتەمى،
بىلىمگە كەڭ جول اشقان –
قوجاباقى مەكتەبى.

بۇل – مەكتەپتىڭ ءۆالسىنىڭ ءانىنىڭ قايىرماسى. راسىندا دا، قوجاباقى مەكتەبى ءبىلىمىنىڭ ءاۋ باستاعى ىرگەتاسى قانداي بولعان؟ ءبىز بۇل جونىندەگى دالەلدى دەرەكتى مەكتەپتىڭ 1955 جىلعى كۇمىس مەدالمەن بىتىرگەن تۇلەگى، پروفەسسور الماس جامانبايەۆتىڭ مەكتەپتىڭ 1954 جىلعى تۇلەگى، مەكتەپتىڭ العاشقى مەداليسى، الماتى قالاسىنداعى قازاق مەملەكەتتىك ۋنيۆەرسيتەتىنىڭ (قازىرگى قازۇۋ) ەكونوميكا فاكۋلتەتى، قارجى جانە نەسيە ءبولىمىن ۇزدىك باعالارمەن بىتىرگەن تۇلەك-مامانى، ەڭبەك جولىن وندىرىستە ينجەنەر-ەكونوميست قىزمەتىمەن باستاپ، ءوندىرىس سالاسىندا جوعارى باسشىلىق قىزمەتتەرگە كوتەرىلگەن، قاراجال قالالىق پارتيا كوميتەتىنىڭ ەكىنشى حاتشىسى، قاراجال قالالىق اتقارۋ كوميتەتىنىڭ ءتوراعاسى، «اتاسۋرۋدا» اكسيونەرلىك قوعامىنىڭ ۆيسە-پرەزيدەنتتەرى قىزمەتتەرىن اتقارعان، قاراجال قالاسىنىڭ قۇرمەتتى ازاماتى، «قۇرمەت بەلگىسى» وردەنىنىڭ يەگەرى بولعان ءابي داۋلەتكەرىموۆ جايىنداعى 2013 جىلى جەرگىلىكتى «قازالى» گازەتىندە جارىق كورگەن «قاجىماس قايرات يەسى ەدى» اتتى ەستەلىك ماقالاسىنان كەزدەستىرە الامىز. وندا اۆتور 1953 جىلى قوجاباقىداعى م.گوركيي مەكتەبىنىڭ توعىزىنشى سىنىبىنا وقۋعا كەلىپ، وسى جەردە 10-سىنىپتا وقىپ جۇرگەن قوجاباقىلىق ۇل ءابي داۋلەتكەرىموۆپەن العاش رەت تانىسادى. كەيىن مەكتەپتىڭ ەكى بىردەي كۇمىس مەدالمەن بىتىرگەن تۇلەكتەرىنىڭ جولداستىق، دوستىق قارىم-قاتىناستارى سول كەزدەگى قازاقستانداعى جالعىز ۋنيۆەرسيتەتتىڭ – ءبىرى ەكونوميكا فاكۋلتەتىندە، ءبىرى فيلولوگيا فاكۋلتەتىندە وقىپ جۇرگەن كەزدەرىندە دە ودان ءارى جالعاسا تۇسەدى. كەيىن ۋنيۆەرسيتەتتەن سوڭ ءابي داۋلەتكەرىم ۇلى: «مەن ۋنيۆەرسيتەتتە وقىعان كەزدەردە كوپ قيىنشىلىق كورگەنىم جوق. ويتكەنى، مەكتەپتە وقىتقان اعايلارىمىز بەن اپايلارىمىز بىزگە بۇكىل عىلىمنىڭ نەگىزدەرىن تەرەڭ تۇردە سانامىزعا سىڭىرە ءبىلدى»، - دەپ ەسكە الادى ەكەن. سوندا ءوز شاكىرتتەرىنە الماتىداعى ۋنيۆەرسيتەتتە ۋنيۆەرسيتەتتىك ءبىلىم الۋعا قيىندىق تۋعىزباي، سوعان اپارار ءبىلىمنىڭ ىرگەتاسىن دۇرىس قالاپ بەرىپ جىبەرىپ وتىرعان سول كەزدەگى م.گوركيي كولحوزىنىڭ مەكتەبىنىڭ مۇعالىمدەرى ەدى. دەمەك، وسىعان دەيىن دە قوجاباقى مەكتەبىنىڭ تاريحى تۋرالى ايتىلعاندا مىڭ سان رەت ايتىلىپ جۇرگەن «قوجاباقى مەكتەبىندە ءبىلىمنىڭ نەگىزى بولدى، مۇندا مىقتى-مىقتى دەگەن ۇستازدار جۇمىس ىستەگەن ەدى» دەگەن ءسوزدىڭ اقيقاتتىعىنا تاعى دا كوزىمىز جەتە تۇسكەندەي. ماقالادا ول ۇستازداردىڭ دا ەسىمدەرى كەلتىرىلە كەتەدى. ماقالادا ول جايلى: «ول مۇعالىمدەر: جارمەدەت حايرۋللايەۆ، قوجاقوۆا حاديشا، ەرباتىروۆ جۇمامۇرات، تىقىبايەۆ قۋانىش، ءۋايىس، حالت نۇرجىگىتوۆتەر، شافييەۆا گالينا حافيزوۆنا، كەمالوۆ جيەنەي، يانكوۆسكايا ليديا ماتۆەيەۆنا، باكەشوۆ قوجاباي، ايتمامبەتوۆ الداحيار، وڭعاروۆ تىلەپ، تاعى باسقالارى» دەپ كورسەتەدى. مەكتەپ جايلى جازىلعان ولەڭدە دە بۇل ۇستازداردىڭ ءبازبىرىنىڭ ەسىمدەرى كەلتىرىلگەن. جانە مەكتەپتىڭ العاشقى كۇمىس مەدالىن العان تۇلەكتەرى ءابي داۋلەتكەرىموۆتىڭ دە، الماس جامانبايەۆتىڭ دا، مەكتەپتىڭ العاشقى التىن مەدالىن العان تۇلەگى الپىسباي قارامولدايەۆتىڭ دا ەسىمدەرى كەلتىرىلگەن. «تاۋلار الىستاعان سايىن بيىكتەي بەرەدى» دەيدى دانا حالقىمىز.

قوجاباقى مەكتەبىن ورتا مەكتەپ بولىپ قۇرىلعان 1947 جىلدان بەرگى ۋاقىتتا 8 مەكتەپ ديرەكتورى باسقارعان. 1947-1949 جىلدار اراسىندا مۇلكىبايەۆ، 1949-1953 جىلدار اراسىندا ج.حايرۋللايەۆ، 1953-1959 جىلدار اراسىندا ق.باكەشوۆ، 1959-1965 جىلدار اراسىندا م.قوجابايەۆ، 1966-1968 جىلدار اراسىندا ا.قارتبايەۆ، 1968-1976 جىلدار اراسىندا ءى.ناعاشىبايەۆ، 1976-1985 جىلدار اراسىندا ا.ەسەتوۆ، 1985-2016 جىلدار اراسىندا ا.تەمىربايەۆ باسقاردى. ءقازىر مەكتەپكە جاڭا باسشى سايلانعان. وسى ۋاقىت اراسىندا 26 وقۋشىسى مەكتەپتى ۇزدىك ءبىتىرىپتى. ولار وزدەرىنىڭ بىلىمدەرىن التىن مەدالعا، كۇمىس مەدالعا، «ۇزدىك اتتەستاتقا» جانە «التىن بەلگىگە» دالەلدەپ شىققان ۇل-قىزدارى ەدى.

مەكتەپ جايلى ايتا الدىق پا ءبىز ۇعا،
شاكىرتىنە قارايتىن ەل قىزىعا.
«25-تە وقىعام» دەيدى ۇلى دا،
«25-تە وقىعام» دەيدى قىزى دا.

ءار تۇلەكتىڭ ەڭبەگى ەتكەن باعالى
مەكتەبىنىڭ ەسىندە ءار كەز قالادى.
تالاي ءبىلىم سىناعىندا ەڭكەيمەي
جيىرما بەستىڭ بيىك تۇرعان جالاۋى.

تالاي شاكىرت وتكەنىنە قاراعان
شىعارمايدى ءوز مەكتەبىن سانادان.
جيىرما بەس تە سپورتتا، ونەر، بىلىمدە
مىقتىلاردىڭ الدىن تالاي وراعان.

بيىلعى وقۋ جىلىنىڭ قورىتىندىسىمەن مەكتەپتىڭ تاعى دا ەكى تۇلەگى مەكتەپتى «التىن بەلگى» بەلگىسىنە ءبىتىرىپ شىقتى. مەكتەپ تاريحىنداعى التىن مەدال يەگەرلەرىنىڭ سانى 7 بولسا، ەندى «التىن بەلگى» يەگەرلەرىنىڭ سانى دا 7-گە تولىقتى.

ءسوزىمىزدى مەكتەپ انامىزدىڭ 50 جىلدىق كەزەڭىنە وراي جانە 50-تۇلەكتەرىن ۇشىرۋ قۇرمەتىنە وراي دۇنيەگە كەلگەن «قوجاباقى مەكتەبىنىڭ ءۆالسى» ءانىنىڭ ءوزىنىڭ ءبىر شۋماعىمەن تۇيىندەسەك:

ءبىلىمنىڭ باعالاعان نارقىن ۇيام،
ساقتاعان داستۇرلەرىن، سالتىن ۇيام.
بولاشاق عاسىرلارعا شۋاق شاشىپ،
جايناي بەر ماڭگىلىككە، التىن ۇيام!

اۆتوردان: اۆتور اۆتوردىڭ ءوز وتىنىشىمەن مەكتەپتىڭ تەرمەسىن جازىپ، ورىنداتقىزىپ بەرگەنى ءۇشىن (2016، ماۋسىم ايى) قازالى اۋداندىق مادەنيەت ورتالىعىنىڭ ديرەكتورى كەمەڭگەرگە، تەرمەنى سالىپ، ورىنداپ بەرگەنى ءۇشىن قازالى اۋداندىق مادەنيەت ورتالىعىنىڭ جىرشى-تەرمەشىسى جانىبەككە، ءۆالستى ورىنداتقىزىپ بەرگەنى ءۇشىن (2016، جەلتوقسان) قىزىلوردا وبلىستىق فيلارمونياسىنىڭ قىزمەتكەرى تاڭشولپانعا، ءاندى ايتىپ، ورىنداپ بەرگەنى ءۇشىن قىزىلوردا وبلىستىق فيلارمونياسىنىڭ ءانشىسى ريناتقا راقمەت ايتادى. مادەنيەت، ونەر سالاسىندا جۇرگەن وسى قىز-جىگىتتەرگە تابىس تىلەيدى.

---