مەنىڭ سولشىلدىعىم تۋرالى
مەن ءوزىمدى ءوزىم ەش ۋاقىتتا سولشىلمىن دەپ ساناعان دا ەمەسپىن. ەشكىمگە سولشىلمىن دەپ ايتقان دا ەمەسپىن.
1923 جىلى مەن ورالدىڭ گۋبەرنيالىق سەزىن وتكىزدىم. سول سەزدە قاراتىلەۋ ۇلىنىڭ سەن سولشىلداردى سۇيەيسىڭ دەگەن قۇلاق قاعىسىنا «وندى دا، سولدى دا سۇيەمەيىن» دەپ جاۋاپ بەرگەن ەدىم.
ويتكەنى مەن ول سەزدە يسماعامبەت ۇلى، ءابدىراحمان ۇلى، يسا ۇلى، جانىش ۇلى جانە الەن ۇلى جولداستاردى سۇيەدىم. مۇنىم سولشىلدىق بولسا، مۇنى جاسىرمايمىن. وتكەن جىلى جۋراپكوۆ جولداسپەن سويلەسكەنىمدە: «قازاقستاندا سولشىل جوق، ەشكىم دە كوممۋنيست پارتياسىنان سول كەتە المايدى. ەگەر بىرەۋلەر وزدەرىن سولشىلمىن دەپ جۇرسە، وندايلار اداسىپ ايتادى نە الداپ ءجۇر» دەگەنمىن. مەن مۇنداي پىكىرىمدى باسقالارعا ايتقان بولاتىنمىن، كازىردە دە سونى ايتام.
مۇمكىن كەيدە ءتۇرلى جاعدايلارمەن ءوزىم دە بايقاماي سولشىلدىق جولعا ءتۇسىپ كەتكەندەرىم بار شىعار. كۇندەلىك ىستەن قول ۇزگەندىك، از دا بولسا قالىڭ كوپپەن قاتىناس از بولعاندىق، باسقارۋ قىزمەتتەگى كەيبىر جولداستارعا نارازىلىق (ماسەلەن يسا ۇلى، قۇرامىس ۇلى جولداستارعا) كەيدە سول ايتىلىپ وتىرعان سولشىلدىققا تۇسىرۋگە سەبەپ بولۋى مۇمكىن ەدى. ماسەلەن، يسا ۇلى مەن قۇرامىس ۇلى تازا پارتيا جولىنداعى كوممۋنيستەر دەپ بىلسەم دە مەن ولاردى سماعۇل تۋرالى باسا قيمىلدامايدى، باتا المايدى دەپ ءجۇردىم. شىنىنا كەلگەندە مەن ول كەزدەگى قازاقستاننىڭ وزگەشە جاعدايلارىن ەسكەرمەگەن ەكەم.
وتكەن قىس ورتاسىنان باستاپ ۇزىل-كەسىل شىعا باستادىم. مەنىڭ گازەتتەردە جاريالانعان «كوكشەتاۋ»، «ماي كۇنى» دەگەن شىعارمالارىم دالەل بولسا كەرەك.
قانداي جىك بولسا دا بىزدە بەلگىلى جولى جوق. تابانسىز، زياندى نارسە بولىپ شىقتى. پارتيا جولىنان قىڭىرلانۋدىڭ قاندايى بولسا دا پارتياعا قارسى جول. وتكەن كۇندەگى وسى سەكىلدىلەرىمە مەن تۇگەلىمەن ءوزىمدى كىنالىمىن دەپ سانايمىن. باعزى ۋاقىتتاردا مەن ۋپادوچنيچەستۆوعا ءتۇسىپ كەتىپ ءجۇردىم. ەڭ اۋىر كۇنام وسى دەپ بىلەمىن. مۇنىڭ ءبارىن تەرىستىك دەپ كوپپەن بىرگە تەرگەيمىن. مەن وسىلارىمنىڭ ءبارى ۇلكەن قاتە، اداسقاندىق ەكەنىنە قىزىل سارموۆ پەن نيجەگورود قالاسىنداعى جەر ماي اعىزىپ جاتقان زاۋىتتاردى ارالاعاننان كەيىن ابدەن-اق كوزىم جەتتى. ەڭبەكتىڭ قاھارمان ەرلەرى و جەردە ءسوسياليزمنىڭ ىرگەسىن قالاپ جاتقانىن كوردىم.
ۋاق بايشىلدىق دەرتى كەيدە ءبىزدىڭ جانىمىزعا، تانىمىزگە تىكەنشە جابىسادى. ەگەر ءبىز ادال نيەتىمىزبەن قول ۇستاسىپ، پارتيا بىرلىگىنىڭ اينالاسىندا ۇيىرلەسەك، پارتيا ونداي دەرتتەردى مەزگىلىمەن اسقىندىرماي اشىپ، ەمىن تاۋىپ، اسقان قازاندى امان ساقتاي الادى.
قاتەمىز بولدى. كەلەشەكتە دە قاتەلەسۋىمىز مۇمكىن. ءبىراق جۇمىسشى تابىنىڭ پارتياسى، دۇنيەنىڭ ۇلى وزگەرىسشىلى، ەش نارسەدەن قايمىقپاي ەڭبەكشىل ادام ۇلىن تەندىككە باستاۋشى، كوممۋنيسشىلدىك قوعام قۇرۋشى — كوممۋنيستەر پارتياسى ءبىزدىڭ قاتارلارىمىزدى تۇزەتە الادى، تۇزەتەدى. مۇمكىن، مەنىڭ ءالى دە ءوزىم بايقاي الماعان قاتالارىم بار شىعار، وندايلارىم بولسا پارتيا كومەگىمەن جويامىن.
1929 جىل
You Might Also Like
-
قازاق ادەبيەتىندە ەكى اعىم بار. ولاردىڭ سوڭعى كەزدە قاعىسۋى كۇشەيدى.
-
رۋ باستىقتارىنىڭ (ۇستەم تاپتىڭ) قول استىندا بولىپ، سول تاپتىڭ ىقپالىندا رۋ-رۋعا جىكتەلىپ، كەڭ ورىسكە تالاسىپ، كورشىلەس ەلدەرمەن، كورشىلەس رۋلارمەن جاۋلاسقان ارعى شيكى ەسكىلەردەن، نادان زامانداردان،...
