InfoHub Logo

ءبىر مولدا، ءبىر ۇستا، ءبىر تىگىنشى — ۇشەۋى جولداس بولىپ كەلە جاتىپ، باراتىن جەرىنە جەتە الماي، ءتۇن بولىپ كەتكەن سوڭ ءبىر جەرگە قونا كەتىپتى. ارتىپ كەلە جاتقان نارسەسى بار ەكەن، ۇشەۋى دە ۇيىقتاسا بىرەۋ اكەتىپ قالار دەپ، كەزەكپەن قاراۋىل قويىپتى. ەڭ الدىمەن ۇستانى قاراۋىل قويىپتى. ۇستا جالعىز ءوزى زەرىگىپ، ۇيقىسى كەلگەن سوڭ ءبىر ۇلكەن اعاشتى كەسىپ الىپ، ادامنىڭ دەنە (ءمۇسىنىن) اينىتپاي جاساپ شىعارىپتى. سوسىن تىگىنشىنى وياتىپ، ءوزى ۇيقىعا كىرىسىپتى. تىگىنشى اعاشتان ىستەگەن ادامدى كورىپ «مەنىڭ ونەرىم بۇدان كەم بە» دەپ، دەرەۋ ادەمى كيىم تىگىپ، اعاشقا كيگىزەدى. اعاشتا تەك جان جوق بولعانى بولماسا، ادامنان اينىمايدى. تىگىنشى مولدانى وياتىپ، ءوزى ۇيقىعا كىرىسەدى. مولدا اعاش ادامدى كورىپ تاڭ قالادى. «بۇلار ونەرىن كورسەتىپتى، ەندى مەن قايتەم» دەپ قايعىرىپتى مولدا.

سوسىن «ەندى وسى اعاشقا جان بىتىرسەڭ ەكەن» دەپ قۇدايعا جالىنىپ جىلاپتى. قۇداي كوز جاسىن قابىل الىپ، اعاشقا جان ءبىتىپ، ءبىر سۇلۋ قىز بولىپتى. سۇلۋلىعى سونشالىق، بەتىنە قاراساڭ كوزىڭنىڭ ءجۇزى تايادى ەكەن.

تاڭەرتەڭ ۇستا مەن تىگىنشى ويانىپ، ءبىر سۇلۋ قىزدى كورەدى. ەكەۋى بۇعان جان بىتكەنىنە تاڭ قالادى. ۇشەۋى قىزدى بىرىنەن ءبىرى قىزعانادى. بىرەۋى «مەن الام، ەڭبەك مەنىكى» دەيدى. ەكىنشىسى «جوق، مەن الام، ەڭبەك مەنىكى» دەيدى. ەڭ سوڭىندا مولدا ورشەلەنىپ «جوق، مەن الام، مەن بولماسام، وعان جاندى كىم سالادى؟» — دەيدى. ۇشەۋى كەلىسە الماي جۇگىنۋگە ءبىر قازىعا بارادى. قازى قىزدىڭ بەت-اجارىنا ءبىر قاراپ شىعىپ ۇرەيلەنگەندەي: «ويباي، مىناۋ مەنىڭ قىزىم، بۇدان ءۇش جىل بۇرىن جوعالتقانمىن. سەندەر مۇنى قايدان الدىڭدار؟» — دەپ اقىرادى. بۇل بىتىمگە كونبەي تورتەۋى حانعا كەلىپ جۇگىنىپتى.

— مىناۋ مەنىڭ بالامنىڭ قالىڭدىعى عوي. بۇدان بەس جىل بۇرىن جوعالعان. سەندەر مۇنى قايدان الدىڭدار، وزىمە بەرىڭدەر، — دەپ حان اشۋلانىپتى.

ادىلدىك تابا الماعان ۇشەۋى قوسىلىپتى: «بەرگەن جانىڭدى قايتىپ ال!» — دەپ مولدا قۇدايعا جالىنىپتى. گۇلدەي جايناپ تۇرعان قىز جانىنان ايرىلىپ سولعان بايشەشەكتەي، ەمەندەي قاتىپ، اعاش قالپىنا كەلىپتى. تىگىنشى ءوزى تىككەن كيىمدى الىپ قويىپتى.

— ءما، بالاڭنىڭ قالىڭدىعى بولسا سەن-اق ال! — دەپ ۇستا اعاشتى پاتشانىڭ الدىنا اتىپ ۇرىپتى.

---