ناۋرىز — تازارۋ كۇنى
شىعىس حالىقتارىنىڭ ەجەلگى مەيرامى ناۋرىز — ۇلىستىڭ ۇلى كۇنى كەلدى. قازاق رەسپۋبليكاسىنىڭ ەرىكتى ەل رەتىندە ازاتتىق تۋىن تىككەن كەزىندە ءبۇل كۇننىڭ قادىر-قاسيەتى ارتا تۇسكەندەي. كۇنى كەشەگە دەيىن ناۋرىز — قازاقتىڭ ۇلتتىق مەيرامى دەپ ايتۋعا قورقىپ كەلدىك. بۇگىنگى كۇننىڭ كۇنكورىس قيىنشىلىقتارىن ايتىپ، شەتىمىزدەن جىلاپ ءجۇرمىز. ءبىراق شۇكىرشىلىكتى ۇمىتپاۋىمىز كەرەك.
ادام بالاسى جاقسىلىققا تويمايدى، بولعان سايىن بولا تۇسسە ەكەن دەيدى. دۇنيە جاقسىلىققا تولۋى ءۇشىن ءار ادام ءوزى جاقسىلىق جاساۋى، مەيىرىمدى، كەشىرىمدى بولۋى شارت.
بۇگىنگى ۇلىستىڭ ۇلى كۇنى — ءبىر جاعىنان تازارۋ كۇنى. ادامنىڭ دەنەسى عانا ەمەس، جان دۇنيەسى دە تازا بولسا، دۇنيە جاڭارادى، جاڭعىرادى.
ءبىز ىلعي اينالامىزداعىلاردان، قوعامنان، اكىمدەردەن جاقسىلىق، مەيىرىم كۇتەمىز. «انانى ۇيتپەدى، مىنانى بۇيتپەدى» دەپ كىنالاعىشپىز. «ءۇي سالىپ بەرمەدى»، «جاقسى جۇمىسقا وتىرعىزبادى» دەگەن سەكىلدى وكپە ايتقىشپىز. ال، ءدۇرىسىندا ءار ادام مىناۋ الەمدەگى كۇن سەكىلدى. كۇن، ەشكىمنەن جاقسىلىق كۇتپەي، ءوزىنىڭ نۇرىن ساتپاي، جاقسى مەن جامانعا، زۇلىم مەن ارامعا، انا مەن بالاعا، باقا مەن جىلانعا نۇرىن سەبەدى. ادام بالاسىنىڭ مەيىرىمى دە سول كۇن سەكىلدى بولعاندا، اركىم «ەرتەڭ وسىنىڭ ماعان ءبىر پايداسى تيەر» دەگەن ىشكى ەسەپسىز ءىس قىلعاندا، ءومىر جاقسارادى.
بۇل — ءبىرىنشى ايتارىم.
ەكىنشىدەن — ءبىز، ءارقايسىمىز، ۇلتتىق مۇددەنى ويلاعاندا، ءبولىنىپ-جارىلماي، ەتى ءتىرى، قولىنان ءىس كەلەتىن، تاربيەلى ۇل-قىزدارىمىزدى قولداپ، جۇمىلعان جۇدىرىقتاي بىرىگىپ ەڭبەك ەتە بىلگەندە عانا حالىقتىق مۇراتقا جەتەمىز. ماسەلەن، ماعان ادامبەك دەگەن كىسى ۇنامايدى دەلىك: مىنەز-قۇلقى، دۇنيە-تانىمى دەگەندەي. ەكەۋمىزدىڭ باسىمىز بىرىگە بەرمەيدى. ءبىراق ۇلتتىق ماسەلە توڭىرەگىنە كەلگەندە ەكەۋمىزدىڭ بىرلىگىمىزدى ەشكىم بۇزا المايتىنداي بولسا عانا، حالىقتىق مۇددە، ەلدىك نامىس اياققا باسىلمايدى.
ۇشىنشىدەن — اراق-شاراپ ءىشۋ — از حالىقتاردى بىرتىندەپ ۋ بەرىپ ءولتىرۋ.
ءبىزدىڭ از حالقىمىزدىڭ تاعدىرى جەل وتىندە تۇر: سانى از حالىق ءارى ءبىلىمدى، ءارى تەكتى، ءارى مادەنيەتتى بولۋى شارت. شارت دەيتىنىم — ءبىز ءقازىر عىلىم مەن تەحنيكا دامىعان، سيۆيليزاسيا داۋىلى شارپىپ تۇرعان زاماندا ءومىر ءسۇرىپ وتىرمىز.
سانى كوپ ۇلتتاردىڭ اراسىندا از حالىق ءوز مانىمەن قالۋ ەكىتالاي دۇنيەدەي. سوندىقتان، ءار بالانىڭ، ءار پەرزەنتتىڭ ۇلتتىق مۇددەنى ءوزىنىڭ قارا باسىنىڭ مانسابىنان بيىك قويۋى قاجەت.
ءقازىر، نەگىزىنەن العاندا، حالىق وياندى. بۇرىن قازاق ءتىلىن بىلگەنىن، قازاق تىلىندە سويلەگەنىن ار سانايتىندار ەندى ءوز ءتىلىن بىلمەگەنىنە ۇيالاتىن بولدى. مۇنىڭ ءبارى ءتاۋباعا كەلۋگە، شۇكىرشىلىك ەتۋگە مەڭزەيدى.
مەن قازاق ەلىنىڭ تۇكپىر-تۇكپىرىندە ەڭبەك ەتىپ جۇرگەن ءىنى-سىڭلى، باۋىرلارىمدى، زامانداستارىمدى، زەينەتكەر اعا-جەڭگەلەرىمدى ۇلىستىڭ ۇلى كۇنى قۇتتى بولعاي، جەرىمىزگە، ەلىمىزگە بەرەكە بەرگەي دەپ تىلەك تىلەيمىن.
1992
You Might Also Like
-
سوۆەت وداعى جازۋشىلارىنىڭ كەزەكتى سەزىنە دەلەگات بولىپ قازاق ەلىنەن باراتىنداردىڭ تىزىمىنە مەن دە ءىلىنىپپىن. 1986-جىل ەدى. جۇبان، سىرباي، مۇقامەدجان قاراتايەۆ، سەرىك قيرابايەۆ، تاحاۋي، ءابدىجامىل، ءاب...
