InfoHub Logo

پان گۋ اسپان مەن جەردى، ءوزىنىڭ دەنەسىنەن كۇن مەن ايدى، جۇلدىزداردى، جازىقتىق پەن تاۋلاردى، وزەن-كولدەردى، وسىمدىكتەردى، اڭ-قۇس، بالىق پەن جاندىكتەردى جاراتىپ، تەك ادامزاتتى عانا جاراتپادى. ءسويتىپ، الەمگە ءبىر ءتۇرلى ءتىرى جان جەتىسپەي، ون سەگىز مىڭ جىل قۇلازىعان جاعدايدا ءوتتى.

كەيىن اسپان مەن جەر ورتاسىندا ءنۇي ۆا اتتى ءبىر ايەل قۇدايى پايدا بولدى. كوپتىڭ ايتۋى بويىنشا، ول پان گۋدىڭ جۇرەگىنەن جاراتىلعان. پان گۋدىڭ رۋحى ءبىر كەزدەرى وعان: «مەن سەنى ەڭ سۇلۋ ايەلگە اينالدىرامىن، سەنەن اسىپ تۇسەتىن كەلبەت ەشكىمدە بولمايدى. مەن ءارى ساعان ەرەكشە باتىلدىق جانە الەمنىڭ رۋحىن قۇتقاراتىن قاسيەت بەرەمىن، ساعان مەن اياقتاپ ۇلگەرمەگەن ۇلى مىندەتتى اياقتاۋدى تاپسىرامىن»، – دەپتى.

ءنۇي ۆا پان گۋدىڭ ءۇمىتىن اقتاعان جوق. ول وتە سۇلۋ بولىپ بويجەتتى، كۇلگەن كەزدە كوكتەمدە جاڭا اشىلعان قىزعالداققا ۇقسادى. ءبىراق الەمدە تەك جالعىز ءوزى عانا بولعاندىقتان، ول قاتتى زەرىكتى. وسى كەزدە ول بۇلاق جاعاسىنا سۋ ىشۋگە كەلدى، سۋ بەتىندە ءوزىنىڭ بەينەسىن كوردى، دەرەۋ ويلادى: «جەر بەتى وسىنشاما كەڭ، مەن ءتارىزدى كوپتەگەن تىرشىلىك بولسا، سوندا عانا بۇل دۇنيەنىڭ ءمانى بولار ەدى»، – دەپ ويلانىپ قالادى. وسىلاي ول ءبىر سارى توپىراقتى الدى دا، وعان ءبىراز سۋ قوستى، ءوزىنىڭ تۇرىنە سايكەس بالشىقتان ءبىر سۇيكىمدى بالانىڭ بەينەسىن جاساپ شىقتى. بالشىقتان جاسالعان بالا جەرگە تۇسە سالا، «انا» دەپ داۋىستادى. ءنۇي ۆا وتە قاتتى قۋاندى، بىردەن بۇل جاڭادان جاسالعان تىرشىلىك يەسىن «ادام» دەپ اتادى.

سول كەزدە ءنۇي ۆا سارى توپىراقتان كوپتەگەن ادامزاتتى جاساۋعا كىرىستى، مىناۋ كەڭ-بايتاق الەمنىڭ شاتتىققا تولۋىنا جاعداي جاساۋعا شەشىم قابىلدادى. ول سارى توپىراق پەن سۋدى پايدالانىپ، كوپتەگەن ادامداردى جاراتۋىن جالعاستىردى. ولار العىس ايتىپ، ءنۇي ۆا انالارىنا ءتاجىم ەتىپ، دۇنيەنىڭ ءارتۇرلى بۇرىشتارىنا تاراپ كەتتى.

ءنۇي ۆا تۇنىمەن ەڭبەكتەندى. «ءبىراق جەر بەتى شىندىعىندا وتە كەڭ ەكەن، قالايشا ونىڭ شەت-شەتىن ادامدارمەن تولتىرۋعا بولادى؟» – دەپ ويلادى. ءنۇي ۆا اقىرى ءبىر جاقسى امال ويلاپ تاپتى. ول تاۋدان كوپتەگەن شوپتەردى تەرىپ اكەلىپ، ولاردان ءجىپ ءيىردى، ونى بالشىق ەرىتىندىسىنە باتىرىپ، كەيىن بار كۇشىمەن جازىق پەن تاۋعا قاراي سىلكىپ جىبەردى، سانسىز باتپاقتار جەرگە شاشىراپ، ولار بىردەن كىشكەنتاي ادامدارعا اينالدى.

جەر بەتىنىڭ بارى ادامزاتقا تولىپ، ءنۇي ۆا جۇمىسىن توقتاتتى. ەگەر ادامزاتتىڭ ءبىر توبى ولسە، ءنۇي ۆا تاعى ءبىر توبىن جاسادى، ءبىراقتان بىلاي جاساۋ ءنۇي ۆاعا وتە قيىن بولدى. سول كەزدە ءنۇي ۆا ەر ادامدار مەن ايەل ادامداردىڭ بىر-بىرىمەن كەلىسىپ، بالا تۋىپ، تاربيەلەۋىنە، ۇرپاق جالعاستىرۋىنا رۇقسات بەردى.

نەكە جۇيەسىن قالىپتاستىرعان ءنۇي ۆانى ادامدار قۇداي دەپ اتاپ، وعان عيباداتحانا تۇرعىزدى. ءار جىلى كوكتەمنىڭ ناۋرىز ايىندا ادامدار عيباداتحاناعا جاقىن جەردە جينالىپ، سالتاناتتى جينالىس وتكىزەتىن. جينالىسقا جينالعان ادامدار ءنۇي ۆاعا ارناپ كوڭىلدى ماداق جىرلارىن ايتىپ، سول ارقىلى ادامزاتتىڭ پايدا بولۋىنا ولشەۋسىز ۇلەس قوسقان ءنۇي ۆا اۋليەنى ەسكە الىپ، ويناپ-كۇلىپ قايتاتىن.

---