InfoHub Logo

اڭىزداردىڭ ايتۋى بويىنشا، حۋان دي دجۋلۋ سوعىسىندا ايداھاردى جەڭگەننەن كەيىن كوك ءتاڭىرى ونى جۇماققا جىبەرىپ، اۋىل شارۋاشىلىعىن باسقاراتىن قۇداي قىلدى. ونىڭ ۇرپاعى دجۋان ءسۇي سۋ ءتاڭىرى گۋڭگۋڭمەن بىرگە دجىڭشىنۆەي ءۇشىن جاڭا سوعىس اشتى.

سۋ ءتاڭىرى گۋڭگۋڭ ياندي يمپەراتوردىڭ ۇرپاعى بولعان. ادام كەيىپتى، جىلان دەنەلى، شاشى قىزىل بولىپ ءوستى. سول كەزدە قۇرلىق جەردىڭ وننان ءبىر بولىگىن الىپ، قالعاننىڭ بارى سۋ بولدى، سونداي-اق سۋدىڭ ءبارى گۋڭگۋڭ ارقىلى باقىلانىپ وتىردى. ول دجۋان ءسۇيدىڭ قانىپەزەر بيلىگىنە كوڭىلى تولماي، ۇنەمى اتا-بابالارى يەلەنگەن داڭقتى قايتارىپ العىسى كەلەتىن.

دجۋان ءسۇي دەسپوتتىق بيلەۋشى بولدى. ول كۇندى، اي مەن جۇلدىزداردى سولتۇستىكتەگى اسپاندى قاداعالاپ وتىردى، ولاردىڭ قوزعالۋىنا جول بەرمەيتىن. بۇل جەر بەتىندەگى كەيبىر جەرلەردە ادامدار جارىقتىڭ ساۋلەسىنەن كوزدەرىن اشا المايتىن، باسقا ءبىر جەرلەردە قولىن سوزعان كەزدە بەس ساۋساعىن كورە المايتىن قاراڭعى جاعدايعا اكەپ سوقتىردى. اقىرى ءبىر كۇنى ىزاقور گۋڭگۋڭ مۇنداي قاناۋعا شىداي الماي، سوعىسۋعا اسكەر جاساقتايدى.

ەكى كوك ءتاڭىرى قول استىنداعى اسكەرىن ەرتىپ، ءبىر ۇزاققا سوزىلعان شايقاس باستادى، تۋرا 77419 كۇن سوعىستى. ولار اسپاننان جەرگە دەيىن شايقاسىپ، جەردىڭ قيىر سولتۇستىك-باتىس بولىگىندەگى شەكسىز تاۋدىڭ ەتەگىنە دەيىن باردى. گۋڭگۋڭ جەڭىلدى. ىشتەي ءارى ۇيالدى، ءارى ىزالاندى. اشۋىن شىعاراتىن جەر تاپپاي، بىردەن بار كۇشىن جۇمساپ،شەكسىز تاۋدى قاق ورتاسىنان ەكىگە ءبولىپ تاستادى.

شەكسىز تاۋ اسپاننىڭ ۇلكەن باعاناسى بولعان ەدى. ول ءبىر ۇزىلگەننەن كەيىن اسپان ۇلكەن قۋىستارعا بولىنە باستادى. سولتۇستىك-باتىس جاقتىڭ اسپانى دا تىرەۋىنەن ايىرىلىپ قالدى. اسپانداعى كۇن، اي مەن جۇلدىزدار ىعى-جىعى جەر بەتىنە قۇلاپ ءتۇستى. ورماندار ورتەنىپ، وزەن-سۋلار قيعاش اقتى. جەر بەتى ءبىر شەكسىزدىككە اينالدى. ۇيلەر مەن ەگىستىكتەر سۋعا باتتى، ادامدار ءومىر ءسۇرۋ ورتاسىنان ايىرىلدى. ورمان مەن سۋلارداعى اڭدار جانتالاسا قاشتى، ادامدى كەزدەستىرسە، بىردەن ولارعا اۋىز سالدى. جەر بەتى قايعى قۇشاعىندا قالدى.

ءنۇي ۆا جەر بەتىندەگى ءوز قولىمەن جاراتقان ادامزاتتىڭ تولىق جويىلۋ قاۋپىندە تۇرعانىن كورىپ، قاتتى قايعىردى. ول جىرتىلعان اسپاندى جاماۋدى، حالىقتى قايعى-قاسىرەتتەن امان الىپ قالۋدى ويلادى.

ءنۇي ۆا، الدىمەن، الىپ تەڭىزدەن ءبىر ۇلكەن تاسباقانى ۇستاپ الىپ، ونىڭ ءتورت اياعىن كەسىپ تاستاپ، جەردىڭ ءتورت شەتىنە ورناتىپ، ارەڭ-ارەڭ شايقالىپ تۇرعان اسپاندى قوزعالمايتىنداي ەتتى. ال تاسباقا دەنەسىن تەڭىز ىشىندەگى تاۋعا اينالدىردى. سونىمەن قاتار ءنۇي ۆا قايتادان تەرەڭ تەڭىزدىڭ تۇبىنە ءتۇسىپ، كوپتەگەن قىزىل، سارى، كوك، اق جانە قارا ءتۇستى تاستاردى تاۋىپ اكەلىپ، اسپانداعى الگى ۇلكەن تەسىكتى تولتىردى. جاماپ بولعاننان كەيىن اسپاندا جاڭبىردان كەيىن كەمپىرقوساق ءتارىزدى ءتۇرلى تۇستەر جارق ەتتى، راسىندا، وتە ادەمى بولدى. ءنۇي ۆا سونداي-اق جەرگە تۇسكەن كۇن، اي، جۇلدىزداردى قايتادان اسپانعا قويىپ، ءوز قىزمەتتەرىن ءارى قاراي جالعاستىرۋىنا مۇمكىندىك بەردى. كەيىننەن ول ۇلكەن كولەمدە شوپتەردى اكەپ جاقتى، ءشوپتىڭ شوعى ارقىلى جەردەگى بۇلقىنعان سۋ تاسقىنىن توقتاتتى. سوڭىندا ءنۇي ۆا يجوۋعا كەتىپ، ادام جەيتىن سانسىز قارا ايداھاردى ءولتىردى.

وسىلاي جەر بەتىندە تىنىشتىق قايتا ورنادى. ادامدار بار كۇشىن سالىپ، جۇمىس ىستەپ، ءومىر سۇرەتىن ورتانى قالپىنا كەلتىردى. ەگىستىكتە ءدان ءوسىپ شىقتى، جەر بەتى گۇلدەنە باستادى.

ادامدار وتە قۋانىشتى، وتە ءماندى ءومىر ءسۇرۋى ءۇشىن ءنۇي ۆا ءپىشىنى فەنيكستىڭ قۇيرىعىنا ۇقسايتىن «شىڭ حۋاڭ» دەپ اتالاتىن مۋزىكالىق اسپاپ جاساپ شىعاردى. كۇن سايىن كەشكە شارشاعان ادامدار شىڭ حۋاڭدا ويناپ، توگىلمەلى ءان ايتىپ، جەلپىنىپ بي بيلەدى، ءومىردىڭ باقىتىن ۇعىندى.

ادامداردىڭ وسىنشاما كوڭىلدى ەكەندىكتەرىن كورىپ، ەندى اسپانداعى سارايىنا قايتۋعا بولادى دەپ ويلادى. سول مەزگىلدە ول ايداھار كولىگىن كەزدەستىرىپ، ونىمەن اسپانعا ۇشىپ كەتتى. جەر بەتىندەگى ادامدار وعان دەگەن قيماستىقتى سەزىندى، كىشكەنتايى ۇلكەنىن ءسۇيىپ، ۇلكەنى كىشكەنتايىن جەتەكتەپ، ونى شىعارىپ سالدى. ولاردىڭ جۇرەكتەرىندە ادامداردى جاراتقان، ادامزاتتى قۇتقارعان اۋليەگە دەگەن ماڭگىلىك العىس قالدى.

---