ءومىر شىراقتارى
جيىرماسىنشى عاسىر ءجۇر ماڭقىستاۋدا مۇنارالار باسىنا شىراق تاسىپ ...
تولەگەن ايبەرگەنوۆ
ىمىرت ۇيىرىلە اشىق ماشينا تەرەزەسىنەن شام ساۋلەسى سىعىرايعان جەرتولەنىڭ الدىنا توقتاي قالىپ ەدى. كۋزوۆتاعى ەكەۋ وسى ساتكە شاق جەتكەندەي ءۇشا-ۇشا تۇرا كەلىپ، كابينادان ءتۇسىپ جاتقان شوفەر جىگىتكە قاراستى.
— ەكسپەديسيا كونتورى وسى، جىگىتتەر. باستىقتار ءالى كەتە قويماعان بولار، شام كورىنەدى عوي.
ەڭگەزەردەي شوفەر وسىنى ايتىپ، تىرتيعان كۇرتەسىنىڭ ىلگەگىن اعىتتى دا كۇرەكتەي الاقاندارىن ۋقالادى.
جازعىتۇرىمعى جارداي اتاندى جىعار قىزىل جەل كۇنشىعىسقا بايلانىپ قالعانداي ءالى سوعىپ تۇر. ەكى كۇن بويى جولسوقتى بوپ، سارى دالانىڭ ماۋجىر تىنىشتىعى مەن ءبىرىڭعاي ىزىنداعان ماشينا ۇنىنەن ابدەن جالىققان ەكەۋ قۋانىسىپ كالعانداي ەدى. قىسقا پلاشتارىنىڭ ەتەك-جەڭىنەن ۇرلەگەن جەل جەرتولەنىڭ دەرمانتينمەن قاپتاعان اباجاداي ەسىگىنە قاراي يتەرمەلەي بەردى.
ۇزىن ستولدىڭ ورتاسىنداعى وندىق شامدى قورشالاي، جۇمىس كيىمدەرىمەن وتىرعان بۇرعىشى-بارلاۋشىلار ەسىكتەن كىرگەن ەكەۋگە جالت-جالت قاراستى دا، ءوز اڭگىمەلەرىمەن بولا بەردى. بىرەۋ كەلىپ، بىرەۋ كەتىپ جاتاتىن ەكسپەديسيا ومىرىنە ابدەن ۇيرەنىسكەن بايىرعىلار كوپ ەلەڭ ەتە قويعان جوق-تى.
— تورگە شىعىڭىزدار، — دەپ ەكسپەديسيا باستىعى كۇلىمسىرەپ بارلاي قارادى دا، الدىمەن كىرگەن سۇڭعاق بويلى جىگىتكە:
— تەحنيك-گەولوگ يبراگيم مۇرادوۆ بولارسىز؟
يبراگيم مىنا جىگىت، — دەپ ول ورتا بويلى، قاراتورى جۇزىنەن بالالىق ۇياڭدىعى ءالى كەتپەگەن جولداسىنا قارادى.
راسيامەن حابارلاعان بۇگىن كەلەتىنىڭىزدى. دەمالىڭىزدار. الكەن، جىگىتتەردى جاتاقحاناعا ورنالاستىر.
الكەن ەسىككە بەتتەگەن يبراگيمنىڭ قولىنا ءبىر جاپىراق قاعاز قىستىردى دا:
— وسىدان شىققاندا تۋرا ماڭدايدا تۇرعان بيىك ءۇي جاتاقحانا بولادى، — دەدى.
ءىڭىر قاراڭعىلىعى قويۋلانىپ كەتكەن ەكەن. ءار جەردەن سامارقاۋ عانا جىلتىراعان جەرتولە تەرەزەلەرىنىڭ وتتارى باياعى ءبىر ەسكى اۋىلدىڭ كەلبەتىن ەلەستەتكەنمەن، ەرسىلى-قارسىلى اعىلعان ماشينالار، سونادايدا جارقىراعان گاز شىراقتارى وسى ءوڭىردىڭ تانىمسىز تىرشىلىك تىنىسىن سەزدىرگەندەي.
— جەتىبايىڭنىڭ داڭقى جەر جارعانمەن، كەلبەتى قارىن اشىراتىن ەكەن، — دەپ قويدى تورەمۇرات.
— سەن الماتى سەكىلدى ساۋلەتتى قالا دەپ پە ەڭ؟!
— سوندا دا... وسىنشا بايلىق كوزى تابىلىپ جاتقان جەر. الدىمەن ادامدارعا جاعداي تۋعىزباي ما؟...
يبراگيم ەسىك الدىنا كىدىرىپ، شىلىمىن تاستادى دا:
— قوي، ريەۆوليۋسيامەن سالىستىرعاندا مۇنىڭ ءبارى دە تۇك ەمەس ءالى، — دەپ ازىلدەي كۇلگەن بەتى جاتاقحاناعا كىرە بەردى.
بۇلار جۋىنىپ-شايىنىپ تىنىستاعاننان كەيىن كەشكى تاماق جايىن ويلاستىرعانمەن، ەشنارسە شىقپايتىن بولدى: جالعىز اسحانا، و دا جابىلىپ قالىپتى؛ ال كەزەكشى دۇكەن مۇلدە جوق ەكەن. سونسوڭ ەكەۋى دە چەموداندارىن اقتارىسىپ، وتكەندەگى الماتىدان شىققاندا جولعا العان پەچەنە، كونفەتتەرىنەن قالعان-قۇتقاندارىن شىعارا باستادى. تورەمۇراتتان قاتقان نان مەن كولباسا دا تابىلدى. ولار وتكەن-كەتكەندى اڭگىمەلەي، ءماز بوپ كۇلىسىپ، اقىرى تورەمۇرات:
— مىنە، رومانتيكا دەگەن وسىلاي اش جاتۋ بولادى، — دەپ كۇلىپ الدى دا، دەمالۋعا ىڭعايلاندى. — سەن كەلەر نۇكتەڭە كەلدىڭ. مەن بولسام، تاڭسارىدەن تۇرىپ الىپ وزەن شاھارى قايداسىڭ دەپ تاعى جولعا شىعۋىم كەرەك قوي.
جول سوعىپ قاتتى شارشاعاندىقتان با، الدە جاڭا جەردى جاتىرقاعاندىقتان با — ايتەۋىر كوپكە دەيىن ۇيقىلارى كەلە قويمادى. اركىم ءوز ويىمەن بولىپ جاتىر ەدى. يبراگيمنىڭ ەڭ العاش ەسىنە تۇسكەنى ءۇي-ىشى، سوناۋ قوستانايداعى تۋىستارى بولدى. بۇل وقۋىن قۇتارىپ، «ماڭقىستاۋعا جىبەرەتىن بولدى» دەپ اۋىلعا بارعاندا، اناسى كوزيپا:
— قاراعىم-اۋ، وسى جاقتان جۇمىس تابىلمايتىنداي، جەرقيانعا بارا جاتقانىڭ، — دەپ كوزىنە جاس الىپ، ۇيدەگىلەر وعان «سوعىسقا بارا جاتقانداي جىلاعانى نەسى» دەپ كۇلگەسىن: — قايدا بولعاندا دا امان ءجۇرشى، ايتەۋىر، — دەگەن. شىنىندا دا سوناۋ ارقادان كارى كاسپييدىڭ قولتىعىنا تىعىلىپ جاتقان ماڭقىستاۋعا كەلەم دەپ ويلاپ پا ەدى ءوزى دە... ءاي، بۇل ءومىر دەگەننىڭ سان تاراۋ سوقپاقتارى كوپ-اۋ. اتا-انانىڭ جانىندا بولىپ جارىتپاعانى دا راس. «تۇيەمويناقتان» جەتى كلاسس بىتىرگەن سوڭ، اۋدان ورتالىعىنداعى تورعاي مەكتەبىندە وقىدى. ودان الماتى كەتتى. جىگىت سول ءبىر بالالىق جىلدارىن قيماستىقپەن ەسكە ءتۇسىرىپ، كۇلىمسىرەپ قويدى. مەكتەپتى ءبىتىرىپ العان سوڭ اتتەستات الۋدىڭ ءوزى ءبىر حيكايا بولىپ ەدى-اۋ. مەكتەپ بىتىرۋشىلەر اۋىل شارۋاشىلىعىنا قالدىرىلسىن دەپ، اتتەستاتتى ءبىراز كىدىرتىپ تاستادى. بۇل اۋىلدان تورعايعا كەلىپ، كەڭەسبەك اعايدىڭ ارالاسۋىمەن ازەر دەپ العانى بار. سودان بۇلار ءراشيت، ءسابيت ۇشەۋى امانقاراعاي كەلىپ، پوەزعا بيلەت الا الماي، اقىرى ءۇشىنشى كۇن دەگەندە الماتى قايداسىڭ تارتىپ وتىرىستى عوي. ەڭ قيىنى الماتىدا باستالدى. جالعىز ءتۇيىر ورىسپەن سويلەسىپ كورمەگەن اۋىل بالالارىنا استانانىڭ قازاعى دا ورىس، ورىسى دا ورىس كورىندى. مەكتەپتە ورىس ءتىلىنىڭ ديكتانتىن «5»-پەن «4»-كە جازاتىن-اق ەدى. ەندى سويلەسۋگە كەلگەندە كەكەش بالاداي جاسقانشاقتاي بەرەدى. سول كەزدە وزدەرىنىڭ باتىلدىقتارى كۇشتى دەيمىن...
تاۋ-كەن ينستيتۋتىنىڭ ءبىرىنشى كۋرسىنا تۇسكەننەن كەيىنگى بىرەر ايدا ورىس ءتىلىن بىلمەگەننەن كورگەن قورلىعى. ءبارى كوكىرەكتە سايراپ-اق تۇرادى. ايتۋعا كەلگەندە جوق. ايتەۋىر ماتەماتيكا ساباعىندا عانا راحاتتانىپ، وزدەرىن ادام سەزىنىسەتىن. گرۋپپاداعىلار اۋىلدان كەلگەن 4-5 بالانىڭ «يكس»تىڭ ورنىنا «يحس» دەگەندەرىنە ءماز بوپ كۇلىسەتىن. بۇلار بولسا، وعان نامىستانىپ، «قاپ، بالەم!» دەپ جۇرەتىندەرى ەسىنە تۇسكەندە، يبراگيم مىرس ەتىپ كۇلىپ جىبەردى.
— سەن دە ۇيىقتاماي جاتىرمىسىڭ؟ — دەپ تورەمۇرات بۇعان قاراي اۋدارىلىپ ءتۇستى. ەرتەسىنە تورەمۇراتتى وزەنگە اتتاندىرىپ سالعاسىن، يبراگيم ايدالادا قۇلازىپ قالعانداي بولدى. تورەمۇراتپەن بىرگە ستۋدەنت قاۋىمىنىڭ دۋماندى ورتاسى بۇعان ءبىرجولا قيماستىقپەن قوش ايتىپ بارا جاتقانداي. تانىمايتىن جەر. بەيتانىس ورتا. بەتتەرىن دالانىڭ اپتابى مەن ىزعىرىعى قاراقوشقىلداندىرىپ، جالپاق الاقاندارىن ءمۇيىز قاپتاعان وسىناۋ ادامداردىڭ سىرتقى ءتۇرى قانداي قاتىگەزدەۋ كورىنسە، ىشكى جان-دۇنيەلەرى دە سونشالىق دورەكى كورىنىپ كەتتى. «ءتۇۋ، نە دەگەن اقىماق ەدىم ءوزىم،— دەپ ويلادى ول كەشكىلىك جاتاقحانادان شىگىپ، پوسەلكە سىرتىنا قاراي بەتتەگەندە. — ءوزىم ەمەس پە ەم، ماڭقىستاۋعا بارام دەپ وتىرىپ العان. قازاقتىڭ قاي تۇكپىرى جاتسىنادى..."
كوكتەم ەركە مىنەزدى قۇبىلمالى عوي. كەشە شاڭ-توزاڭنىڭ ءبارىن ءبىرجولا قاعىپ-سىلكىپ الايىن دەگەندەي، اقپان-توقپان جەلدەتىپ، بۇرق-سارق بولىپ ەدى. بۇگىن تىپ-تىمىق. كۇنى بويى اينالانىڭ ءبارىن وزىمەن بىرگە ماسايراتىپ، جايماشۋاقتانىپ تۇر. جان-جاقتىڭ ءبارى ىڭعاي قاتقىل. تەك تەمىرقازىق بەتتە ءدوڭ توبەلەر كورىنەدى. توبەنىڭ كۇنگەي بوكتەرى كوگىستەنىپ قالعانعا ۇقسايدى. وتكەن جىلدىڭ بىتىك شىققان جۋسانى مەن بۇيىرعىنى، بالىق كوزى باستارى شاڭعا بوگىپ بوزارىپ، ءتۇپ جاعى ەندى-ەندى تەبىندەپ كەلەدى ەكەن. جىگىت جەڭىل پلاشىن يىعىنا سالىپ توبە باسىنا قاراي جۇرە بەردى. قالامپىر ءتۇستى شالبارىنىڭ بالاعى ءشوپ باسىنىڭ بوزامىق شاڭىنا كومىلىپ كەلەدى. كەڭپەيىل دالانىڭ قاننەن-قاپەرسىز جايباراقات كەلبەتى جىگىت جانىن بايسالدى بايىپتىلىققا باۋلىپ، ءون-بويىن جادىراتقانداي ەدى. كۇن كوزى باتار الدىندا التىن كىرپىكتەرىن جاۋدىراتا مولدىرەپ، قاس قاقپاي ءتۇر. جىگىت توبە باسىنا ورلەپ، ساحارانىڭ مۇناي مەن گاز ءيسى ءالى ءسىڭىپ ۇلگەرمەگەن ساۋمال سامالىنا بالعىن ءجۇزىن توستى.
كومانديروۆكا بىرەر كۇندىك دەپ شىققانمەن، جۇماعا جۋىقتاپ قالدى. اۋەلى قاراماندىباسقا، ودان اسارداعى ءۇش سۆاجيناعا سوقتى. سوڭعى ەكى كۇندە قاۋىندى مەن قوقىمبايدا بولىپ، قالاعا ورالعان بەتى. وسى نۇكتەلەردىڭ ءبارى — وڭتۇستىك ماڭقىستاۋداعى مۇناي فونتانىن بەرەدى دەگەن جاڭا الاڭدار. سەيسميكتەردىڭ يزوگيس كارتاسىنا كوز جۇگىرتسەك، بۇل الاڭداردىڭ قاي-قايسىسى دا مۇنايعا باي. ءقازىر ول جەرلەردە قانشالىق قور بار ەكەندىگىن بۇرعىشىلار زەرتتەۋدە. ماڭقىستاۋدىڭ اتاعىن شارتاراپقا ءماشھۇر قىلعان جەتىباي مەن وزەن مۇناي الاڭدارىنىڭ كارتاسىنا بارلاي قاراسا، بۇرىن بىلمەيتىن ادام تاڭ-تاماشا قالعان بولار ەدى. اسىرەسە، تاۋلىگىنە ميلليونداعان توننا مۇناي بەرىپ تۇرعان وزەننىڭ ورنالاسقان جەرى-اق قىزىق: كادىمگى ۇلتاراقتان اۋماعان الاڭ. الايدا عالىمدار وسىناۋ الاڭنىڭ بايلىق قورى تالاي ۇرپاقتارعا جەتەدى دەپ تۇجىرىمداۋدا. ال گەولوگتار مەن بۇرعىشىلاردىڭ نازارىن وزىنە قاداعان ونداعان بارلاۋ الاڭدارى شە؟! وندا ماڭقىستاۋ دالاسىنىڭ ءاربىر اتشاپتىرىم جەرى قالا بولار ەدى-اۋ... سول قالالاردىڭ تۇرعىندارى بۇگىنگى مىناۋ ات سابىلتىپ الاڭ ىزدەپ جۇرگەندەردى، الىپ مۇنارا استىنا الماس بۇرعىنى قاداعان سايىن ماڭداي تەردى قالاي سىپىرعاندارىن ەسكە الار ما ەكەن؟ ال وتىز بەس جاسقا يەك ارتقالى وتىرعانىنا قاراماستان، بۇدان ون شاقتى جىل بۇرىن ماڭقىستاۋ كەلگەندەگى ويىل قارا شاشىنا جاپاتارماعاي كۇمىس سىزاتتار تۇسە باستاعان مىنا جىگىتتى شە؟
ول ماشينا تەرەزەسىنەن تىمىق دالادا جاپالاقتاپ جاۋعان قارعا قاراپ كەلەدى. ءۇلپا قار ۇستى-ۇستىنە باستىرمالاتىپ، تەرەزە اينەگىنە قاقتىعىسىپ تارامدانا بەرگەن سوڭ، تازارتقىش تەتىگىن بۇراپ قويدى. سونسوڭ «دۇرىس پا» دەگەندەي شوفەر جىگىتكە قاراپ كۇلىمسىرەدى.
دالا بالاپان باۋىرىنداي ۇلپىلدەپ جاتىر. بيىلعى العاشقى قار. وتكەن جىلى دا كوپكە دەيىن قارا قاتقاق بولىپ، قاڭتار تۋىسىمەن قار دۇرمەك جاۋدى دا، ارتى ماڭقىستاۋ ەلى كورمەگەن قىسقا اينالدى. سكۆاجينالار توقتاپ، اۋە قاتىناسى دا، جول قاتىناسى دا بىتەلىپ قالدى. ەكى ءجۇز شاقىرىم جەردەگى ءۇستىرت تۇگىلى، وسى تۇرعان اسارعا بۇرعىلاۋ قۇرالدارىن جەتكىزۋدىڭ ءوزى كۇشكە ءتۇستى ەمەس پە... ءبىراق بۇرعىلاۋ جۇمىسىن قاقاعان قىسىڭ دا، اپتاپ ىستىعىڭ دا توقتاتۋعا ءتيىس ەمەس. اسىرەسە، بوران-ايازداردا دولوتونى اۋىستىرۋدىڭ قيىندىعىن ايتساڭشى! ەرتىندىگە مالمانداي بولىپ، ءداۋ تەمىر ترۋبالاردى الىپ-سالىپ جاتقان بۇرعىشىلاردى كورگەندە، دۇنيەدەگى ەڭ قۇدىرەتتى ادامدار وسىلار ما دەپ قالاسىڭ. ماڭقىستاۋدىڭ ەڭ كورنەكتى جەرىنە ەسكەرتكىش ورناتار بولسا، سولارعا — بۇرعىشىلارعا ورناتۋ كەرەك دەر ەدى. گەولوگ-بۇرعىشىنىڭ كوزى دەسەدى. راس، ارينە. گەولوگسىز بۇرعىلاۋ — «سوقىر تەكە» ويناعان بالانىڭ ويىنىمەن تەڭ. ءبىراق، بۇرعىلاۋ جۇمىستارىنىڭ بەينەتىنە ءتوزۋ — كەز-كەلگەننىڭ قولىنان كەلە بەرمەيدى-اۋ. يبراگيمنىڭ ويىن شوفەر ءبولدى.
— شىنىمەن، جاڭا جىلدى جول ۇستىندە قارسىلايمىز با؟ — دەپ گازدى باسىڭقىراپ قويدى.
— ە، باسە، باعانادان بەرى وسىلاي دەمەيسىڭ بە؟ — يبراگيم دە ريزا پىشىندە ەدى. تاريحتىڭ تاعى ءبىر پاراعى اۋدارىلدى. ۋاقىت قالاي تەز وتەدى، ءا؟ وتكەن جىل ەستە قالار نە اكەلدى؟ قانداي ءىس تىندىردى اۋىزعا الار؟ ماڭقىستاۋ بۇرعىلاۋ جۇمىستارى ترەسىنىڭ ءوزى باسقاراتىن گەولوگيا بولىمىندە ءبىرشاما جۇمىستار ىستەلدى. وسى تۇبەكتە اشىلعان الاڭدار، ءونىم بەرە باستاعان كاسىپشىلىكتەر — ءبارى دە گەولوگتاردىڭ تارازىسىنان وتكەن ىستەر. بولىمگە جاس ماماندار كەلدى. وقۋ بىتىرگەن جەرگىلىكتى كادرلار. وسىنىڭ ءوزى قانشاما قۋانىش! بۇرىن مامان كادرلاردىڭ كوبى ازەربايجاننان، تاتاريادان، كاۆكازدان كەلگەندەر بولاتىن. كادر تۇراقتاماۋشىلىق، بىرەر جىل تابىس تاۋىپ كەتىپ قالۋ دەگەندەردىڭ ءبارى سول جەرگىلىكتى كادرلاردىڭ جەتىسپەۋىنەن ەدى عوي. ەڭ باستىسى — سوناۋ تۇرىكپەنمەن شەكتەسىپ جاتقان ۇستىرتكە بۇرعى قادالدى. ۇستىرتكە العاشقىلار بولىپ اتتانعان بۇرعىشىلار جولداس، ۆيكتور بورشش، سۇيەگەن سالمانوۆ، نيكولاي تارابريندەردىڭ كەلبەتى ەلەستەدى... ءوز ومىرىندەگى ءبىر قۋانىش — اسپيرانتۋراعا سىرتتاي وقۋعا ءتۇستى. ماڭقىستاۋدا بۇرعىلاۋ-بارلاۋ جۇمىستارىنىڭ ەرەكشەلىكتەرىن زەرتتەپ جازباق. پارتيا قاتارىنا ءوتتى. جاستارمەن جۇمىس — مۇنىڭ پارتيالىق تاپسىرماسى. جەتىبايدا جۇمىس ىستەگەن ءتورت جىلدا قاتارىنان كوميتەت مۇشەسى بولىپ، كەيىن كومسومول جۇمىسىنا اتسالىسقانى ءۇشىن ۆلكسم ورتالىق كوميتەتىنىڭ قۇرمەت گراموتاسىمەن ناگرادتالعانى بار.
جولدىڭ سول جاق قاناتىندا سامساعان گاز شىراقتارىمەن تەڭگە كاسىپشىلىگى كورىندى. بۇل — ماڭقىستاۋداعى ەكىنشى گاز كاسىپشىلىگى. ءبىرى جەتىبايدا. بۇل تۇبەك تەك مۇنايدىڭ عانا ەمەس، باسقا دا سان الۋان بايلىق كوزى بولىپ وتىر. سونىڭ ءبىرى — وسى تابيعي گاز. بۇل ماڭنىڭ تۇرعىندارى وزەن قالاسىن ءالى كۇنگە دەيىن «گاز-قالا» دەپ اتايدى. ويتكەنى و باستا بۇل جەردەن ۇلكەن گاز كاسىپشىلىگى قۇرىلادى دەلىنگەن ەكەن. بەرتىن كەلە مۇنايدىڭ مول قورى تابىلعان سوڭ، مۇناي كاسىپشىلىگى اشىلدى دا، گاز ءوندىرىسى سوعان قوسىلدى. جەلسىز تىمىق اۋادا گاز شىراقتارى مازداي الاۋلاپ تۇر.
سونسوڭ ول بۇگىنگى جاڭا جىل كەشىنە ازىرلىك ۇستىندەگى ءۇي-ىشىن ەلەستەتتى. ءۇي-ىشى بولعاندا ايناش پەن كىشكەنە اسەلى عوي. ايناش ەندىگى شىرشا قۇرىپ ۇلگەرگەن بولار. ماڭقىستاۋعا شىرشا اعاشىنىڭ كەلە باستاعانى دا بيىل عانا. وندا دا تالاسىپ-تارماسىپ كەزەككە تۇرىپ الاتىن ايناش.
— جىلدا قوناقتىق دەيمىز، كەش دەيمىز، بيىل ءبىر ءوز ۇيىمىزدە قارسىالايىق تا، — دەپ شىرشا قۇرۋعا «باستاما» كوتەرىپ جۇرگەن دە سول. وتكەندە يبراگيم ءوزى گۋريەۆكە كومانديروۆكاعا بارعاندا، شىرشاعا ىلەتىن ءتۇرلى ويىنشىقتار الا كەلگەن-دى... سونداعى ايناشتىڭ قۋانعانىن كورسەڭ! وزدەرى ءوز بولىپ، سەميا قۇرعالى اسەلدى ورتاعا الىپ، جاڭا جىلدى قارسى الاماق ەدى. ساعات ءتىلى ىلگەرى باسقان سايىن ايناش ىشتەي: «بۇگىن كەلمەيتىن رەتى جوق ەدى، ساۋ بولسا جارار ەدى»، — دەپ، سويلەپ قويىپ، بىلدىرلاعان اسەلگە: «ءقازىر پاپا كەلەدى!»— دەپ مازاسىزدانىپ جۇرگەن شىعار. ول قولىنداعى ساعاتىنا ءۇڭىلدى. سىرتىنان سابىرلى بولعانمەن، گەولوگ جىگىت تە، ءوزى سياقتى، ۇيىنە جەتۋگە اسىعىپ كەلە جاتقانىن شوفەر دە سەزگەندەي ەدى.
— مىنا فاكەلدەردى سوندىرۋگە بولماي ما وسى؟ قىسى-جازى مازدايدى دا تۇرادى عوي.
شوفەر قالىپ بارا جاتقان گاز شىراقتارىن مەڭزەدى.
— جوق، ولاردى سوندىرۋگە بولمايدى، — دەپ يبراگيم دالاعا قاراپ ءبىراز وتىردى دا: — ولار سونبەيدى... ءومىر شىراقتارى عوي، — دەپ كۇبىرلەدى.
شوفەر شالا ەستىدىم بە دەگەندەي ءبىرقىرىن وتىرگان وعان جالت قارادى دا، ۇندەگەن جوق. باعاناعى ۇستى-ۇستىنە جاپالاقتاعان قار ەندى سايابىرلايىن دەدى. جەلتوقساننىڭ سوڭعى ءتۇنى مايدا، بيازى ەدى. ءبۇلار اسفالت جولدىڭ بويىمەن شىعىسقا قاراي ءسال ويىسقاندا، الدىڭعى جاقتان وزەن قالاسىنىڭ وتتارى جىمىڭداي جارقىرادى.
You Might Also Like
-
الگىندە عانا تەگىس الاڭنان كوتەرىلگەن اقشاڭقان سامولەت تىمىق اۋانىڭ كوگىلدىر ايدىنىندا جىلجىپ كەلەدى. كوك تەڭىزدىڭ تاكاببار تولقىندارىن تىلگىلەگەن مۇزجارعىش سەكىلدى وسىناۋ شەتسىز دە، شەكسىز كەڭىستى...
-
تالاس اۋداندىق اتقارۋ كوميتەتى پرەدسەداتەلىنىڭ ورىنباسارى بەكزادا ورازبەكوۆانىڭ مال وتارلارىن ارالاپ شىققانىنا ءۇشىنشى كۇن. اۋداندىق پارتيا كوميتەتىنىڭ ەكىنشى سەكرەتارى راحىجان ەرسەيىتوۆ بەكزادانىڭ ...
