InfoHub Logo

ىرعىزدىڭ وڭتۇستىگىنە قاراي اتتاساڭ، ارقاداعى كوك وراي شالعىن ەركەلەتىپ تاستاعان كوزىڭ بۇرىنعىلارىن كورۋ جوق. سۇر كىلەم سياقتى جازىلىپ جاتقان مەڭىرەۋ ءشول. ءار جەرىنەن كىرلى كويلەك كورىنىپ تۇراتىن، توزعان، جىرتىق جاماۋلى سۇر شەكپەنمەن كيىلگەن دالانىڭ ءۇستىن بىرەۋ جاۋىپ قويعان سياقتى. شەكپەننىڭ انا جەرىن وتقا، مىنا جەرىن قاراماي تيگىزىپ، انا جەرىنىڭ ءجۇنىن ۇيپالاپ بىرەۋ اۋرەلەپ قويعان سياقتى. ۇيپالانعان ءجۇننىڭ ىشىندە اڭ-ماڭ دا كورىنبەيدى، بايقاپ قاراعاندا عانا كوزىڭە ءبىر نارسە ىلىنەدى.

جەرى سورعا باي، توپىراعى اششى، تۇزدىقتىڭ بەتى سياقتانىپ قايماقشىپ جاتادى. ۇستىندە ءتىس شۇقىرلىق ءشوپ جوق. جاڭا عانا شاشىن الدىرعان تازدىڭ باسى سىقىلدى. اينالا سۇر جۋسان، بۇيرا قۇم، ءبىراق ارقاداعى ءيىستى كوك جۋسانداي ەمەس، جىڭىشكە اۋرۋ بولعان ادام سەكىلدى قاتىپ قالعان. سور جاعاسىندا جەرگە جابىسىپ، تىربىسىپ جاتقان قىنا، جازىلىپ جاتقان كيىك وتى.

ماڭايىنداعى اۋانىڭ ىلعالىن تۇز «ءا» دەگەنشە تارتىپ الادى، دەم الۋ قيىندالىپ، تىنىس تارىلادى. ۇيرەنبەگەن ادام مەن كولىك تەز شارشاپ، ءالى قۇريدى. جازعىتۇرى، كۇزدى كۇنى جاڭبىر باستالعاندا، جەر ىركىلدەپ، ويىلىپ كەتەدى. مۇنىڭ ارتىنان كەۋىپ، تۇس-تۇسىنا جارىلادى، تاس بولىپ قاتىپ قالادى. كەلەسى جىلى جازعىتۇرى سۋ جارىقپەن اعىپ، كەڭىتىپ، قۇلاتىپ، ساي قىلادى، جان-جاعىنا تاعى اشالار شىعادى، كەي جەرلەر اڭعار بولىپ قالادى، كەي جەرلەردىڭ جارىعى لاي باتپاقپەن سىلانىپ، تەگىستەلىپ، بىتەلىپ قالادى. سونداي تەگىستەلىپ قالعان جەرلەر عانا جارىقسىز بولادى. ءبىر ءشوپ يا ءبىر بۇتاعا سۇرىنەمىن دەپ قورىقپاسىن، اسىق ويناۋعا كەلەتىن تاپ-تازا!

جول تابانى الدەقاشان تاپتالىپ، قاتىپ قالعان، كولىكتىڭ تۇياعىنا تيگەندە تاسىرلاپ وتىرادى، تەمىر تەگەرمەشتى اربالاردىڭ دا ءىزى بىلىنبەيدى. ويىلىپ قالعان جول بۇراڭداپ سوعادى دا وتىرادى. بۇرىلىپ شىعىپ كەتۋ دە وڭاي جۇمىس ەمەس.

---