تاۋسىلمايتىن اڭگىمە
بالا اپاسى مەن كوكەسىنىڭ ۇيىندە ءجۇردى. وسى كىسىلەرگە تاڭعالادى. اڭگىمەلەرى ءبىر تاۋسىلمايدى. ۇنەمى جاراسىپ وتىرادى.
وسى ۇيدە تۇراتىن اعا-اپكەلەرى ۇستەل باسىنان تۇرىپ كەتكەننەن كەيىن دە، كوكەسى مەن اپاسى شايىن ءىشىپ، اڭگىمەلەسىپ وتىرا بەرۋشى ەدى.
بالا ءوزىنىڭ اكە-شەشەسى تۋرالى ويلادى. قىسقا كۇندە قىرىق ۇرسىسادى.
سالدەن كەيىن كوكەسى شايىن ءىشىپ بولىپ ورنىنان تۇردى. اپاسى كوكەسىنە جىلى جۇزبەن قارايدى:
"بايقا، بەلىڭدى اۋىرتىپ الما".
بالا اپاسىنىڭ سوزىنە كۇلىپ جىبەرە جازدادى. بەلىن اۋىرتىپ الاتىنداي بۇل كىسى قارتايىپ تۇرعان نەمەسە ناۋقاس ادام ەمەس قوي. ءبىراق اپاسى وسى ءسوزدى ايتۋى مۇڭ ەكەن، كوكەسى بەلىن ۇستاعان كۇيى بۇكىرەيەدى دە قالادى. بالا كوكەسىنىڭ وسى قىلىعىنا تاڭعالادى.
قۇلاعىنا ءوزىنىڭ اكە-شەشەسىنىڭ داۋىسى كەلدى:
- مەنى دە ءبىر تۇسىنسەڭ قايتەدى؟!
- وسى، ۇيگە كەلگەندە سەنىمەن ۇرىسپاي-اق قويايىنشى دەپ كەلەم!.. سەنى
كورسەم!..
- سەن تەك سالعىلاسۋدى عانا بىلەسىڭ!..
وسى داۋىستاردى ەستىگىسى كەلمەگەندەي قۇلاعىن باستى.
- ءاي، الكەن، نەگە قۇلاعىڭدى باسىپ وتىرسىڭ؟!
اپاسىنىڭ داۋىسىن ەستىدى.
- بىلاي تۇر، كوكەڭ ءسۇرىنىپ كەتىپ جۇرمەسىن.
اپاسىنىڭ سوزىنە كۇلكىسى كەلدى. ءسۇرىنىپ كەتەتىندەي ول كىسى ءبىر ناۋقاس كىسى ەمەس قوي. ونىڭ ۇستىنە كوكەسى بۇل وتىرعان جەرگە دەيىن جەتەمىن دەگەنشە، بۇل ءۇش تۇرىپ، ءۇش وتىرار.
كوكەسىنىڭ جۇرىسىنە قاراپ وتىرىپ مىرس ەتىپ كۇلدى. بەينە ءبىر مۇز ۇستىندە تايعاناقتاپ كەلە جاتىرعان جانداي قىبىر-قىبىر ەتەدى...
"قالاي-قالاي ىستەيدى، ءا؟!"
كوكەسى ءقازىر اۋلاعا شىققاننان كەيىن شاپقىلاپ كەتەدى. اۋلاداعى بارلىق جۇمىستاردى تىندىراتىن - وسى كىسى.
ەسىنە تەلەديداردان ەستىگەن سوزدەرى ءتۇستى. "ەرلى-زايىپتى جانداردىڭ جاراسىمدى تاتۋلىعى ءۇشىن ولاردىڭ جان ۇيلەسىمدىلىگى ءبىرىنشى ورىندا تۇرادى".
"سوندا اپاسى مەن كوكەسى جانى ۇيلەسكەن كىسىلەر بولعانى ما؟ ال اكەسى مەن شەشەسى شە؟.."
قۇلاعىنا تاعى دا اكە-شەشەسىنىڭ داۋىسى كەلدى:
- مەنى دە ءبىر تىڭداساڭ قايتەدى؟..
- سەنىڭ تىڭدايتىنداي ءجونى ءتۇزۋ ءبىر اڭگىمەڭ بار ما؟..
بالا تاعى دا الاقانىمەن قۇلاعىن باستى.
You Might Also Like
-
پەداگوگيكادا ءوزىن-وزى دامىتۋدىڭ ءرولى ماڭىزدى ءارى قاجەت. ويتكەنى، بۇل پەداگوگقا ءومىردىڭ ءار سالاسىنداعى بىلىمدەرىن جەتىلدىرۋگە مۇمكىندىك بەرەدى، ال ول، ءوز كەزەگىندە، ارينە، وقۋشىلاردان كورىنىس تابادى.
-
ەرتەدە بارلىق ءسىبىردى بيلەپ-توستەپ جۇرەتىن ءبىر بايقال دەگەن باي ادام بولىپتى. ونىڭ بايلىعىنا قوسا، اق دەگەنى العىس، قارا دەگەنى قارعىس ەكەن. بايلىعىنا باتىرلىعى ساي بولىپ، بارلىق ءسىبىردى اۋزىنا قار...
