وقىتۋشى مەن ستۋدەنتتەر
- مەنى جۇرت قاتال وقىتۋشى دەپ ايتادى، - دەيدى وقىتۋشى. - ستۋدەنتتەرىن قينايدى دەيدى، ولارعا قويمايدى دەيدى. مۇنداي اڭگىمەلەر ءوزىمنىڭ دە قۇلاعىما جەتىپ جاتادى. ءتىپتى بىردە رەكتورعا دەيىن جەتىپتى. "وركەن، سەنى جۇرت سولاي دەپ ايتىپ ءجۇر عوي، نەگە ستۋدەنتتەرىڭدى قينايسىڭ؟" - دەدى رەكتور. "وندا ساباق سۇراماستان قويىپ بەرە بەرەيىن"، - دەدىم. "مەن ولاي دەپ تۇرعان جوقپىن، - دەدى رەكتور. - ءبىراق ستۋدەنتتەر دە ادام بالاسى عوي. كىشكەنە تۇسىنىستىكپەن قاراساڭدار بولماي ما؟"
بىردە ءبىر قىزىق وقيعا بولدى. جازعى ۋاقىت ەدى. جازعى سەسسيانىڭ باستالعان كەزى. وقۋ ورنىنان شىعىپ، جاياۋ جۇرگىنشىلەر جۇرەتىن سوقپاققا ءتۇسىپ الىپ كەلە جاتقانمىن. ءبىر كەزدە جولدىڭ جيەگىندە وتىرعان ءبىر كەلىنشەككە كوزىم ءتۇسىپ كەتتى. الگى كەلىنشەكتىڭ ءتۇرى دەگەن ابدەن ءابىرجىپ كەتكەن. ءوزى جەرگە توسەلىپ، جايعاسىپ وتىرىپ الىپتى. جانىنا ەرىكسىز ايالدادىم. تۇرىنە قاراپ اياپ كەتتىم.
- قارىنداس، - دەيمىن الگى كەلىنشەككە، - ءتۇرىڭىز نەگە سونشا ءابىرجىپ كەتكەن؟ نە جاعداي بولىپ ەدى؟
- اۋىلدان كەلىپ ەدىم، - دەيدى كەلىنشەك. - مىنا وقۋ ورنىنىڭ سىرتتاي بولىمىندە وقۋشى ەدىم. ءبىر وقىتۋشىنىڭ ساباعىنان الا الماي ابدەن ءابىرجىپ كەتكەنىم.
قانىم باسىما شىقتى. "ول نەعىلعان وقىتۋشى؟! ادام دەگەندى وسىنداي كۇيگە تۇسىرۋگە بولا ما؟! بۇل دا ءبىر قازاقتىڭ بالاسى عوي. الگى وقىتۋشىڭ دا وسىنداي انادان تۋعان شىعار؟!"
- قارىنداس، - دەيمىن الگى كەلىنشەككە يىلە ءتۇسىپ. - مەن دە وسى وقۋ ورنىندا وقىتۋشى بولىپ جۇمىس ىستەيمىن. مۇمكىن الگى وقىتۋشىنى تانيتىن شىعارمىن. فاميلياسى كىم ەدى؟ اۋ، وعان ەل بولىپ، حالىق بولىپ جابىلىپ ءجۇرىپ تۇسىندىرەيىك. ادام دەگەندى وسىنداي كۇيگە تۇسىرۋگە بولا ما؟
سويتسەم، الگى كەلىنشەكتىڭ ايتقانى:
- ول - ءسىز، - دەيدى.
شوشىپ كەتتىم. مەن وزىمشە ستۋدەنتتەرىمدى بىلىمگە، ىزدەنىسكە جەتەلەدىم دەپ ويلاپ ءجۇرمىن. سويتسەم، ولار وسىنداي كۇيگە ءتۇسىپ كەتكەن ەكەن عوي.
دەرەۋ شەشىمگە كەلدىم.
- توپقا ايتىڭىز. ەرتەڭ ءدارىسحانادا جينالىپ وتىرسىن. مەن كەلەمىن، - دەدىم.
ەرتەڭىنە كەلدىم دە، ساباق سۇراماستان بارىنە قويىپ جىبەردىم. ماز-مەيرام بولدى دا قالدى. ءوزىمنىڭ دە ارقامنان ءبىر اۋىر جۇك ءتۇسىپ قالعانداي بولدى. ادامعا جاقسىلىق جاساعان دەگەن قانداي جاقسى!
مۇنىڭ تاعى دا قىزىعى بار. ەندى كەلەسى جىل كەلەدى عوي. كەلەسى كۋرس تا جىلجىپ الدىما كەلەدى. ولار دا مەنىڭ ساباعىمدى وقيدى. ءدال تاپسىراتىن كۇنى ءدارىسحاناعا كىرەم عوي. ويىمدا ەشتەڭە جوق، ستۋدەنتتەرگە:
- قالاي، دايىنسىڭدار ما؟ - دەيمىن.
سويتسەم، الگىلەر:
- دايىنسىڭدار ما دەگەنشە، وداندا قويىپ جىبەرمەيسىز بە؟! - دەيدى.
"مىنالاردىڭ ەستەرى دۇرىس پا؟ - دەيمىن وزىمە-وزىم. - الدە اقىلدارىنان اداسايىن دەگەن بە؟ ءاي جوق، ءشاي جوق، ماعان ەدىرەڭدەگەندەرى نەسى؟"
ومىرىمدە ستۋدەنتتەرىم بۇلاي سويلەپ كورمەگەن عوي.
- سەندەردىڭ ەستەرىڭ دۇرىس پا؟ مەن سەندەرگە نە دەپ قويىپ جىبەرۋىم كەرەك؟! كوزدەرىڭدى اشىڭدار. الدارىڭدا وقىتۋشىلارىڭ تۇر. سەندەر وزدەرىڭنىڭ ستۋدەنت ەكەندىكتەرىڭدى ۇمىتتىڭدار ما؟!
سويتسەم، انالار دا ايىلىن جياتىن ەمەس.
- نە، بىلتىرعى ستۋدەنتتەرگە قويىپ جىبەرىپسىز عوي! ءبىز توقالدان تۋدىق پا؟! - دەيدى.
سول كەزدە بارىپ ماڭدايىمدى الاقانىممەن سارت ەتكىزىپپىن. مەن وزىمشە جاقسىلىق جاسادىم دەپ ءجۇرمىن. سويتسەم، الگىلەر جۇگىرىپ بارىپ تومەنگى كۋرسقا جەتكىزە قويعان ەكەن عوي. ءبىر ەسالاڭ وقىتۋشىنى تاۋىپ الدىق دەگەن شىعار، ساباق سۇراماستان قويىپ بەرە بەرەتىن.
ايعايدى سالدىم كەلىپ:
- بويلارىڭدى جيناپ ۇستاڭدار! سەندەر تىم ەركىنسىپ بارا جاتىرسىڭدار عوي! مەن - وقىتۋشىمىن! كانە، ساباقتارىڭا دايىندالىڭدار!
- سودان بەرى، - دەپ كۇلدى وقىتۋشى. - قايتادان قاتال مىنەزىمدى تاۋىپ العانمىن.
You Might Also Like
-
XIII عاسىر يسلام الەمىندە قاسىرتەتتەرگە تولى جىلدار بولدى. تاياۋ شىعىس، ازيا جانە انادولۋ ولكەلەرىندە قىرعىندارعا سەبەپ بولعان كرەستىك جورىقتار مەن موڭعول شاپقىنشىلىقتارى مۇسىلمانداردى جويىلۋدىڭ قار...
-
جانۋار جانە وسىمدىك تاعامدارىندا بىزگە جات اقۋىزدار بولادى. ولار اللەرگەنگە اينالعاندا، كەيبىر تاعامداردان باس تارتۋعا ءماجبۇر بولامىز. «تاعام اللەرگياسى» دەگەن تەرمين بەلگىلگى كلينيكالى...
