پاۆلوداردا رەسپۋبليكالىق كونفەرەنسياعا 12 مىڭنان اسا اتا-انا قاتىستى
ەرتىس ءوڭىرىنىڭ مەكتەپتەرىندە «ءححى عاسىردىڭ قازاقستاندىق اتا-انالارى: «ءوز بالاڭا ۇلگى بول!» تاقىرىبىندا وتكەن رەسپۋبليكالىق كونفەرەنسياعا 12 مىڭنان اسا اتا-انا قاتىستى، دەپ حابارلايدى Bnews.kz ءتىلشىسى.
وتباسى كۇنى اياسىندا ۇيىمداستىرىلعان شارا وبلىستىڭ 389 مەكتەبىندە ءوتتى. اتا-انالار مەن پسيحولوگتار وبلىس ورتالىعىنداعى №16 مەكتەپتە باس قوستى. وڭىردەگى ءبىلىم باسقارماسى باسشىسىنىڭ ورىنباسارى ەرنۇر داۋەنوۆتىڭ مالىمەتىنشە، اكسياعا وبلىستىڭ بارلىق مەكتەپتەرى جاپپاي قاتىسىپ، بەلسەندىلىك تانىتقان.
«بىلتىر اتا-انالار كونفەرەنسياسىنا وبلىستىڭ بىرنەشە مەكتەبى عانا قاتىسسا، بيىل بارلىق ءبىلىم وشاعى قامتىلىپ وتىر. مەكتەپ تابالدىرىعىن العاش اتتاعان بۇلدىرشىندەردىڭ اتا-انالارىنا باسا نازار اۋدارىلىپ، پەداگوگيكالىق جانە پسيحولوگيالىق كومەك كورسەتۋگە تىرىستىق»، - دەيدى ەرنۇر داۋەنوۆ.
اۋقىمدى شاراعا ق ر بعم وكىلى، استانا قالاسى وتباسى تاربيەسى ورتالىعىنىڭ جەتەكشىسى اينۇر ءومىروۆا قاتىستى. مامان ءبىرىنشى سىنىپتا وقيتىن بالعىنداردىڭ اتا-انالارىنا تۇشىمدى كەڭەس بەرىپ، سۇراقتارىنا جاۋاپ بەردى.
اينۇر ءومىروۆانىڭ ايتۋىنشا، قازىرگى تاڭدا اتا-انالاردىڭ كوبى جۇمىسقا بەرىلگەن، سول سەبەپتى بالا مەن اتا-انا اراسىنداعى قارىم-قاتىناس قيىنداي تۇسەتىنى انىق.
«مەكتەپ تابالدىرىعىن العاش اتتاعان ۇل-قىزدارعا پسيحولوگيالىق قولداۋ اۋاداي قاجەت. وقۋ ۇردىسىنە بەيىمدەلۋ كەزىندە بالالارعا كوڭىل ءبولۋ كەرەك. بالالار مەكتەپكە بارىپ جۇرگەن كەزدە ۇرەيلەنىپ، قورقۋى دا مۇمكىن. سوندىقتان، ءبىزدىڭ باستى ماقسات – بالالار مەن اتا-انالارعا كەڭەس بەرىپ، قولداۋ كورسەتۋ. ماسەلەن، استاناداعى وتباسى تاربيەسى مەكتەبىنە كۇنبە كۇن 25 اتا-انا كەلەدى. ءبىز ولارعا بالانى ءبىلىم الۋعا باۋلۋ، قورقىنىشتارىن جەڭۋ سياقتى كەڭەسىمىزدى ايتامىز»، - دەيدى اينۇر ءومىروۆا.
ورتالىق جەتەكشىسىنىڭ ايتۋىنشا، قازىرگى تاڭدا اتا-انالار بالانىڭ پسيحولوگياسىنا اسەر ەتۋدىڭ قاراپايىم تەحنيكالارىنان بەيحابار. سول سەبەپتى مەكتەپ پسيحولوگتارىنىڭ كومەگىنە جۇگىنگەن ابزال.
ايتا كەتەيىك، بيىلعى جاڭا وقۋ جىلىندا پاۆلودار وبلىسىندا 12 مىڭ 750 ۇل-قىز مەكتەپ تابالدىرىعىن اتتادى. جالپى، مەكتەپتەردە 97 مىڭنان استام وقۋشى ءبىلىم الادى، بۇل – بىلتىرعىعا قاراعاندا 5 مىڭ بالاعا ارتىق.
ءبىلىم بەرۋ ۆەدومسۆوسىنىڭ اقپاراتىنشا، وڭىردە پسيحولوگ ماماندار جەتكىلىكتى.
You Might Also Like
-
سوڭعى ۋاقىتتا ءمۇعالىم بولعىسى كەلەتىندەردىڭ قاتارى سيرەپ بارادى. بىلىكتى پەداگوگتاردىڭ تاپشىلىعى اۋىلدا عانا ەمەس، قالادا دا ايقىن اڭعارىلا باستادى، دەپ جازادى «تۇركىستان» گازەتى.
