پەداگوگ ماماندىعىن تاڭداعان «التىن بەلگى» يەگەرلەرى ەكى ەسەگە ارتقان
پەداگوگ ماماندىعىن تاڭداعان «التىن بەلگى» يەگەرلەرى ەكى ەسەگە جۋىق ۇلعايدى. بۇل تۋرالى ءبىلىم جانە عىلىم مينيسترلىگىنىڭ القا ماجىلىسىندە ۆەدومستۆو باسشىسى اسحات ايماعامبەتوۆ ايتتى.
«بىلتىردان باستاپ پەداگوگيكالىق كادرلاردى دايىنداۋدى ارتتىرۋ ماقساتىندا جوعارى وقۋ ورىندارىنا قابىلداۋ تالاپتارىن دا كۇشەيتتىك. وسى پەداگوگيكالىق ماماندىققا مىقتى تۇلەكتەردى عانا قابىلداۋ ءۇشىن ۇلتتىق ءبىرىڭعاي تەستىلەۋدىڭ بۇعان دەيىنگى شەكتى بالى 50 بولسا، ءقازىر ونى 75 بالعا دەيىن كوتەردىك. ال وسى ماماندىققا ءتۇسۋدى ىنتالاندىرۋ ءۇشىن بولاشاق پەداگوگتاردىڭ شاكىرتاقىسى جوعارىلادى، ءقازىر ول 42 مىڭ تەڭگە»، - دەدى ا. ايماعامبەتوۆ.
وسى ورايدا ول بۇل قادامدار وڭ ناتيجە بەرىپ جاتقانىن اتاپ ءوتتى.
«پەداگوگ ماماندىعىن تاڭداعان «التىن بەلگى» يەگەرلەرى ەكى ەسەگە جۋىق ۇلعايدى. وسى ماماندىققا تۇسۋشىلەردىڭ ورتاشا بالى 90-عا دەيىن جەتتى. بۇل ءمۇعالىم ماماندىعىنا مىقتى كادرلاردىڭ كەلۋىن قامتاماسىز ەتەدى. وسى رەفورمانىڭ وڭ ناتيجەسىن كورىپ وتىرمىز جانە بۇل باعىتتاعى جۇمىستاردى جالعاستىرۋ كەرەك»، - دەدى ۆەدومستۆو باسشىسى.
بۇدان بۇرىن حابارلانعانداي، مينيستر پەداگوگتاردى ءتان ەمەس قىزمەتتەرگە ءارى كوزدەلمەگەن ەسەپتەرگە تارتۋدان بوساتۋ شارالارى قابىلدانعانىن ايتتى.
You Might Also Like
-
جوعارى وقۋ ورىندارى پەداگوگتارىنىڭ جالاقىسى وتە تومەن. بۇل تۋرالى ءبىلىم جانە عىلىم مينيسترلىگىنىڭ القا ماجىلىسىندە ۆەدومستۆو باسشىسى اسحات ايماعامبەتوۆ ايتتى.
-
وقۋلىقتاردى ىرىكتەۋ راسىمىنە قويىلاتىن تالاپتار قاتاڭداتىلدى. بۇل تۋرالى ءبىلىم جانە عىلىم مينيسترلىگىنىڭ القا ماجىلىسىندە ۆەدومستۆو باسشىسى اسحات ايماعامبەتوۆ ءمالىم ەتتى.
