InfoHub Logo

پەداگوگ ماماندىقتارىنا تۇسەتىن تالاپكەرلەر ءۇشىن شەكتى بالل بيىل تاعى جوعارىلايدى. بۇل تۋرالى قازاقستان رەسپۋبليكاسىنىڭ ءبىلىم جانە عىلىم ءمينيسترى اسحات ايماعامبەتوۆ پەداگوگيكالىق جوعارى وقۋ ورىندارىنىڭ ستۋدەنتتەرىمەن كەزدەسۋى بارىسىندا ءمالىم ەتتى.

كەزدەسۋدە اسحات ايماعامبەتوۆ جوعارعى وقۋ ورنىنا پەداگوگ ماماندىقتارى بويىنشا تۇسۋدە شەكتى بالل جوعارىلايتىندىعىن حابارلادى. ماسەلەن، 2019 جىلى پەداگوگيكالىق ماماندىقتارعا تۇسۋگە شەكتى بالل 60 بالعا دەيىن وسكەن. ەندىگى كەزەكتە 2020 جىلى شەكتى مەجەنى 70 بالعا دەيىن كوتەرۋ جوسپارلانۋدا.

«بۇگىنگى تاڭدا ەڭ ۇزدىك مەكتەپ تۇلەكتەرىنىڭ اراسىندا ءمۇعالىم ماماندىعى ايتارلىقتاي سۇرانىسقا يە بولماي وتىر. وسى رەتتە تالاپكەرلەر تاراپىنان دايارلاۋدىڭ پەداگوگيكالىق باعىتتارى سيرەك تاڭدالىپ جاتادى. ءبىلىم بەرۋ گرانتتارىن تاعايىنداۋ كونكۋرسىنا قاتىسۋ ءۇشىن ءوتىنىش بەرگەن كەزدە تالاپكەرلەر كوبىنەسە پەداگوگيكالىق باعىتتاردى ءۇشىنشى جانە ءتورتىنشى قىلىپ كورسەتەدى»، - دەدى مينيستر.

ۆەدومستۆو باسشىسىنىڭ ايتۋىنشا، تالاپكەرلەردى پەداگوگيكالىق ماماندىقتارعا تارتۋ ءۇشىن وتكەن جىلى ق ر بعم-مەن ءبىرقاتار ناقتى شارالار قابىلداندى.

بۇدان بولەك، مينيستر 2021 جىلدان باستاپ جوعارى وقۋ ورىندارىنىڭ مەملەكەتتىك ۇلگىدەگى ەمەس، جەكە ۇلگىدەگى (اسكەري جانە ارنايى وقۋ ورىندارىن قوسپاعاندا) ديپلوم بەرۋى تۋرالى نورما كۇشىنە ەنەتىنىن ايتتى. بۇل جوعارى وقۋ ورىندارى اراسىنداعى باسەكەلەستىكتى ارتتىرىپ، ۇسىنىلاتىن ءبىلىم بەرۋ قىزمەتتەرىنىڭ ساپاسىنا قاتىستى جاۋاپكەرشىلىكتىڭ ءوسۋىن قامتاماسىز ەتپەك.

«ەندى جۇمىس بەرۋشىلەر ديپلومعا ەمەس، تۇلەكتىڭ قۇزىرەتىلىگىنە كوبىرەك كوڭىل بولەدى. جۇمىسقا ورنالاستىرۋ كەزىندە جوعارى وقۋ ورنىنىڭ بەدەلى مەن ءيميدجى باستى ءرول اتقارادى. ستۋدەنتتەر مەن اتا-انالاردى جوعارى وقۋ ورنىن تاڭداۋدا مۇقيات بولۋعا شاقىرامىز»، - دەدى ا. ايماعامبەتوۆ.

---