InfoHub Logo

پلاتيفيللين — Senecio platyphullus وسىمدىگىنەن الىناتىن الكولويد. پلاتيفيللين گيدروتارتراتى — Platyphyllini hydrotartras قولدانىلادى. اق ءتۇستى كريستالدى ۇنتاق، سالقىن سۋدىڭ 10، ىستىق سۋدىڭ 5 بولىگىندە ەريدى، سپيرتتە ناشار ەريدى (ىستىق سپيرتتە 1 : 42 بولىكتە ەريدى). اسەرى جونىنەن اتروپينگە جاقىن، ءبىراق اتروپيننەن گورى ەداۋىر السىزدەۋ جانە قىسقا مەرزىمدى اسەر ەتەدى، ودان وزگەشە تۇردە ورتالىق جۇيكە جۇيەسىن قوزدىرادى، قان قىسىمىن كوتەرەدى، بەزدەردىڭ سەكرەسياسىنا ءالسىز اسەر ەتەدى، جۇرەكتىڭ قىزمەتىن ەداۋىر وزگەرتەدى. كوزگە تامىزىلعان 1 — 2 % ەرىتىندى كوزدىڭ قاراشىعىن تەز جانە ەداۋىر ۇلكەيتەدى. مۇنىڭ ءوزى كوزدىڭ ىشكى قىسىمىن باياۋ ارتتىرادى جانە بەيىمدەلگىشتىكتى السىرەتەدى. بۇل وزگەرىستەردىڭ ءبارى ءبىر تاۋلىكتەن اسپايتىن ۋاقىتقا سوزىلادى، ءسويتىپ، كوز قاراشىعىنا اسەرى جونىنەن پلاتيفيللين ءبىرقاتار رەتتەردە اتروپينگە قاراعاندا نەعۇرلىم باعالىراق، ويتكەنى ول بەيىمدەلگىشتىكتى جانە كوزدىڭ قورەكتەنۋىن از بۇزادى، وتكىنشى اسەر ەتەدى.

تەرى استىنا ەنگىزىلگەن پلاتيفيللين اتروپين سياقتى تۇيىلۋگە قارسى اسەر ەتەدى، قارىن، ىشەك، قۋىق جانە ءىشىنارا برونحى بوساڭسيدى. بۇل ورايدا ول اتروپين سياقتى قوسىمشا قۇبىلىستار - كىلەگەي قابىقتىڭ قۇرعاۋىن، سفينكترلەردىڭ ءتۇيىلۋىن، كوزدەگى وزگەرىستەردى، تاحيكارديانى تۋعىزبايدى. بۇيرەك شانشۋىندا ول اۋرۋدى 8-10 مينۋتتان كەيىن-اق باسەڭدەتەدى. ءپلاتيفيلليننىڭ شوپقورەكتى جانۋارلاردىڭ اس قورىتۋ جولىنا اسەر ەتۋى ەرەكشە نازار اۋدارۋعا لايىق. ساۋ جانۋارلاردا ول قارىن بۇلشىق ەتتىڭ تونۋسىن جانە ىشەكتىڭ جيىرىلۋىن العاشقى 10-15 مينۋتتا عانا باسەندەتەدى، سونان سوڭ كۇشەيۋ تەندەنسياسى بايقالادى. قارىننىڭ جيىرىلۋى سيرەك بولسا دا كۇشتى، ال بوساڭسۋى تولىق بولادى. ىشەككە دە وسىڭداي اسەر ەتەدى. ءپلاتيفيلليندى ەنتەروسپازمداردا، سونداي-اق قارىننىڭ ءجىتى كەڭەيۋىندە، ىشەكتىڭ جيىرىلۋىن تىنىشتاندىرعىش جانە رەتتەگىش دارى-دارمەك رەتىندە قولدانادى. تەرى استىنا جىبەرۋ مولشەرى: جىلقىعا 0،015-0،1 گ؛ ءىرى قاراعا 0،01-0،07 گ؛ يتكە 0،002-0،01 گ. ونى كوزدىڭ قاراشىعىن ۇلكەيتكىش دارى-دارمەك رەتىندە پايدالانادى،1-2 %-تىك كونسەنتراسيا تۇرىڭدە ول اتروپينگە قاراعاندا كوزدىڭ كاراشىعىن ءبىراز السىزدەۋ ۇلكەنتەدى، ءبىراق ونىڭ اسەرى تەز (ءارى كەتكەندە 40-50 مينۋتتان كەيىن جوعارى دەڭگەيگە جەتەدى) جانە قىسقا مەرزىمدى (9-12 ساعات) بولادى.

ءپلاتيفيلليندى مال بورداقىلاۋ شارۋاشىلىقتارىندا شوشقالاردىڭ جىنىستىق كۇيىتىن جويۋ جانە ودان ساقتاندىرۋ ءۇشىن قولدانادى. ونى تەرى استىنا 1 % ەرىتىندى تۇرىندە قۇلاق قۋىسىنىڭ ارتقى جاعىنان 3-رەت، اراعا 24 ساعات ۋاقىت سالىپ ەنگىزەدى. سالماعى 40-60 كگ مالعا ءبىر دۇركىن ەنگىزىلۋ مولشەرى 0،01 گرامعا تەڭ (1 % ەرىتىڭدىنىڭ 1 مل). گوموتروپين گيدروبروميدى، سپازموليتين، ارپەنال، اپروفەن جانە باسقالار دا حولينوليتيكتەرگە جاتادى.

---