قالامپىر
ءتۇرلى ءتۇستى قالامپىر (گۆوزديكا رازنوسۆەتنايا، Dianthus versicolor Fisch) — ءشوپ تەكتەس وسىمدىك. ونىڭ جاپىراقتارى ءوسىپ شىققان جەرلەرىندە بۋناقتارى بولادى، ساباقتارى جۇمىر، ءتۇزۋ وسەدى. بيىكتىگى 60 سانتيمەتردەي. تامىرى جۋان، قوسىمشا تامىرلارى دا بار. جاپىراقتارى قاراما-قارسى ورنالاسقان، وتىرمالى، قانداۋىر ءتارىزدى. گۇلدەرى ءىرى، قىزىل ءتۇستى، وسىمدىكتىڭ جوعارعى جاعىنا بىر-بىردەن ورنالاسقان. ماۋسىم-شىلدە ايلارىندا گۇلدەيدى. تاۋ ەتەكتەرىندە، قاراعايلى ورمانداردا، شابىندىقتاردا وسەدى. ءدارى جاساۋ ءۇشىن وسىمدىكتىڭ جەر ۇستىندەگى بولىگىن گۇلدەگەن كەزىندە جيناپ الادى.
قۇرامىندا ساپونيندەر، الكالويدتەر، كريستالدى زاتتار، اسكوربين قىشقىلى بار. ۇزاققا سوزىلعان زەرتتەۋلەر ناتيجەسىندە قالامپىر تۇنباسىنىڭ جاتىردى وتە جاقسى جيىرىلتاتىن قاسيەتى انىقتالدى. وسى ماقسات ءۇشىن قولدانىلىپ جۇرگەن كەيبىر دارىلەرگە قاراعاندا قالامپىردان جاسالعان دارىلەردىڭ اسەرى 3-4 ەسە از، ءبىراق ونىڭ ەسەسىنە ودان جاسالعان ءدارىنىڭ ورگانيزمگە ەشقانداي زياندى اسەرى جوق. سوندىقتان ونى جاتىردىڭ بۇلشىق ەتتەرىنىڭ كۇشى ازايعاندا، ەتەككىر وتە كوپ مولشەردە كەلگەندە پايدالانادى. حالىق مەديديناسىندا قالامپىردى جاتىردان جانە گەمورروي تۇيىندەرىنەن قان كەتكەندە دە پايدالانادى.
قولدانۋ ءتاسىلى
قالامپىر ءشوبىنىڭ 15 گرامىن قايناپ تۇرعان 1 ستاكان سۋعا سالىپ تۇندىرادى دا، ءسۇزىپ الىپ 1 اس قاسىقتان كۇنىنە 3 رەت ىشەدى.
You Might Also Like
-
قوجاقات (ەجيەۆيكا، Rubus) — بيىكتىگى 1-3 مەترگە جۋىق جارتىلاي بۇتالى وسىمدىك. ساباعى جەرگە توسەلىپ وسەدى، نەمەسە تىك ءوسىپ بارىپ مايىسىپ تۇرادى. بۇكىل بويى تىكەنەكتى. جاپىراقتارى قاۋىرسىن ءتارىز...
-
قازاناق (باگۋلنيك بولوتنىي، Ledum palustre L.) — قىسى-جازى كوگەرىپ تۇراتىن، بيىكتىگى 1 مەترگە دەيىن جەتەتىن، باس اينالدىرىپ، كىسىنى ەسەڭگىرەتىپ تاستايتىنداي كۇشتى ءيىسى بار وسىمدىك. تامى...
