قاراعاندىدا ەلباسى وقىعان ۋنيۆەرسيتەتتە «جىن-شايتاندار» مەرەكەسى تويلاندى
سوڭعى جىلدارى جاستار اراسىندا قازاقتىڭ داستۇرىنە جات «حەللوۋين» مەيرامى كەڭىنەن تانىمال بولىپ، تويلانىپ ءجۇر. بيىل ونىڭ مەرەكەلەنۋىنە قاراعاندى مەملەكەتتىك تەحنيكالىق ۋنيۆەرسيتەتى دە اتسالىسقان.
قاراعاندى مەملەكەتتىك تەحنيكالىق ۋنيۆەرسيتەتىنىڭ 50-گە تارتا ستۋدەنتى مەن ماگيسترانتى قازاققا جات «حەللوۋين» مەرەكەسىن تويلاعان. شاراعا اتالعان ۋنيۆەرسيتەتتڭ وقىتۋشىلارى دا ات سالىسىپتى. بۇل جايىندا اتالعان ۋنيۆەرسيتەتتىڭ باسپا ءسوز قىزمەتى جوعارعى وقۋ ورنىنىڭ رەسمي سايتىندا حابارلاعان.
سايتتان الىنعان سكرين-شوت
«2016 جىلدىڭ 31 قازانىندا ساعات 15.00-دە 426ء-دارىسحانادا «Halloween» مەرەكەلىك ءىس-شاراسى ءوتتى. Taryn UHalie (قازاقستانداعى اقش ەلشىلىگىنىڭ وكىلى، اعىلشىن ءتىلى ءمۇعالىمى) مەن «ورىس جانە شەتەل تىلدەرى»كافەدراسىنىڭ ۇيىمداستىرۋمەن وتكەن شاراعا كافەدرا وقىتۋشىلارى، 50 ستۋدەنت پەن ماگيسترانت قاتىستى. حەللوۋين – بۇل زاماناۋي مەيرام. يرلانديا مەن شوتلانديانىڭ ەجەلگى كەلتتەرىنىڭ ءداستۇرلى مەرەكەسى. 31 قازاندا بارلىق اۋليەلەر كۇنى قارساڭىندا اعىلشىن ءتىلدى ەلدەردە تويلانادى. شارا بارىسىندا فوتو، بەينە ماتەريالداردى پايدالا وتىرىپ، حەللوۋين تاقىرىبىندا پرەزەنتاسيا كورسەتىلدى»، - دەپ جازىلعان قارمتۋ سايتىندا.
حەللوۋيندى تويلايمىز دەپ، بەت-الپەتىنە ءتۇرلى بوياۋ جاعىپ، جىن-شايتان كەيپىنە ەنىپ، قياليدىڭ ءىسىن جاسايتىن بالالارىنا تىيىم سالا الماي وتىرعان اتا-انالار ەندى «حەللوۋيننىڭ» جارنامالانۋىنا ءبىلىم بەرۋ مەكەمەسىنىڭ دە اتسالىسقانىنا نارازى.
«وسى جىن-پەرى، شايتان، ولگەن قالىڭدىق سياقتى نەشە ءتۇرلى ادام شوشىرلىق كەيىپكە ەنۋدىڭ نە قىزىعى بار ەكەنىن تۇسىنبەيمىن. ال ەلباسىمىز نۇرسۇلتان ءابىش ۇلى ءبىلىم العان ۋنيۆەرسيتەتتە وسىنداي شارانىڭ ءوتۋى – ءتىپتى ۇيات نارسە. سوندا بىزدە تويلاناتىن باسقا مەرەكەلەر جوق پا؟ جاستاردى دۇرىس جولعا سالۋدىڭ ورنىنا دىنىمىزگە، داستۇرىمىزگە جات وسىنداي مەرەكەنى تويلاتۋعا مۇمكىندىك بەرىپ وتىرعان ۋنيۆەرسيتەت باسشىلىعىنىڭ ءىسى قىنجىلتادى»، - دەدى وسى جوو-دا ءبىلىم الاتىن ستۋدەنتتىڭ اناسى رايحان تولەۋ قىزى.
سۋرەت اۆتوردىكى
حەللوۋين ەۋروپادا، اقش-تا حالىق اراسىندا تانىمال مەرەكە. بۇل مەرەكە حريستياندىق داۋىرگە دەيىنگى كەزەڭدە قازىرگى انگليا مەن يرلانديانىڭ، سونداي-اق فرانسيانىڭ اۋماعىندا ءومىر سۇرگەن كەلتتەردەن باستاۋ الادى. ولاردىڭ نانىم-سەنىمى بويىنشا، 31 قازان كۇنى مازاسىز ءارۋاقتار مەن سيقىرلى تىرشىلىك يەلەرى ءبىزدىڭ الەمىمىزگە وتەدى-مىس. سوندىقتان دا كەلتتەر ءارۋاقتار سياقتى كيىنىپ الىپ، ارعى بەتتەن كەلەتىن تىلسىم كۇشتەردى تىنىشتاندىرۋ ءۇشىن ءار ۇيگە بارىپ، تاماق سۇراپ جۇرەتىن بولعان. ۋاقىت وتە كەلە حەللوۋين جىن-ويناق مەرەكەگە اينالدى. كەيىنگى جىلدارى حەللوۋيندە اعاشتاردى ورتەۋ، شامداردى سىندىرۋ سەكىلدى ۇساق بۇزاقىلىقتار سانگە اينالا باستادى. وكىنىشكە قاراي، وسى ءبىر تۇسىنىكسىز مەرەكە قازاقستاندا دا كەڭ ەتەك جايىپ كەلەدى. قازان ايىنىڭ سوڭعى كۇنى مەكتەپ وقۋشىلارى مەن ستۋدەنتتەردىڭ جىن ۇرعانداي كەيىپكە تۇسەتىنى جاسىرىن ەمەس. بەت-اۋزىن قان-جوسا قىپ بوياعان قىزدار بىر-بىرىنەن اسىپ ءتۇسىپ، الەۋمەتتىك جەلىلەرگە سۋرەتتەرىن سالىپ الەك، ال جىگىتتەر اتالمىش «مەرەكەسىماقتى» تويلاۋ ماقساتىندا كوشەدە ادامداردى قورقىتىپ، كولىك دوڭگەلەكتەرىن جارىپ، ءارتۇرلى بۇزاقىلىققا بارۋدا. وسىلايشا، نە بولسا سوعان ەلىكتەگىش قازاق جاستارىنىڭ ساناسى وزگە ەلدىڭ، وزگە ءدىننىڭ مەيرامدارىمەن ۋلانىپ جاتىر.
جىبەك مۇقاشيەۆا
Baq.kz
You Might Also Like
-
ماڭعىستاۋ وبلىسى، جاڭاوزەن قالاسى تولەسىن الييەۆ اتىنداعى №1 ورتا مەكتەپ ءمم-سىنىڭ ءوزىن-وزى تانۋ ءپانى ءمۇعالىمى جانە پەداگوگ پسيحولوگ دارماگامبەتوۆا باگيلا بەگەنيشوۆنا
-
بەس كۇندىك وقۋ جۇيەسى مۇعالىمدەردىڭ جالاقىسىن قىسقارتۋعا سەبەپ بولمايدى. ءبىلىم مينيسترلىگى قايتا پەداگوگتاردىڭ جالاقىسىن كوتەرۋ جوسپارلانىپ وتىرعانىن مالىمدەدى، دەپ حابارلايدى ۆaq.kz.
