قازاق جۇمىسكەر، كەدەيلەرى گازەت-جۋرنال وقۋلارى كەرەك
نادان ادام گازەت، جۋرنال وقىمايدى. گازەت، جۋرنال وقىماعان ادام — سوقىر، مۇگەدەك.
ءار مەملەكەتتىڭ قانداي ساياسات قولداناتىنى، ءار مەملەكەتتىڭ تىسىندا، ىشىندە ساياساتى قانداي تاسىلمەن جۇرگىزىلەتىنى ءھام ءار مەملەكەتتىڭ الەۋمەت ءىسىنىڭ اعىمى، شارۋاشىلىعىنىڭ قۇرىلىس ءتارتىبى گازەت، جۋرنالىندا جازىلادى. گازەت، جۋرنال حابارشىسى.
گازەت، جۋرنال، كىتاپ وقىمايتىن ادام ءومىرىن بوسقا وتكىزگەن، قالىڭ، ساپىرىلىسىپ، اسىعىپ قايناعان توپتىڭ اراسىندا مەڭ-زەڭ بولىپ، قاقتىعىپ، اداسىپ قالعان پەندە.
قالىڭ توپتىڭ ەرسىلى-قارسىلى ساپىرىلىسىپ، گۋلەسىپ جاتقانىنا مەڭ-زەڭ بولىپ اداسقان پاندە تۇسىنبەيدى. ادامزاتقا ەكى ءتۇرلى اس كەرەك: بىرەۋى — تانىنە، بىرەۋى — رۋحىنا. رۋحىنا كەرەكتىڭ ۇلكەنى — گازەت، جۋرنال، كىتاپ وقۋ. گازەت، جۋرنال، كىتاپ وقىعان ادامنىڭ ءبىلىمى، دۇنيەگە، تۇرمىسقا كوزقاراسى بىرتە-بىرتە كەڭەيە بەرمەك، ماڭايىندا بولىپ جاتقان ىستەردىڭ نە ەكەنىن، ماڭايىندا ساپىرىلىسىپ ارەكەت قىلىپ جاتقان ادامداردىڭ كىم ەكەنىن ءھام ءوزىنىڭ كىم ەكەنىن بىلمەك.
گازەت، جۋرنال، كىتاپ وقىعان كىسى كوپ بولسا دا، از بولسا دا ساياسات ىسىنە ءھام الەۋمەت ىسىنە قاتىناسا بەرمەك. قازاقتىڭ جۇمىسكەرلەرىنىڭ، كەدەيلەرىنىڭ كوبى گازەت، جۋرنال، كىتاپ وقىمايدى. كوبى وقۋ بىلمەيتىن-اق شىعار. ال وقۋ بىلەتىندەرىنىڭ كوبى وقىمايدى. ءبۇل ۇلكەن كەمشىلىك. بۇل قۇر تانىنە عانا اس ىزدەپ، توپ ىشىندە قاقتىعىپ، اداسىپ قالعاندىق. قازىرگى ۋاقىتتا اسىرەسە كەڭەستىك رەسپۋبليكادا ءوزىنىڭ كىم ەكەنىن تانىماعاندىق.
ىشكى ءھام سىرتقى دۇنيەلەردە نە بولىپ، نە قويىپ جاتقانىن بىلمەگەن جۇمىسكەر ءھام كەدەي كەڭەستىك رەسپۋبليكادا بولسا دا ءوز سىباعاسىن ءوزى قانشا ايتقانمەن تۇگەلدەپ الا المايدى.
مۇنى جۇمىسكەر، كەدەيلەر تابىنىڭ وقۋ بىلەتىن جىگىتتەرى ەستەرىنەن قالدىرماۋ كەرەك.
الىپ تۇراتىن گازەت، جۋرنالى بولسا جىرتپاي، بۇلدىرمەي، باسقا الىپ تۇرمايتىن جولداستارىنا بەرۋلەرى كەرەك.
10.10.1922 جىل
You Might Also Like
-
وكتيابر توڭكەرىسىنىڭ ون جاسقا تولعان مەيرامىندا كۇللى «رەسەيدە كەمپىر-شالداردان باسقا حات بىلمەيتىن ادام بولماسىن» دەگەن ۇراندى كەڭەس ۇكىمەتى جاريالاپ وتىر.
-
الدىمىزداعى مامىر ايىنىڭ باسىندا ءباسپاسوزدى كۇشەيتۋ ءام جەتىم بالالاردىڭ تۇرمىسىن جوندەۋگە كىرىسىپ، جاردەم جيناۋ شارالارى ىستەلەيىن دەپ جاتىر. بۇل ەكى جۇمىستىڭ ەكەۋى دە — ەڭ تىعىز، ەڭ زور، ەڭ ...
