InfoHub Logo

اعىلشىن ءتىلى ءمۇعالىمى قازاقستان مەكتەپتەرىن توزاققا تەڭەدى.

مەكتەپتەگى بوياماسىز ءومىردى سۋرەتتەپ، اعىنان جارىلعان ءمۇعالىمنىڭ ءۇشبۋحاتى Pandaland جۋرنالىندا جارىق كوردى.

«ينتەرنەتتە جارىق كورگەن نەمەسە مورالدىق اقى تالاپ ەتىپ، تىكەلەي وزىمە شىعاتىن اتا-انالاردىڭ قوقان-لوقىسى كوڭىلىمدى قاتتى بۇزادى.

ءبىراق ولارعا ايتارىم، سىپىرىپ الاتىنداي ءبىزدىڭ تۇگىمىز جوق. قازاقستانداعى ءمۇعالىمنىڭ ءال-اۋقاتى قايىرشىلىق دەڭگەيمەن پارا-پار.

وعان جۇيكەنىڭ توزۋىن قوسىپ قويىڭىز. كوبىسى بۇل ءسوزىم ءۇشىن مەنى جەك كورىپ، بۇل ماماندىقتى قايىرىمدى دەپ، ءپىر تۇتار. ءبىراق قايىرىم مەن العا قويعان ماقساتىڭىزدى ساباق بەرگەن ءبىرىنشى جىلدان كەيىن ۇمىتا باستايسىز.

ونىڭ پىكىرىنشە، ۇستاز جاقسى اقشا تاۋىپ، كوبىرەك بوس ۋاقىتى بولۋى كەرەك.

ال قازىرگى جاعدايدا جاس مۇعالىمگە وتباسىن قۇرىپ، ءوز بالالارىن تاربيەلەۋدى جوسپارلاۋدىڭ ەش مۇمكىندىگى جوق.

«مەنىڭ جاسىم — 30-دا. جالپى ءبىلىم بەرەتىن مەكتەپتە اعىلشىن تىلىنەن ساباق بەرەمىن.

مەنىڭ جەكە ومىرىمە ۋاقىت جوق، باسى ارتىق اقشام دا جوق، باستىسى ءوزىم اينالىسىپ جۇرگەن ىستەن قانداي دا ءبىر ءلاززات المايمىن. قازاقستانداعى ءمۇعالىم — بەتىمەن كەتكەن وقۋشىلارعا، توپاس ديرەكتورعا جانە ءبىلىم جۇيەسىندەگى حاوسقا قارسى تۇرۋ ءۇشىن دامىلسىز تىپىرلايتىن ەشقانداي قۇقىعى جوق تىرشىلىك يەسى.

ەندى ءسوزىمدى دايەكتەي ءتۇسۋ ءۇشىن اڭگىمەنى بالالاردان باستايىن. مەن العاش رەت مەكتەپ تابالدىرىعىن ۇستاز بولىپ اتتاي سالىسىمەن، «London is the capital of Great Britain» دەگەننەن باسقا ەشتەڭەنى ۇيرەتپەگەن بالالاردى شەت ءتىلىن مەڭگەرۋگە باسقاشا قۇشتار ەتۋگە كىرىستىم. وقۋشىلاردىڭ اعىلشىنشا جاقسى كورەتىن ولەڭدەرىن اۋدارۋعا، بەرىلگەن جاتتىعۋلاردى تەز ورىنداۋعا بارىمدى سالدىم. ويتكەنى قالعان 15 مينۋتتا ولار تانىمال سەريالداردى سۋبتيتر ارقىلى كورۋى كەرەك بولاتىن. كوپ ۇزاماي بۇل ءتاسىل ءوز ناتيجەسىن بەردى. وقۋشىلار وزىمەن اعىلشىن تىلىندە سويلەسۋدى سۇراي باستادى. مەن ولاردىڭ كوزدەرىنەن وت كوردىم.

وقۋشىلار ەندى مەنەن «شىرىتكىشتىڭ» (بالالاردىڭ جارگون ءسوزى) ورنىنا شەت ءتىلىن قىزىقتى وتكىزۋدىڭ تاسىلدەرىن كوبەيتسەڭىز دەپ سۇراي باستادى. شىرىتكىش دەپ ولار وتاندىق اۆتورلاردىڭ وقۋلىقتارىن ايتقان ەدى. شىندىعىندا، ول كىتاپتتار مەكتەپكە دەيىنگى ءبىلىم بەرۋ ءۇشىن جاسالعان سەكىلدى. ارينە، ونداعى امالدار ابدەن ەسكىرگەن.

مەن جوعارى سىنىپقا ساباق بەردىم. ارينە، بالالار ءارتۇرلى بولادى. اسىرەسە ولاردىڭ الىپ-ۇشپا ءجاسوسپىرىم كەزەڭدە ەكەنىن ۇمىتپاعان ءجون. مەن بارىنە ءاردايىم تۇسىنىستىكپەن قاراۋعا تىرىساتىن اداممىن. ءبىراق جۇيكە توزدىراتىن كەز دە كەلىپ جەتتى، ونسىز بولا ما؟ سونىڭ بىرەۋىن مىسالعا كەلتىرە كەتەيىن.

ۇنەمى ساباققا كەشىگىپ كەلەتىن، ساباق وقىمايتىن، ال ساباق ۇستىندە تەلەفونىنان باس الماي، حابارلاما الماسىپ وتىراتىن 9-سىنىپتا وقيتىن ءبىر قىزعا 3 قويعاندا ناعىز شايقاس باستالدى. ونىڭ اتا-اناسى مەكتەپكە كەلىپ، ۇلكەن ايقاي-شۋ شىعاردى، سوتقا بەرەمىن، تاعى باسقا قوقان-لوقىلارىمەن مەنى ۇركىتىپ-قورقىتا باستادى.

ال ديرەكتور نە ىستەدى دەيسىز عوي؟ مەنى شاقىرىپ، الگى قىزعا 4 قويىپ قۇتىلايىق دەيدى. اكەسىنىڭ قولى ۇزىن ەكەن دەگەن اڭگىمە دە ايتىلدى. راسىندا، بالاسىنا باعا ساتىپ الاتىن «ۇلكەن» ادامدارعا قارسى تۇرۋعا ءبىزدىڭ شاما قايدا؟ ارينە، كوزدى جۇمۋعا تۋرا كەلدى. ەسەسىنە، ابدەن ەركىنسىگەن قىز مەنىڭ ساباعىما مۇلدە قاتىسپاۋدى ءجون دەپ تاپقان. قۇدايعا شۇكىر، باسقا بالالاردىڭ تاربيەسىندە ماسەلە جوق، ولار دا بۇل جايتقا تۇسىنىستىكپەن قارادى.

ەندى جۇمىس كەستەسىنە كەلسەك. 24/7 — بۇل ءبىزدىڭ ديەۆيز.

وليمپيادالار، سەنبىلىك، مادەني شارا، بىتپەيتىن قاعازداردى تولتىرۋ، اتا-اناعا حابارلاسۋ، جينالىس وتكىزۋ! بۇل — اقىسى تولەنبەيتىن ءمۇعالىمنىڭ قوسىمشا جۇمىستارى.

وتكىزگەن ساعاتىنا قاراي اقشا تولەيدى، ءبىر سىنىپتى جەتەكشىلىككە الساڭ، وعان بونۋس قوسادى. بونۋس دەگەن ارينە قۇلاقا جاعىمدى ەستىلەدى، ال اقىسىن كورسەڭىز، كۇلكىڭىز كەلەدى، 5 مىڭ تەڭگە مە سونداي.

كوميسسيا — بۇل ءوز الدىنا ءبىر بولەك ماسەلە. سىيلىققا اقشانى ءۇن-تۇنسىز جينايمىز، ونداعى ويىمىز — ءجونسىز كەلىپ كيلىگە بەرمەسە ەكەن دەگەن.

ءبىزدىڭ مەكتەپكە تاعاتىن كىنا دا جوق. كەشىرىڭىز، ەگەر جابدىق بەرىلمەسە، كۇردەلى جوندەۋگە اقشا بولىنبەسە، ەدەن جۋۋشىلارعا 50 مىڭ تەڭگە تولەنسە، ەندى نە دەپ تيىسەسىز؟ ال ءبىز بولسا، سىيلىق جاسايمىز ولارعا. اقشاسى كوپتەرگە…

مەكتەپتە «مارتەبەلى» جالعىز كاستا بار. ول — وسى جۇمىستان قانداي دا ءبىر ءلاززات الاتىن زەينەت جاسىنا جاقىنداپ قالعان مىقتى مۇعالىمدەر. الداعى زەينەتكەرلىگى، وسىعان دەيىن جيناعان بەدەلى جانە ەڭبەك ءوتىلى ول ادامدارعا قوسىمشا اقىعا بالانى وقىتۋعا مۇمكىندىك بەرەدى. مىنە، بونۋس دەگەن وسى.

ال جاستارعا جۇمىس ساتىسىمەن كوتەرىلۋ دەگەن جوق. مەن وسى جىلى جۇمىستان ءوز ەركىممەن كەتتىم. ول توزاققا قايتىپ بارعىم كەلمەيدى. ارينە، بالالار ىزدەپ، مازالاپ جاتىر… ساعىنامىز دەيدى، مەن دە ولاردى ساعىنامىن. قايتەمىن ەندى، ۇيرەنىسىپ قالعان وقۋشىلارمەن توق بولمايسىڭ.

سوندىقتان قۇرمەتتى اتا-انالار، ءبىز تۋرالى جامان جازباس بۇرىن ءبىزدىڭ ورنىمىزدا وزدەرىڭىزدى ءبىر رەت قويىپ كورىڭىزدەرشى. بۇل ارادا ءبىر ساعاتقا شىداپ بەرە الماس ەدىڭىزدەر. ال اي سوڭىندا قولىڭىزعا تيىن-تەبەن تيگەندە كوزىڭىزگە جاس ۇيىرلەتىنىنە كەپىل بەرە الامىن. سوكپەڭىزدەر. ودان دا بالالارىڭىزدى بايقۇس ۇستازدىڭ ەڭبەگىنە جاناشىرلىقپەن قاراۋدى ۇيرەتىڭىزدەر!» دەلىنگەن حاتتا.

دەرەككوز: 365info.kz