قازاقستان ەڭبەكشى توڭكەرىسشى جازۋشىلار ۇيىمىنىڭ باسقارماسىنان
قازاقستان استاناسى — قىزىلوردادا قازاقستان ەڭبەكشى تابىنىڭ توڭكەرىسشى جازۋشىلار ۇيىمىنىڭ بەس كىسىدەن باسقارماسى قۇرىلدى. باسقارمانىڭ ماقساتى — قازاقستاننىڭ ەڭبەكشى تابىنىڭ توڭكەرىسشى جازۋشىلارىن ۇيىمداستىرىپ، ءبىر جوبامەن ادەبيەت مايدانىنا شىقپاق. ۇيىمعا كىرگەن جازۋشىلاردىڭ شىعارعاندارىن باستىرىپ تۇرماق جانە ايلىق جۋرنال شىعارماقشى.
قازاقستاننىڭ توڭكەرىسشى جازۋشىلار ۇيىمى ءوزىن جالپى كەڭەستەر وداعىنىڭ پرولەتاريات جازۋشىلار ۇيىمىنىڭ ءبىر بۇتاعى سانايدى. كەڭەستەر وداعىنىڭ موسكۆاداعى پرولەتاريات جازۋشىلارىنىڭ باسقارماسىمەن قاتىناس جاساپ، ادەبيەت مايدانىندا ءبىر نۇسقامەن ارەكەت قىلادى. سوندىقتان قازاقستان ەڭبەكشى تابىنىڭ توڭكەرىسشى جازۋشىلار ۇيىمى جالپى كەڭەستەر وداعىنىڭ پرولەتاريات جازۋشىلار ۇيىمىنىڭ جوباسىن قابىل الىپ، قولدانادى، ول جوبا مىنا تومەندە جاريالانىپ وتىر.
ەڭبەكشى تاپتىڭ شىن توڭكەرىسشى ازاماتى بولىپ ادەبيەت مايدانىنا شىققاندار، ياكي ەندى شىعايىن دەپ جۇرگەندەر، مىنا تومەندەگى جالپى جوبانى قابىل السا، ۇيىمعا كىرەدى. ۇيىم اشىلماعان جەردە، 3 — 2 كىسى بولسا، وزدەرى وسى جوبامەن ۇيىم اشىپ، ۇيىمعا كىرگەندەردىڭ ءاتى-جونىن (انكەتىن تولتىرىپ) جازىپ، ءتىزىمىن ورتالىقتاعى باسقارماعا جىبەرۋ كەرەك.
وكتيابر توڭكەرىسىنەن كەيىن قازاقستاننىڭ ادەبيەتى ىلگەرىلەپ، ەنبەكشى تاپتىڭ توڭكەرىسشى جازۋشىلارى شىعا باستادى. ءبىراق بۇلاردىڭ كوبى، ءار جەردە بولەك-بولەك جۇرگەندىكتەن، تۋرا جولعا تۇسە الماي، «الاشتىڭ» بۇرىنعى ساندىراق سوقپاعىنا شىرمالىپ ءجۇر.
كەڭەس ۇكىمەتىنە، كوممۋنيزمگە جاۋ بولعان بۇرىنعى قازاقستاننىڭ «ساياساتشىلارىنىڭ» ەسكى كۇنالارى كەشىرىلگەن سوڭ بۇرىنعى «الاشتىڭ» رۋحى ءسىڭىپ قالعان ادامدار ءتۇرلى پەردەمەن، ءتۇرلى تاسىلمەن جازۋ مايدانىنا. ادەبيەت مايدانىنا شىقتى. وقۋى، ءبىلىمى، تاجىريبەسى از ەڭبەكشى تاپتىڭ توڭكەرىسشى جازۋشىلارى ولاردى ادەبيەت مايدانىنان قۋىپ شىعا المادى.
«الاش» رۋحى سىڭگەن جازۋشىلاردىڭ قيمىلى سوڭعى ۋاقىتتا كۇشەيەيىن دەدى: ولار ولەڭ، جىر اڭگىمەدەن اسىپ، قازىرگى قازاق ادەبيەتىنە سىن جازا باستادى.
قازاق ادەبيەتىنە «سىن» جازعاندا وزدەرىنىڭ ساندىراق سوقپاعىنىڭ سورابىنا سالىپ، ءار گۇرلى ەپپەن، ءوز بازارلارىنىڭ نارقىمەن ادەبيەتكە باعا بەرەدى. سوندىقتان قازاقستاننىڭ توڭكەرىسشى جازۋشىلارىنا ايقىن جوبالى ءبىر ۇيىم جاساۋ كەرەك ەدى. مىنە، ول ۇيىم ەندى جاسالدى. قازاقستاننىڭ ەڭبەكشى تابىنىڭ توڭكەرىسشى جاس جازۋشىلارى ەندى تەز قيمىلداپ ۇيىم جاساپ، قىزىلورداداعى ورتالىق، باسقارمامەن حابارلاسىپ بايلانىس جاساپ، كىرىسۋلەرى كەرەك.
باسقارمانىڭ ىستەپ جاتقان ىستەرى بۇدان بىلاي باسپا ءسوز جۇزىندە جاريالانىپ تۇرادى.
باسقارما مۇشەلەرى: ساكەن سەيفۋللا ۇلى،
ابدىراحمان ءبايدىلدا ۇلى،
بەيىمبەت مايلى ۇلى،
فەوكتيستوۆ نيكولاي.
باسقارمانىڭ ۋاقىتشا ادرەسى:
قىزىلوردا، قازاقستاننىڭ حالىق اعارتۋ كوميسسارياتى، باسقارما حاتشىسى ساكەن سەيفۋلداۇلىنا.
1925 جىل
You Might Also Like
-
جاقسى بولسىن، جامان بولسىن، دۇنيە جۇزىنە شىققان ءاربىر كىتاپشاعا، كىتاپقا كەدەي قازاقستان سياقتى ەلدەر جالقاۋ قاراماي ىقتيقاتتاپ سالەم بەرۋ كەرەك.
