InfoHub Logo

قازاقستان رەسپۋبليكاسىنىڭ 2-جالپى جيىلىسىنىڭ بولىپ وتكەنىنە جىل تولدى. بۇل وتكەن جىلدىڭ ىشىندە قازاقستاننىڭ ءار ايماعىندا، ءار اۋدانىندا تاريح جۇزىندە سيرەك بولاتىن اۋىر حالدەردى كورىپ، قازاق ەڭبەكشىلدەرىنىڭ ۋاكىلدەرى ءقازىر 3ء-شى رەت باستارىن قوسىپ وتىر.

ول اۋىر حالدەر دەگەنىمىز مىنالار ەدى: تالاي جەرلەردە مالدى، جاندى اپات قىلعان اشارشىلىق، تالاي مالدى ناۋات قىلعان، تالاي جاندى قارا جەردىڭ قوينىنا كىرگىزگەن ءتۇرلى ىندەت، جالاڭاشتىق. ءام بۇلارعا قوسىلىپ ەڭبەكشىل ۇكىمەتىن قۇرتۋ نيەتىندە ارەكەت قىلعان دۇشپاندار (باندالار).

2-جالپى جيىلىسىندا قازاقستان ەڭبەكشىلەرى ءوزىنىڭ سايلاپ كەتكەن ورتالىق اتقارۋ ورىنداۋ كوميتەتىنە تاپسىرعان ءتۇرلى جۇمىستارى بار ەدى. ءقازىر، ارينە، ول تاپسىرعان جۇمىستاردى قازاقستان ەڭبەكشىلدەرىنىڭ ورتالىق اتقارۋ ورىنداۋ كوميتەتى تۇگەلىمەن ورىندادى، تۇگەلىمەن ىستەدى دەۋگە بولمايدى.

ەڭبەكشىل حالىقتىڭ ول تاپسىرعان جۇمىستارىن تۇگەلىمەن ورىنداۋعا زور بوگەت بولعان — جاڭاعى جوعارىداعى ايتقان الاپاتتى اشارشىلىق، جالاڭاشتىق ءتۇرلى ىندەت، ىشكى قارا ويلى دۇشپاندار. بۇل زور قيىندىقتى، بۇل دۇشپانداردى قازاقستان ەڭبەكشىلدەرىنىڭ كەڭەس ۇكىمەتى جەڭدى.

مۇنى ەسكە العاندا 2-جالپى جيىلىستا ەڭبەكشىل حالىقتىڭ تاپسىرعان جۇمىستارىن تۇگەلىمەن ورىنداي المادى دەپ ورتالىق اتقارۋ ورىنداۋ كوميتەتكە ارتىق كىنا قويۋعا بولمايدى. ارتىق كىنا قويۋعا بولماۋىنا، ارينە، باسقا دا تالاي سەبەپتەر بار شىعار.

اۋىر حال دەن ەندى قازاقستان ءقازىر شىقتى.

ەندى بۇدان بىلاي ءتۇرلى اپاتتان، ءتۇرلى پالەدەن امان بولسا وتكەن جىلعى اشارشىلىقپەن، جالاڭاشتىقپەن، ىندەتپەن، ىشكى جاۋلارمەن كۇرەسۋدىڭ ورنىنا، بارلىق كۇش-قۋاتتى وسىلاردى جەڭۋگە جۇمساۋدىڭ ورنىنا، قازاقستان ۇكىمەتى كۇيزەلگەن شارۋاشىلىقتى تۇزەۋگە، ناداندىقتى قۇرتۋعا، ەڭبەكشىل حالىقتىڭ تۇرمىسىن جوندەۋگە، جەر پايدالانۋدى تارتىپكە قويۋعا، ءام باسقا ىستەردى جوندەۋگە كىرىسەر.

قازاقستان ەڭبەك شىلدەرىنىڭ 3-جالپى جيىلىسى وتكەن ءىستى ەسكە الىپ، كەلەشەككە كوز جىبەرىپ، الداعى سايلايتىن ورتالىق اتقارۋ ورىنداۋ كوميتەتىنە وسىلاردى انىقتاپ، قاتتى تاپسىرۋلارى كەرەك. ەڭبەكشىل حالىقتىڭ عانا مۇڭ-مۇقتاجدارىن تاباتىن كىسىلەردى ورتالىق اتقارۋ ورىنداۋ كوميتەتىنە سايلاۋلارى كەرەك.

1922 جىل

---