قازاقستان ورتالىق كوميتەتىنىڭ 2-جالپى جيىلىسى
كەشە قازاقستان ورتالىق كوميتەتى مۇشەلەرىنىڭ 2-جالپى جيىلىسى اشىلدى. جيىلىس ەڭ الدىمەن وقۋ كوميسسارياتىنىڭ بايانداماسىن تىڭداپ ءوتتى.
قازىرگى ۋاقىتتا كەڭەستىك روسسيادا وقۋ ءىسى ەڭ ءبىرىنشى العا ۇستاعان ءىس بولعاندىقتان، ءھام ونىڭ بەر جاعىندا ءبىزدىڭ قازاقستاندا وقۋ ىسىنە بارلىق كۇشتى سالۋ وتە كەرەك بولعاندىقتان، بۇل باياندامانىڭ ماقساتى وقۋ ىسىنە شىنداپ كوبىرەك كۇشتى جۇمساۋدىڭ لاجدارىن بەلگىلەۋ ەدى. بۇل ۋاقىتقا دەيىن قازاقستاننىڭ وقۋ كوميسسارياتى نە ىستەپ، نە بىتىرگەن ەكەن دەپ سىن تاقساق، ارينە، كەمشىلىكتەرى جوق دەۋگە بولمايدى. كەڭەس ۇكىمەتى قيراعان، بۇلىنگەن وردانىڭ ۇستىنە ورناعان ۇكىمەت بولعاندىقتان ءھام سوعىس، مايدان، اش-جالاڭاشتىقتىڭ اسەرىنەن بۇل كۇندە ءبىزدىڭ ءقايبىر ىستەرىمىز ونىڭ العا باسىپ جوندەلىپ، ساباسىنا ءتۇسىپ ءجۇرىپ كەتىپ وتىر. بارلىق باستان كەشكەن سەبەپتەردى، قيىندىقتاردى، جوقتىقتى ويلاعاندا قاي مەكەمەگە دە بولسا كىنا قويۋعا بولمايدى، اسىرەسە قازاقستاننىڭ كوميسسارياتىنا كىنا قويۋعا بولمايدى. وتكەن ۋاقىتتارى جوقتىقپەن، قيىندىقپەن ءوتتى.
ەندى زامان وسى قالىپپەن بارسا شارۋاشىلىق ازداپ وڭالا بەرمەك، بۇرىن قازاقستاندا ەڭ كەرەكتى ءىسىمىز بولعان وقۋ ىسىنە قاراۋعا مۇرشامىز كەلمەسە، ەندى مۇرشامىز از دا بولسا كەلەتىن بولدى. ەندى وقۋ ىسىنە جەر-جەرلەردەگى ۇكىمەت باسىنداعى وتىرعان ادامدار ءام قازاقستاننىڭ باس ۇكىمەتىندە وتىرعان ادامدار شىنداپ وقۋ ءىسىن كوركەيتۋگە، وقۋ ءىسىن گۇلدەندىرۋگە كىرىسسە، وقۋ ءىسى العا باسۋىنا ءبىز سەنەمىز. وقۋ ىسىنە شىنداپ كىرىسۋ، وقۋ ىسىنە بارلىق كۇشتى جۇمساۋ دەگەنىمىز نە بولماق؟ ول مىناۋ: جەر-جەردەگى مەكەمەلەر ءام قازاقستاننىڭ باس مەكەمەلەرى بارلىق قولىنداعى قاراجاتتىڭ قاق جارتىسىن (50 پروسەنتىن) وقۋ ىسىنە جۇمساۋ كەرەك. ءسويتىپ بارلىق قاراجاتتىڭ قاق جارتىسىن وقۋ ىسىنە جۇمساعاندا عانا وقۋ ىستەرى كوركەيەدى، سوندا عانا مۇعالىمدەر تابىلادى، سوندا عانا وقۋ ۇيلەرى جوندەلەدى، وقۋ كىتاپتارى دا تابىلادى، وقۋشىلار دا ىنتالى بولىپ، وقۋ جەمىستى بولادى.
ەگەردە ولاي قىلماي، وقۋعا قۇر سوزبەن عانا كومەك قىلساق، وقۋ ءىسى ومىرىندە العا باسپايدى.
«مىڭ سىز-بىزدەن، ءبىر شىج-بىج»، — دەپ بۇرىنعى تاجىريبە ادامدارى ايتقان.
قازاقستاندا وقۋدىڭ ەڭ ءبىرىنشى كەرەك ءىس ەكەنىن ايتپاسا دا اركىم-اق بىلەر. وقۋسىز ەشكىم قاتارعا كىرە المايدى.
قازوركومنىڭ 2-جالپى جيىلىسى وسىنى ەسىنە الىپ قارار شىعارار ءام جەر-جەرلەردەن كەلگەن جىگىتتەر قايتىپ بارعان سوڭ دا وسىنى ىستەر.
19.02.1923 جىل
You Might Also Like
-
روسسيانىڭ وتكەن ونىنشى كەڭەستەر جيىلىسى وقۋ ءىسىن جوندەۋگە، وقۋ ءىسىن ىلگەرى جۇرگىزۋگە ءبىر اۋىزدان قاۋلى قىلىپ، ول قاۋلىسىن انىقتاپ ىسكە اسىرۋعا ورتالىق ۇكىمەتكە تاپسىردى. سوڭعى جىلداردان بەرى جالپى ...
-
ادام بالاسىنىڭ ونەر-بىلىمى، وقۋى، ادەبيەتى، ساياساتى، مادەنيەتى — بارلىعى شارۋاشىلىق كاسىپتەن تۋادى.
