InfoHub Logo

بۇدان بىلاي مەديسينا قىزمەتكەرلەرىنىڭ ءبىلىمىن دۇنيەجۇزىلىك بانك جوباسىنىڭ اياسىندا كىرىكتىرىلگەن اقپاراتتىق جۇيە باعالايتىن بولادى، دەپ حابارلايدى ق ر دسم باسپا ءسوز قىزمەتى.

ق ر دەنساۋلىق ساقتاۋ مينيسترلىگىنىڭ ساپا جونىندەگى بىرىككەن كوميسسياسى دەنساۋلىق ساقتاۋ سالاسىنداعى مامانداردىڭ كاسىبي دايارلىعىن باعالاۋدى جانە بىلىكتىلىك سايكەستىلىگىن راستاۋدى جۇزەگە اسىرۋ ءۇشىن 2017 جىلدىڭ 28 جەلتوقسانىندا «تاۋەلسىز ەمتيحان الۋ ۇلتتىق ورتالىعى» ءوزىن-وزى رەتتەيتىن ۇيىمىن اككرەديتتەدى.

قايتا رەتتەۋ جانە قىزمەتتەردى تاۋەلسىز ورتاعا بەرۋ شارالارى اياسىندا 2018 جىلدىڭ قاڭتار ايىنان باستاپ دەنساۋلىق ساقتاۋدى دامىتۋ رەسپۋبليكالىق ورتالىعىنىڭ (دسدرو) قۇرىلىمىنداعى ءبىلىمدى جانە داعدىلاردى باعالاۋ ورتالىعى تاراتىلدى.

2018 جىلدىڭ قاڭتار ايىنان ساپالى جانە اشىق تۇردە (ترانسپارەنتتى) تاۋەلسىز ەمتيحان الۋعا ارنالعان حالىقارالىق تالاپتارعا ساي ازىرلەنگەن دۇنيەجۇزىلىك بانك جوباسىنىڭ اياسىندا كىرىكتىرىلگەن اقپاراتتىق جۇيە (كاج) تولىق ماسشتابتا ەنگىزىلە باستايدى.  

كاج دارىگەرلەر، مەديسينالىق جوعارى وقۋ ورىندارى مەن كوللەدجدەرىنىڭ تۇلەكتەرى، رەزيدەنتتەر، ينتەرندەر ءۇشىن تەوريالىق جانە تاجىريبەلىك ەمتيحان وتكىزۋدى  قامتاماسىز ەتەدى. تىركەلۋ، تەست تاپسىرۋ جانە ناتيجەلەرىن ەسەپتەۋ ادامي فاكتوردىڭ اسەرىنسىز اۆتوماتتى تۇردە جۇزەگە اسىرىلادى. ءار ۇمىتكەر ءۇشىن كۇنىن، ساعاتىن تاڭداپ، ەمتيحان تاپسىرۋعا ءوتىنىم بەرۋگە جانە ونىڭ بارىسىن تەكسەرۋگە مۇمكىندىك بەرەتىن جەكە ەلەكتروندى كابينەت جاسالادى. تەستىلەۋ ناتيجەلەرى سول ساتتە-اق تۇراقتى جۇمىس ىستەيتىن ۇمىتكەردىڭ جەكە كابينەتىنە جىبەرىلەدى جانە ونى جويۋ نەمەسە وزگەرتۋ مۇمكىن ەمەس.

مەديسينا قىزمەتكەرلەرىنىڭ بىلىمدەرى مەن داعدىلارىن باعالاۋ قىزمەتىنىڭ تاۋەلسىز ورتاعا بەرىلۋىنە بايلانىستى، وسى جىلدىڭ قاڭتارىنان كاسىبي دايارلىعىن باعالاۋدان ءوتۋ جانە بىلىكتىلىك ساناتىنا سايكەستىلىگىن راستاۋ ءۇشىن مەديسينا قىزمەتكەرلەرىنەن وتىنىمدەردى ۇكىمەتتىك ەمەس ۇيىم - تاۋەلسىز ەمتيحان الۋ ۇلتتىق ورتالىعى qazexam.kz سايتى ارقىلى قابىلدايتىن بولادى.

دسدرو مەكەن-جايىنا ءوتىنىم بەرىپ، باعالاۋ جونىندەگى قىزمەتكە اقى تولەپ قويعان، ءبىراق قىزمەت كورسەتىلمەگەن ۇمىتكەرلەر ەمتيحان بولاتىن كۇنى سول جەردە، نەمەسە qazexam.kz سايتىندا ونلاين تۇردە تاۋەلسىز ەمتيحان الۋ ۇلتتىق ورتالىعى ۇسىنعان ءوتىنىشتىڭ قوسىمشا نىسانىن تولتىرعان جاعدايدا،  بەلگىلەنگەن مەرزىمدە باعالاۋدان وتەدى.  

قابىلدانعان شارالار تاجىريبەلىك قىزمەتكە رۇقسات ەتۋ ءۇشىن مەديسينالىق قىزمەتكەرلەردىڭ بىلىمدەرى مەن داعدىلارىن باعالاۋ ساپاسىن جانە سەنىمدىلىگىن ارتتىرادى، باعالاۋ كەزىندە سىبايلاس جەمقورلىق قاۋىپتەرىن بولدىرمايدى جانە قوعامدىق دەنساۋلىق ساقتاۋدى ساپاسىز دايارلانعان مامانداردان قورعاۋعا باعىتتالادى.

---