قازاقستاننىڭ گۋبەرنيالىق ءھام ۋەزدىك يسپولكوم ءتوراعالارىنىڭ قۇلاقتارىنا
جاقىن ارادا قازاقستاننىڭ ءار جەرلەرىنە بارىپ قايتقان ايماقتىق قىزمەتكەرلەردىڭ ايتۋلارىنا قاراعاندا، قازاقستاننىڭ ءار جەرىندە ءالى دە جارامسىز ىستەر بار كورىنەدى.
قوستاناي گۋبەرنياسىنا بارىپ قايتقان قازاقستاننىڭ ساياسي جايىن باسقارۋشى جولداس كاچيرين ايتادى: «ەلدە بولىستىق يسپولكومداردىڭ ءتوراعالارى وزدەرى بايلاردان بولماسا دا، بايلارسىز، اقساقالدارسىز ەش ءىستى ءوز بەتتەرىمەن شەشىپ، ءوز بەتتەرىمەن باسقارىپ كەتە العان جوق كورىنەدى»، — دەيدى. جانە ەلدە بۇرىنعىداي ميليسيانىڭ جۇگەنسىز كەتكەنى كورىنبەسە دە، وتىرىك ءوزىن-وزى «ميليسيامىن» دەپ جۇرگەندەر دە بار كورىنەدى»، — دەيدى. بۇل—ءبىر.
اقتوبە گۋبەرنياسىنان قازاقستاننىڭ ورتالىق كوميتەتىنىڭ باسقارماسىنىڭ مۇشەسى Fابدوللا اسىلبەكوۆ قايتتى. ول بىلاي دەيدى:
«اقبۇلاقتىڭ ۋەزدىك يسپولكومىندا ءبىر قازاق جوق. اقبۇلاق ۋەزىنىڭ تۇرعىندارىنىڭ كوبى قازاق. مەن جاتقان اۋىلعا ءبىر كۇنى ميليسيونەر بولىپ ءبىر ورىس جىگىتى كەلدى. قارۋ-جاراعى بار. اقىرىندا سۇراستىرىپ كەلسەك، ميليسيونەر ەمەس ەكەن. كەلگەندە قازاقتارعا ايداھارداي اقىرىپ كەلدى...» — دەيدى.
بۇل — ەكى.
جانە ءبىر ۋەزدىك يسپولكومنىڭ ءتوراعاسى جازادى:
«قازاقستاننىڭ باس مەكەمەلەرىنىڭ قاۋلىلارىنىڭ كوبىن گۋبەرنيالاردا كەشىكتىرىپ، كوڭىلسىز قاراپ، كوبىنەسە ىسكە اسىرماي بوسقا قالدىردى...» — دەيدى.
بۇل — ءۇش.
جانە ورال گۋبەرنياسىنا بارىپ قايتقان قازاقستاننىڭ باقىلاۋ كوميسسارى جولداس الىبەكوۆ ايتادى: «نالوگ (سالىق) دۇرىس جيىلمايدى ەكەن. نالوگتى جيناعاندا نالوگتى تولەگەن كىسىگە جيناۋشىلار كۆيتانسيا بەرىپ وتىرمايدى ەكەن...» —دەيدى.
بۇل — ءتورت.
جانە اقمولا، قارقارالى ۋەزدەرىنەن ءھام تورعاي، اتباسار ۋەزدەرىنەن جازادى:
«ۇرلىق، بارىمتا كۇشەيدى. حالىق كەدەي بولدى، تىيۋ جوق: ءالسىز ادامنىڭ تىرشىلىك قىلىپ كۇنەلتۋى قيىن بولدى، جەرگىلىكتى ۇكىمەتتىڭ بۇعان قارسى ەش قىلعانى جوق، ەلگە شىققان ميليسيا بولسا ىستەيتىندەرى تۋراشىلىق بولمايدى»، — دەيدى. مىنە، بۇل — بەس.
وسىنىڭ ءبارى راس. بۇل حابارلاردى ايتۋشىلار دا، جازۋشىلار دا — جاۋاپتى قىزمەتكەرلەرىمىز.
مۇنداي اڭگىمەلەر قازاقستاننىڭ ءار جەرىندە-اق بولۋى مۇمكىن. ءبىراق ءبىزدىڭ تاڭىرقايتىنىمىز مىناۋ:
وسى، جوعارعى ايتىلعان جەرلەردىڭ، گۋبەرنيالىق، ياكي ۋەزدىك يسپولكومدارىنىڭ باستىقتارى (ءتوراعالارى) قازاقتىڭ تۇرمىسىن، جايىن، زاڭىن، مىنەزىن بىلەتىن قازاق ازاماتتارىنىڭ مىندەتتەرى مۇنداي ىستەردى جوق قىلۋ. بۇلاردىڭ مىندەتتەرى جىگەرلى ارەكەت قىلىپ، مۇنداي قيسىق ىستەردى تۇزەتۋ.
مىنە، وسىنى گۋبەرنيالىق ءام ۋەزدىك يسپولكومداردىڭ، ءام ول يسپولكومداردىڭ ءتوراعالارىنىڭ قۇلاقتارىنا سالامىز.
كەلەسىدە بۇل تۋرالى نە بولعانىن تاعى دا جازامىز.
03.08.1923 جىل
You Might Also Like
-
كوممۋنيست پارتياسىنىڭ جالپىرەسەيلىك 12ء-شى جيىلىسىنىڭ ۇلت ماسەلەسىن دۇرىس شەشۋگە جول-جوبالار بەلگىلەنگەندە ىستەگەن قارالارىنىڭ ءبىرى: «بۇرىنعى كەمدىكتە بولعان ۋاق ۇلتتاردىڭ رەسپۋبليكالارىندا، م...
-
ۇستىمىزدەگى 1923 جىلعى تامىزدىڭ باسىندا بولىپ وتكەن قازاقستاننىڭ ورتالىق كەڭەس كوميتەتىنىڭ 3-جالپى جيىلىسىنىڭ ىستەگەن ىستەرىنىڭ، قاراعان ماسەلەلەرىنىڭ ءتۇرى ءھام ءتارتىبى مىنا تومەندەگىدەي:
