قازاقستاننىڭ زاڭ كوميسسارياتىنا تەڭەلىڭدەر
(قازاقستاننىڭ مەكەمەلەرىندە كەڭسە ىستەرىن قازاق تىلىندە جۇرگىزۋ حاقىندا)
قازاقستاندا قازاعى كوپ جەرلەردە كەڭسە ىستەرىن قازاق تىلىندە جۇرگىزۋ كەرەك دەپ گازەت جۇزدەرىندە جازدىق. ءام بۇل تۋرالى قاي گۋبەرنيادا نە قىلىپ جاتقانى «ەڭبەكشى قازاق» گازەتىنىڭ جۇزىندە جازىلىپ جاتىر.
بۇل ءار جەردەن كەلىپ جاتقان حابارلارعا قاراعاندا، قازاق ءتىلىن ىسكە اسىرۋعا كوپ جەرلەردە ءىس باسىنداعى جىگىتتەردىڭ كوبى ونشا ىنتالى كورىنبەيدى.
ءار ءتۇرلى سەبەپتەر ايتادى. اقشا جوق دەيدى. قازاقشا ءىس جۇرگىزۋدى بىلەتىن كىسىلەر جوق دەيدى ءام تولىپ جاتقان سارى ۋايىم، قاۋىپ-قاتەرلەردى جاڭبىرداي جاۋعىزادى.
ارينە، ول بەلگىلى. ىنتاسىز ىسكە، كوڭىلسىز ىسكە سانسىز بوگەت، سانسىز ۋايىم تابۋعا بولادى. ءبىراق ءبىزدىڭ اي تۋىمىزشا، بۇل ىسكە بوگەتتىڭ كوپتىگى باسقا سەبەپتەردەن. سەبەپتىڭ ەڭ الدى — ءىس باسىنداعى ادامداردىڭ بۇل ىسكە شىنداپ كىرىسكەن نيەتتەرىنىڭ جوقتىعى، ىنتالارىنىڭ جوقتىعى.
شىن نيەت بولسا، ەكپىندى ىنتا بولسا قازاق ءتىلىنىڭ كەڭسەلەردە ءجۇرىپ كەتۋىنە ءشۇبا جوق. وعان دالەل — قازاقستاننىڭ زاڭ كوميسسارياتىنىڭ بۇل تۋرالى كورسەتىپ وتىرعان ءىسى.
قازاقستاننىڭ زاڭ كوميسسارياتى ءوزىنىڭ گۋبەرنيالىق مەكەمەلەرىنە قازاق ءتىلىن تەز قولدانۋعا بۇيرىق قىلعان.
ءقازىر قازاقستاننىڭ ەڭ زور گۋبەرنياسى سەمەي گۋبەرنياسىن سوت مەكەمەلەرىنىڭ بارىندە كەڭسە ىستەرى تۇتاسىمەن قازاق تىلىندە كۇرە باستاعان ءام قازاق تىلىندە جازىلعان گۋبەرنيالىق سوتتىڭ قاۋلىلارى، قارارلارى ورىنبورداعى زاڭ كوميسسارياتىنا كەلە باستادى.
جانە اقمولا گۋبەرنياسىندا دا سوت مەكەمەلەرىنىڭ كەڭسە ىستەرى قازاق تىلىندە جۇرە باستادى دەگەن حابار الىنىپ وتىر.
ونىڭ ۇستىنە زاڭ كوميسسارياتىنىڭ كوللەگياسىنىڭ (باسقارماسىنىڭ) ءبىر مۇشەسى ءقازىر تورعاي، ىرعىز، اقتوبە جاقتارىندا ءجۇر ءام ول جاقتىڭ دا سوت مەكەمەلەرىندە كەڭسە ىستەرى قازاق تىلىنە قويىلىپ، ءجۇرىپ كەتەر دەۋگە بولادى.
جانە ءقازىر زاڭ كوميسسارياتى سوت كەڭسەلەرىندە جازىلاتىن ءتۇرلى قاۋلى، قارار، بيلىك، كەسىم، تەكسەرۋ، انىقتاۋ ءام باسقا سونداي قاعيدالاردىڭ ءبارىنىڭ نۇسقاسىن قازاقشا باسپاعا باسىپ، قازاننىڭ بارلىق گۋبەرنياسىنا جىبەرەيىن دەپ جاتىر. مىنە، ەكپىندى ىنتا بولسا، شىن نيەت بولسا، قانداي بولسا دا ءىس وسىنداي بىرتە-بىرتە ءجۇرىپ كەتپەك. قازاقستاننىڭ زاڭ كوميسسارياتى بۇل ىستە وزگە كوميسسارياتتارعا ورنەك، ۇلگى بولۋعا ءتيىس. ال ەندى زاڭ كوميسسارياتىنا تەڭەلىڭدەر!
19.09.1923 جىل
You Might Also Like
-
قازاقستاننىڭ ورتالىق كەڭەسى (سوۆەت) كوميتەتىنىڭ جاڭادا بولىپ وتكەن 3ء-شى جالپى جيىلىسى: «قازاقستاندا قازاعى كوپ جەرلەردە مەكەمە ىستەرى قازاق تىلىندە ءجۇرسىن، بۇل الدىمەن بولىستاردا باستالسىن&ra...
