قوش كەلدىڭىزدەر!
ارداقتى اعايىن، قالامداس دوس، ءقادىرلى قوناق، تاتار باۋىرلار!
تاتار حالقىنىڭ وسكەلەڭ ونەرى مەن ارشىندى ادەبيەتىنىڭ اپتاسىن وتكىزۋگە كەلگەن ونەرپاز دوستار!
دارىندى، ونەرلى، ونەگەلى حالىقتىڭ جان قازىناسىن جاساۋشى تاتار مادەنيەتىنىڭ قايراتكەرلەرى!
ەجەلدەن توسكەيدە مالى، توسەكتە باسى وزدەرىڭمەن بىرگە بولعان قازاق حالقى بۇگىن مىناۋ استاناسى الماتىدا، اباي كۇمبەزىندە: «قوش كەلدىڭ، باۋىرىم، قوناعىم! ءتوردىڭ توبەسىنە شىق!» — دەپ، قازاقشا قۇشاق جايىپ قارسى الادى.
قازاقتىڭ وكتيابردەن بۇرىنعى وزىق ويلى اقىندارىنىڭ ءبىرى سۇلتانماحمۇت تاتار مادەنيەتىن قازاق حالقىنا ۇلگى-ونەگە ەتىپ كورسەتكەن-دى:
«اناۋ قىردا تاتار تۇر،
باسقالارمەن قاتار تۇر...» دەگەن بولاتىن.
ۇلى وكتيابر قايتا تۋعىزعان حالىقتار سانىندا شارۋاسى شالقىپ، ونەرى وركەن تاۋىپ، مادەنيەتى مارقايعان تاتار، قازاق حالىقتارى بۇل كۇندە جاڭا ساپالى دوس، جاڭا ساپالى تۋىس. تاتار حالقى دا، قازاق حالقى دا بۇل كۇندە سوۆەت حالىقتارىنىڭ ماڭگى دوستىق ۇيىمىنىڭ تەرەزەسى تەڭ، ساناتتى، ساپالى مۇشەلەرى؛ بۇل كۇندە بۇل ەكى تۋىسقان حالىقتىڭ ونەرلىك قازىناسى بۇكىل سوۆەتستان مادەنيەتىنىڭ ۇلى مۇحيتىنا قۇياتىن ەدىل مەن ەرتىس سياقتى. حالىقتار اراسىنداعى دوستىق پەن بىرلىكتى نىعايتا بەرەر، تابىستىرا، جىمداستىرا، كىرىكتىرە بەرەر مىقتى دانەكەر دە وسى ادەبيەتتەر، كوركەمونەرلەر دوستىعى، تۇتاستىعى، جاراستىعى.
قازاق حالقى تاتار حالقىنىڭ عابدوللا توقاي، ءماجيت عافۋري، عاليمجان يبراھيموۆ، مۇسا ءجاليل، احمات ەريكاي، شايحي ءماننۇر، احمەت فايزي، ناجمي سياقتى مارقۇم جازۋشىلارىن جانە قازىرگى عۇمار باشيروۆ، حاسان تۋفان، ابدراحمان ءابسالياموۆ، ناقي ءيسانبات، زاكي نۋري، سيبعات حاكيم، نۋري ارىسلانوۆتاردى انا تىلىندە جاقسى كورىپ وقيدى. سول سياقتى قازاق روماندارى مەن داستاندارىن، ولەڭدەرى مەن اڭگىمەلەرىن تاتار حالقى دا سۇيسىنە، سۇيىنە وقيدى. سوندىقتان دا ءبىز ءاربىر سوۆەت جازۋشىسىن تەك ءوز ۇلتىنىڭ عانا جازۋشىسى عانا ەمەس، بۇكىل سوۆەت حالىقتارىنىڭ جازۋشىسى دەپ بىلەمىز. وسىنىڭ ءوزى تۋىسقان حالىقتاردىڭ اراسىنداعى شىن دوستىقتىڭ ايقىن ءبىر كورىنىسى سياقتى.
وسى استانادا، الماتىدا، اباي تەاترىندا ءماجىلىسى اشىلىپ، مامىلەسى باستالىپ وتىرعان تاتار ادەبيەتى مەن كوركەمونەرىنىڭ قازاقستانداعى اپتاسى سول ۇلى دوستىقتىڭ، ماڭگى بىرلىكتىڭ، تۋىستىقتىڭ ءبىر نىشانى، سوۆەت حالىقتارىنىڭ اراسىندا تۋعان جاڭا ءراسىم، جاقسى ءداستۇر، جارقىن سالت. ءوزارا تانىسۋ-تابىسۋ، سىرلاسۋ، اقىل قوسۋ، ونەر ءوسىرۋ سالتى. ىرىستى — اۋىس، ونەردى — جۇعىس ەتەر سالت.
سول سالت بويىنشا ەلىمىزگە كەلگەن تاتار ادەبيەتى مەن ونەرىنىڭ مەرەكەسى قۇتتى بولسىن!
قالامداستار دوستىعى — حالىقتار دوستىعى!
سول دوستىق جاساسىن!
1962
You Might Also Like
-
وزىنە-وزى عانا ەمەس-اۋ، بۇكىل الەمگە ءولىم، اپات ازىرلەۋشىلەر دە ادام با؟ ادام دەگەن ۇلى اتتان ساداعا كەتسىن ولار. زاۋەدە سوعىس بولا قالسا، بۇرىنعى سوعىستار مۇنىڭ قاسىندا انشەيىن توبەلەستاعى. امەريك...
-
ءبىزدىڭ رۋحاني مادەنيەتىمىز جالاڭ تاقىردا وسپەگەنىن، ونىڭ تەرەڭ تامىرى، نەگىزى پروگرەسسيۆتىك مادەني داستۇرىمىزدە جاتقانىن بۇگىن تاعى دا اتاپ ايتقىم كەلەدى.
