قىزمەتكەرلەر دايارلاۋ
قىزمەتكەرلەر دايارلاۋ دەگەن ماسەلەنىڭ نەگىزى وقۋدىڭ ءار بۇتاعىن، ءار تاراۋىن كۇشەيتۋ دەگەن ماسەلە بولىپ شىعادى.
ازىق-تۇلىك ىستەرىنە قىزمەتكەرلەر كەرەك بولسا، اقشالاي سالىق ىستەرىنە، قازىنا ىستەرىنە قىزمەتكەرلەر كەرەك بولسا، ميليسيا، سوت، دەنساۋلىقتى ساقتاۋ، اۋىل شارۋاشىلىق، جەر-سۋ، مال ءوسىرۋ، ونەركاسىپ ءام باسقا ءتۇرلى ىستەردىڭ قاي-قايسىسىنا قىزمەتكەرلەر كەرەك بولاتىن بولسا، حات بىلەتىن ادامدارعا كەلىپ تىرەلەدى. ال حات بىلەتىن ادامداردىڭ كوپ، از بولۋى جالپى حات ءبىلۋدىڭ از، كوپ بولۋىنا قاراي بولادى.
قازاقستاننىڭ جالپىسىن العاندا 100 ادامنان 3-اق ادامى حات بىلەدى.
بۇلاي بولعان سوڭ كەڭەس ۇكىمەتىنە ءتۇرلى قىزمەتكەرلەر دايارلاپ شىعارۋعا ءبىزدىڭ قازاقستاندا وتە قيىن.
ويتكەنى ءار ءتۇرلى ىسكە قىزمەتكەرلەر دايارلاعاندا الگى ايتقان 100 ادامنىڭ ىشىندەگى حات بىلەتىن 3 ادامدى ۇستاپ، سولاردى دايارلاپ شىعارماق بولاسىڭ. قازىرگى مەكتەپتەردەگى 8 جاسار بالالار قاشان وقىپ، ونەردىڭ ءاربىر تاراۋىنا ءبولىنىپ وقىپ شىققان سوڭ وسى كۇنگى ءتۇرلى قىزمەتكەرلەرگە سۋساپ وتىرعان مەكەمەلەرگە كىرەر دەپ وتىرۋعا بولمايدى. ءقازىر سول جوعارعى ايتقانداي الگى جالپى 100 ادامنىڭ ىشىندەگى حات بىلەتىن 3 ادامدى ءار ءتۇرلى كۋرستارعا جيناپ، سولاردى ءتۇرلى قىزمەتكە دايارلاۋعا تۋرا كەلەدى.
مىنە، سول ماقساتپەن كەڭەس ۇكىمەتى ورناعالى تالاي ءبىر ايلىق، ەكى ايلىق، ءۇش ايلىق، التى ايلىق ءتۇرلى كۋرستار اشىلىپ كەلە جاتىر.
كەڭەس ۇكىمەتى ورناعالى ەڭ بۇرىن اشىلعان، ەڭ كوپ اشىلعان كۋرستار — مۇعالىمدەر كۋرستارى. ويتكەنى حالىققا ەڭ كەرەكتى ءىس، ءبىرىنشى دارەجەدەگى مۇقتاج ءىس — حات بىلەتىن ادامداردىڭ سانىن كوبەيتۋ. حات بىلەتىن ادامداردىڭ سانىن كوبەيتۋ ءۇشىن مەكتەپتەردە بالا وقىتاتىن مۇعالىمدەردىڭ سانىن كوبەيتۋ كەرەك. مىنە، سول سەبەپتى ءبىزدىڭ قازاقستاندا پاتشا ۇكىمەتى جويىلعالى ەڭ بۇرىن، ەڭ كوبىرەك اشىلعان كۋرستار مۇعالىمدەر دايارلاۋ كۋرستارى بولدى. باسقا قىزمەتتەر ءۇشىن كۋرستار اشۋعا مۇرشا كەلمەي جاتتى. ەندى ءقازىر وسى ۇستىمىزدەگى جىلدىڭ باسىنان بەرى ءبىزدىڭ قازاقستاندا ءارتۇرلى قىزمەتتەر ءۇشىن دە كۋرستار اشىلا باستادى.
1) قالالاردا ميليسيانىڭ باستىقتارىن دايارلاۋعا كۋرستار اشتى.
2) ورىنبوردا ازىق-تۇلىك كوميسسارياتى سالىق ينسپەكتورلارىن دايارلايتىن كۋرستار اشىپ ءبىتىردى.
3) ورىنبوردا قازاقستاننىڭ ىشكى ىستەرىن باسقاراتىن كوميسسارياتى، ۋەزدىك ميليسيانىڭ باستىقتارىن دايارلاپ شىعاراتىن كۋرس اشىپ جاتىر.
4) قازاقستاننىڭ وقۋ كوميسسارياتى ورىنبوردا، ءام اقمولادا، سەمەيدە قازىرگى مۇعالىمدەردى پىسىقتاپ شىعاراتىن كۋرستار اشىپ جاتىر. جانە وقۋ كوميسسارياتى، باسپاحانالاردا قازاقشا ءارىپ تىزۋشىلەردى دايارلاپ شىعاراتىن كۋرس اشىپ جاتىر.
5) ورىنبوردا قازاقستاننىڭ زاڭ كوميسسارياتى حالىق سوتتارىن دايارلاپ شىعاراتىن كۋرس اشىپ جاتىر.
6) بيىل قازىنا كوميسسارياتى دا ورىنبوردا كۋرس اشپاق.
7) دەنساۋلىقتى ساقتاۋ كوميسسارياتى دا كۋرس اشپاق.
قازىرگى ءبىزدىڭ تۇرمىسىمىزدىڭ اعىنى تىعىز زامانىمىزدا ەكى، ءۇش ايلاردا ءارتۇرلى قىزمەت ءۇشىن بارىنشا حات بىلەتىن ادامداردى جيناپ الىپ، كۋرستاردا وقىتىپ، كەرەكتى قىزمەتكەرلەر دايارلاپ شىعارۋ ءىسى وتە تىعىز، وتە كەرەكتى ءىس. بۇعان قازاقستاننىڭ ورتالىعىندا وتىرعان ءىس باسىنداعى ادامدارى دا، ءام جەر-جەرلەردەگى ءىس باستارىندا وتىرعان ادامدار دا شىنداپ نازارلارىن سالىپ، اياماي كومەكتەرىن كورسەتۋى كەرەك. كەيبىر گۋبەرنيالار زاڭ كوميسسارياتىنىڭ اشىپ جاتقان كۋرسىنا ادام جىبەرمەي قالىپ وتىر.
ماسەلەن — ورال گۋبەرنياسى مەن سەمەي گۋبەرنياسى. قازاقستاننىڭ قىزمەتكەرلەر دايارلاۋ ىسىنە گۋبەرنيالىق يسپولكومداردىڭ مۇنداي سالقىن جۇزبەن قاراپ وتىرۋلارى ءبىر ءتۇرلى ايانىشتى ءام ناداندىق!
ءالى كۇنگەشە ناداندىق تۇمانىندا جاتقان قازاقستاننىڭ تۇرمىسىنىڭ ءاربىر ءتۇرلى تاراۋىنا كەرەكتى قىزمەتكەرلەردى تەز دايارلاپ، تاربيەلەپ شىعارا الماساق، كوپكە شەيىن قازىرگى ناداندىق تۇمانىندا جاتپاقپىز.
بۇل ەستە بولۋ كەرەك.
جانە قازاقستاننىڭ كۋرس اشاتىن مەكەمەلەرىنىڭ ەستەرىنە سالاتىن ءبىر كەرەكتى ماسەلە بار. ول ماسەلە سول كۋرستارداعى ادامدارعا كۋرستى ءبىتىرىپ، ءتيىستى قىزمەتتەرىنە كىرگەندە كەڭسە قىزمەت ىستەرىن قازاق تىلىندە جۇرگىزۋدى ۇيرەتە كەتۋ. بۇل ءاربىر كۋرستا ۇيرەتىلىپ ءوتىلسىن. جانە گۋبەرنيالىق يسپولكومدار قازاقشا حاتشىلىق كۋرستار اشۋلارى كەرەك.
بارلىق قازاقستان جالپى ىنتامەن كىرىسسە، قىزمەتكەرلەر دايارلاۋ ءىسى تەز العا باسپاق.
28.06.1923 جىل
You Might Also Like
-
جاقىن ارادا قازاقستاننىڭ ورتالىق كوميتەتىنىڭ (قازوركومنىڭ) 2-جالپى جيىلىسىندا ايماقتىق بيۋدجەتى (كىرىس-شىعىس ەسەبى) قارالىپ ءوتتى.
