InfoHub Logo

ەلەكتر جارىعىنىڭ ۋاقىتشا شەكتەلىپ تۇرۋىنا بايلانىستى ۇستەل ۇستىندە جەز قوڭىراۋ تۇرار ەدى. جەز قوڭىراۋ - وسى قالپىندا موپ-موماقان.

ال قابىرعا ساعاتىنىڭ ۇزىنشا ءتىلى ەرەگىسكەندەي ون ءبىر دەگەن سيفردىڭ ۇستىندە ۇزىنىنان سۇلاپ ءتۇسىپ جاتىپ الادى. دەمەك، قوڭىراۋعا ءالى 5 مينۋت ۋاقىت بار دەگەن ءسوز. ءمۇعالىم ءۇشىن ءار مينۋت باعالى. ەگەر كەڭسە قىزمەتكەرىنىڭ جۇمىس ۋاقىتىسى ساعاتپەن ەسەپتەلەتىن بولسا، ءمۇعالىمنىڭ جۇمىس ۋاقىتىسى - مينۋتپەن ەسەپتەلەتىن بىردەن-بىر ماماندىق.

ساعاتتىڭ سەكوند ءتىلى مەنسىز قايدا باراسىڭدار دەگەندەي، ساعات بەتىندە تىرس-تىرس ەتىپ، تىنىمسىز جۇگىرەدى. ول ساعات بەتىن ءوز باعىتىمەن ءبىر اينالىپ شىققاندا بارىپ، ۇزىنىنان سۇلاپ ءتۇسىپ جاتقان ساعات ءتىلى ەرىنە العا جىلجىر ەدى. ءتورت مينۋت. ءۇش. ەكى...
وسى كەزدە كەزەكشى مۇعاليما ۇستەل ۇستىندەگى قوڭىراۋعا قول جۇگىرتەدى. ول قوڭىراۋدىڭ شىعىرشىعىنان ساۋساعىمەن ءىلىپ العان ساتتە-اق، الگىندە عانا موپ-موماقان بولىپ كورىنىپ تۇرعان جەز قوڭىراۋ ويىن تىلەگەن بالاداي ويناقتاپ سالا بەرەر ەدى. قۇددى شاكىرتتىڭ ءوز مىنەزى سەكىلدى.

مۇعاليما ەسىكتى اشىپ، سىرتقا بەتتەي بەرگەن ساتتە-اق، تەنتەك قوڭىراۋ اقىرى ءوز دەگەنىن جاساپ ۇلگەرەدى. ونىڭ ورتاسىنداعى ۇزىنشا ءتىلى قابىرعاسىنا بارىپ سوعىلادى. بار بولعانى ءبىر-اق مارتە سوعىلۋىنىڭ ءوزى جەتكىلىكتى. داۋىس تىم الىسقا كەتەدى.
وسى كەزدە سىرتتا تۇرعان وقۋشىلار ىشكە قاراي لاپ قويار ەدى. سەبەبى شاكىرت ساناسى قوڭىراۋدىڭ ءامىرلى ۇنىنە باعىنىپ ۇيرەنگەن.
ءدال وسى ساتتە كىشكەنتاي، ءتىل العىش، ەلگەزەك قىزدار كەزەكشى مۇعاليمانىڭ قولىنداعى قوڭىراۋعا جارماسادى: "اپاي! اپاي! ماعان بەرىڭىزشى! سىرتقا مەن سوعايىنشى! ماعان بەرىڭىز!"

ولاردىڭ قوڭىراۋدى وزىنە جۇلا-مۇلا تارتقاندىعى سونشالىق، ءتىپتى كەزەكشى مۇعاليما شىعىرشىقتان ساۋساعىن ارەڭ سۋىرىپ ۇلگەرەر ەدى.
كىشكەنتاي، ءتىل العىش، ەلگەزەك قىزدار سول بەتىمەن جۇگىرە باسىپ، مەكتەپ باسقىشىنىڭ ۇستىندە تۇرىپ الىپ قوڭىراۋدى ۇزاق سىڭعىرلاتادى. ولار ءتىپتى وزدەرى دە كەلە جاتىرعان اق كويلەك كيگەن ۇلدارعا "اسىقساڭشى!" دەر ەدى نىعىزداي سويلەپ.
قوڭىراۋدىڭ سىڭعىرلاعان ءۇنى "ساباققا!"، "ساباققا!"، "بىلىمگە!"، جوق بىلىمگە عانا ەمەس-اۋ، بولاشاققا شاقىرىپ تۇرعانداي.
سالدەن كەيىن ءبارى دە تىنىشتالا قالادى.

تەك اشىق تۇرعان سىنىپ ەسىكتەرىنەن ساباق بەرىپ جاتقان ءمۇعالىمنىڭ وزىنە عانا تانىس جانە سول پاننەن ساباق بەرەتىن باسقا دا ارىپتەستەرىنە جات ەمەس، وزگە ءپان مۇعالىمدەرىن ونشا-مۇنشا قىزىقتىرا قويمايتىن، وسى پانگە عانا ءتان الدەبىر سوزدەر ەستىلىپ قالىپ جاتار ەدى.

---