InfoHub Logo

جازۋشىلاردىڭ جۋىردا كرەمل سارايىندا وتكەن ءۇشىنشى سەزى ادەبيەت جايىن التى كۇن اڭگىمە ەتتى. سوۆەت ەلىندەگى، سوسياليستىك، كاپيتاليستىك سىرتقى ەلدەردەگى ۇلىلى-كىشىلى حالىقتاردىڭ ءبارىنىڭ دەرلىك سەزگە ادەبيەت وكىلدەرى قاتىناستى. ءتۇرى، ءدىنى، ءتىلى ءارقيلى ادامدار باس قوسقان وسى ۇلكەن جيىن سوۆەت ادەبيەتى دۇنيە جۇزىندە ەڭ الداعى ادەبيەت ەكەنىن تاعى دا ءبىر ايگىلەدى. سوسياليستىك رەاليزم ءادىسى ءومىر شىندىعىنا، ماركس، لەنين عىلىمدارىنا سۇيەنەدى، جازۋشى مەن حالىقتىڭ جۇبىن جازبايدى. سوندىقتان سوۆەت ادەبيەتى قوعام ءومىرىنىڭ ايناسى، قوعامىمىزدى باستاۋشى پارتيانىڭ وزىق ويى — جارشىسى بولىپ كەلەدى.

قازىرگى قازاق ادەبيەتى ءومىرشىل سول ۇلكەن ادەبيەتتىڭ، گۇلدەنگەن جۋان ءبىر بۇتاعى -لەنيندىك سىيلىق الىپ وتىرعان مۇحتار اۋەزوۆتىڭ اباي تۋرالى، اباي زامانى تۋرالى ءتورت كىتابىن ماقتان ەتەمىز. ايتسە دە، تابىستان تالاپ ۇلكەن. حالىقتىڭ رۋحاني تىلەگى كۇن ساناپ ءوسىپ بارادى. قىزىقتى كينو كارتينالاردى كوبىرەك سۇراپ جاتىر. ول ءۇشىن الدىمەن قىزىقتى كينوسەنارييلەر جازۋ كەرەك. جاقسى سپەكتاكلدەر سۇراپ جاتىر. ول ءۇشىن الدىمەن جاقسى پەسا جازۋ كەرەك. ال، جازۋ دەگەن ءسوز اۋەلى ءومىردى، ادامدى ءبىلۋ دەگەن ءسوز. ءبىز بەتتەپ بارا جاتقان كوممۋنيزم ەشكىم كورمەگەن جاڭا دۇنيە. ونى جاساۋشى ادامدار دا جاڭا. ءومىرىمىز، ادامدارىمىز سونشالىق شاپشاڭ وسۋدە، وزگەرۋدە، كوزدەن تاسا قىلساڭ-اق شاتاساسىڭ. سوندىقتان، بۇگىنگى تاقىرىپقا جازۋدى، بۇگىنگى ءومىردى كوز جازباي زەرتتەپ وتىرۋدى سەزد باسا ايتتى.

ءبىرسىپىرا قازاق جازۋشىلارىنىڭ باسىنان ءبىر جالعان ۇعىم قالماي ءجۇر. ولارشا، ادەبيەتتىڭ شاعىن تۇرلەرىن شاعىن جازۋشىلار عانا جازاتىن سياقتى. شىنىندا شىعارما كولەمىن ەمەس، كوركىمەن، سالماعىمەن باعالانادى. كولەمى كىشى شىعارمالارىمەن-اق ۇلكەن جازۋشى بولعاندار از با؟ بىزدە ءالى كۇنگە ءوزىن تانىتقان شەبەر اڭگىمەشى، فەلەتونشى، ءان تەكستەرىن جازۋشى، وچەركشىلەر جوقتىڭ قاسى. بۇل سول جالعان ۇعىمنىڭ سالدارى بولۋى مۇمكىن.

پارتيا، ۇكىمەت باسشىلارىنىڭ سەزگە قاتىناسۋى، دوستىق، جىلى سوزدەرى، بەرگەن كەڭەسى ادەبيەتشىلەردىڭ ويىن كەڭىتە، شابىتىن ارتتىرا ءتۇستى. جازۋشىدا شابىت بولسا ءبارى بولادى.

---