سوعىم
بۇگىن نارتايلاردىڭ ۇيىندە كىشىگىرىم مەرەكە. سوڭعى كەزدەرى «سوعىم» دەگەن ءسوز كوپ ەستىلىپ ەدى، ەندى سونى كوزبەن كورەتىن ۋاقىت جەتىپتى. قالاي ەكەنىن ءوزى دە بىلمەيدى، بۇرىنعى سويعان سوعىمدار ەسىندە قالماپتى.
ەرتەڭگىلىك شايىن ءىشىپ، دالاعا شىعىپ ەدى، ەسىك الدىندا توبەدەي كەر ات بايلاۋلى تۇر ەكەن. سوعىم وسى بولار دەپ توپشىلادى. ەسىك الدىنا ءبىراز ادام جيىلىپ قالىپتى. كوبى كورشىلەر، كەيبىرى اكەسىنىڭ دوستارى. جالاڭداتىپ پىشاق قايراپ، تاعى بىردەڭەلەر ىستەپ، ابىگەر بوپ جاتىر.
قاستارىنا بارىپ سالەم بەردى. سالەمىن العانمەن، اسا ەلەمەدى. بار نازارلارى كەر اتتا. «جاقسى سەمىرگەن ەكەن» دەيدى بىر-بىرىنە قاراپ. وسى سوزدەردەن نارتاي ءوز بولجامىنىڭ دۇرىس ەكەنىن ءبىلدى. العاشقى قار جاۋعان. ءبىراق كۇن جىلى. نارتايدىڭ اتاسى جۇمىسقا كوپ ارالاسپادى. تەك «انانى الاي ىستەڭدەر، مىنانى بىلاي ىستەڭدەر» دەپ سوعىمشىلارعا جول-جورىق كورسەتىپ ءجۇر.
اتتى جىعۋ وڭايعا سوقپادى. ارتقى اياعىنان شالىپ العان ارقان ءالسىن-الى شىعىپ كەتىپ، ءبىراز اۋرەگە سالدى. اقىرى نارتايدىڭ اتاسىنىڭ ايتۋى بويىنشا، ارقاندى اتتىڭ شاشاسىنا شالمالاپ سالىپ، ارەڭ جىقتى.
جىلقىنى باۋىزدار الدىندا اتاسى ۇزاق دۇعا جاسادى. سوڭىنان «ءاۋمين» دەپ بەتىن سيپادى.
جىلقىنى باۋىزداعان كەزدە اكەسى كەلىپ كوزىن جاۋىپ، كورسەتپەي قويدى. «نەگە؟» دەپ سۇراپ ەدى، «بالا كورۋگە بولمايدى» دەدى. ارى قاراي اتتىڭ تەرىسىن سىپىرۋ باستالدى. بۇل جۇمىس تەز-اق ءبىتتى. پىشاقتارى قىلپىلداعان جىگىتتەر دەمدە ىرەپ تاستادى. ەندى ەتتى بورشالاۋ باستالدى. بۇل جۇمىس ۇيدە اتقارىلدى. بۇزىلعان ەت ىشەك-قارنىمەن قوسىلعاندا، الدىن الا دايىندالعان جەكە بولمەنى الىپ كەتتى. سوعىم سەمىز شىعىپتى. نارتاي مۇنى ۇلكەندەردىڭ اڭگىمەسىنەن ءبىلدى.
— تابان قازى، — دەدى ءبىر اعا بارماعىن كورسەتىپ.
— ودان دا جوعارى، — دەدى تاعى ءبىر اعا كەلىسپەي. — كورەسىڭ. ازدان سوڭ قازى ىشەككە سىيماي اۋرە قىلادى.
ايتقانى كەلدى. توڭازىسىن دەپ دالاعا ءىلىپ قويعان تۇتاس قابىرعانى كوتەرىپ اكەپ، تىلگەندە، قىرتىسىنان مايى كوپ بولىپ، بىلەۋلەنىپ جاتتى. ىشەككە سىيماعان سوڭ جۇقالاپ ءتىلىپ الىپ، شۇجىققا تىقتى. ارالىقتا اجەسى كەلىپ «قۋىرداق» دەپ، ەت سۇراپ ەدى، اكەسى الدىندا جاتقان سۇيەكتىڭ ەتىنەن كەسىپ الىپ بەردى.
انە-مىنە دەگەنشە قۋىرداق تا دايىن بولدى. وسى ارالىقتا كۇن دە باتىپ ۇلگەرىپتى. قىزۋ اڭگىمەمەن اس ىشكەن كىسىلەر «ساۋ بولىڭىزدار؟» دەپ قايتا باستادى. ءدال وسى كەزدە نارتاي بۇرىن كورمەگەن تاعى ءبىر جورالعىعا كۋا بولدى.
— قولۇزدىك، — دەدى اكەسى ەسىككە بەتتەگەن سوعىمشى جىگىتتەرگە ەت سالىنعان ءبىر-بىر قالتا ۇسىنىپ جاتىپ.
* قولۇزدىك — سوعىم نەمەسە جالپى مال سويىسقان ادامعا ءۇي يەسىنىڭ سول سويىلعان مالدىڭ ەتىنەن شيكىدەي بەرەتىن سىباعاسى. «قولۇزدىكتى» ەلىمىزدىڭ كەيبىر جەرلەرىندە «قولكەسەر» دەپ تە اتايدى.
You Might Also Like
-
تاۋعا اپاراتىن جالعىزاياق جول نارتايلاردىڭ اۋىلىنىڭ شەتىندە. ونىمەن كوبىندە ويعا تۇسكەن مالشىلار، كەيدە مىلتىق اسىنعان اڭشىلار وتەتىن.
-
نارتاي بۇگىن ۇيدەن جالعىز شىقتى. بەتالىسى كورشىلەرى ەرلان اعالارىنىڭ ءۇيى. ارا جاقىن، ءازىر-اق جەتىپ بارادى.
