InfoHub Logo

— سەندەرگە بىردەڭە ايتسا، «الجىعان ادامنىڭ ءسوزىن ايتىپ، وسى زاماندا» دەپ ءوزىمىزدى ماڭگۇرت دەيسىڭدەر. بوسا دا باستاعان سوڭ سەنسەڭدەر دە، سەنبەسەڭدەر دە ايتايىن.

وسىدان ەكى اپتا شاماسىندا بىرنەشە قاتىن باس قوسىپ، ەت كومبيناتىنا ەت الۋعا باردىق. وسى جاقىن ماڭدا بەس بيەنىڭ سابىنداي، وڭ جاق كوزى جىبىرلاپ جۇرەتىن ءبىر جەسىر قاتىن بار، سو دا بىزبەن بىرگە باردى. ءبىز ەت كۇتىپ، وندا قىرۋار ۋاقىت ءجۇرىپ قالدىق. ءسويتىپ، شەتكەرىرەك ءجۇرىپ كەلە جاتىر ەدىك، ءبىر مەزەتتە الگىنىڭ اۋزى سول جاعىنا قاراي قيسايا باستادى دا، الدەن سوڭ الگى قيسىق اۋىز بولدى دا قالدى. ەت الۋ تۇرماق، زارەمىز
كەتتى.

سول ايەل:

— مىنا ءبىزدىڭ ار جاعىمىزدا تۇراتىن ءپىرادارعا اپارىپ كورسەت، — دەپ جالىنىپ، جالپايىپ ماعان كەلدى. اياعاننان الىپ باردىم. ءپىرادار:

— بىردەڭە دەگەن سۋ پەرىسى سوققان ەكەن. ەمدەۋىنە (اقىسى) ءبىر قوي بايلادىم، — دەدى. سودان كەيىن ەمدەپ، بەتىن بەرى قاراتىپ (تۇزەپ) بەردى. ءقازىر ءسال عانا كەمدىگى بايقالادى. مۇلدە تۇزەتتىرۋگە پۇل بەرمەگەن سوڭ، بارۋعا بەتى بولماي ءجۇر. نانباساڭ، سول قاتىننىڭ ءوزىن دە، ءپىراداردى دا كورسەتەيىن. جانە ءبىر ايتقانى:

— شىراعىم، ءوزىڭ ەركەكتى جاقسى كورىپ، كورىنگەن ەركەككە ءولىپ-وشىپ تۇرادى ەكەنسىڭ. ودان اۋلاق بولعايسىڭ. سۋ پەرىسىنىڭ جۇرمەيتىن جەرى جوق. سوندىقتان تازا ءجۇرىپ ساقتانعاندارىڭ ءجون، — دەدى.

باسقا نە دەيىن، بۇل كىسى وتە بىلىكتى ادام، وقىمىستى، پەرى وقۋىن وقىعان. قازاقتاردىڭ ايتۋىنشا، قارا سۋدى تەرىس اينالدىرادى دەسەدى. ءوز ءبىلۋىم — الدىنا بارعانىڭدا سەنەن ول ەشتەڭە دە سۇرامايدى. وتكەن-كەتكەن ءومىرىڭدى، نە بولدى، نە قويدى، نە بولعالى جاتىر (ءوزىڭ تۋرالى) ايتىپ بەرەدى. ايتەۋىر ءبىر عاجاپ جان، جاسى ءقازىر جەتپىستەردە، بالاسى ءولىپ، قازالى بوپ قالدى.

---