يمانعالي، دۇيسە، ءاجىعالي
1914 جىلدار شاماسىندا قامىس سامارعا پراۆيتەل بولىپ ءبىرىنشى وكرۋگتىڭ ادايى ءاجىعالي شىنتاي ۇلى كەلدى. ونىڭ پوموششنيگى يمانعالي مەڭدىحانوۆ بولىپتى. ءاجىعاليدىڭ وقۋى از، ال يمانعالي — كوپ وقىعان، بۇرىنعى سەميناريست. ەكەۋى قالايدا سيىسا المايدى. يمانعالي ءاجىعاليدى ارىزداپ قۋادى. ونىڭ زارارىنا ءسوز ايتۋعا تاڭمەرگەن جانقوجاۇلىن، تاستانبەك جەلدىبايۇلىن، دۇيسە تۇلكىبايۇلىن، سۇندەتقالي
نۇرسارىۇلىن ايعاق ەتىپ كورسەتەدى. سول كۇندەگى ەل ادامدارى ءاجىعالي يمانعاليدى تاتۋلاستىرۋعا اراعا ءجۇرىپ كەلىستىرمەكشى بولادى. يمانعالي اشۋىن تاستايدى. تەك شارت قويادى. ونىسى ءتورت ءبيدىڭ وزىمەن بىرگە بولۋىن تالاپ ەتەدى. بيلەر تورتەۋىن شاقىرادى. دۇيسە ماجىلىسكە كەش كەلىپ قالادى. ءاجىعالي ۇيىندە قوناق بولىپ، ءبارى كەڭسەگە ءبىتىم قاعازعا قول قويىپ، ءىستى كەسۋگە شىعادى. دۇيسە قوزعالماي وتىرا بەرەدى. بەستابايلار اياق كيىمىن سالىپ دىڭكىلدەپ تۇرادى. قايتا-قايتا:
— دۇيسەكە، كەڭسەگە بارايىق؟ — دەيدى. سوندا دۇيسە ءسوز باستاپ بىلاي دەپتى:
— بۇقا بۋعا اسىق، تەنتەك داۋعا اسىق. قۇلاعان قۇس قۋعا اسىق، قۋ سۋعا اسىق، وتىرىكتى بىلمەيدى، جاساعان قۇداي شىنعا اسىق. اتقا مىنسەڭ، شىدەر سال، شىدەر سالساڭ، تيەك سال. ەگەر تيەك سالماساڭ، اتىڭنىڭ كەتۋى شىن، اشىق، قاسىعىڭدى مايعا سال، اۋزىڭدى جىرتار نۇر قاسىق، — دەپتى.
ءاجىعالي اراداعى بيلەرگە:
— دۇيسەكەمدى رازى قىلماعان ەكەنسىڭدەر، — دەپ، جانىنان جيىرما بەس سوم شىعارىپ بەرەدى. دۇيسە تۇرەگەلىپ:
— ەندى كەبىسىمدى سالماساڭدار دا، ءوزىم كيىپ بارام، — دەپ كەڭسەگە جونەلەدى.
You Might Also Like
-
كەشەگى سوعىس جىلدارىندا حالىق بارلىق ازىق-تۇلىكتى مايدانعا بەرىپ، وزدەرىنىڭ ۋاقىتشا بولسا دا اشىعۋىنا تۋرا كەلدى. مىنە، وسى ۋاقىتتا كەدەي رۋىنىڭ بەكتۇرسىن دەگەن كىسىسى ءبىر قويان تۇتىپ الىپ، ۇيىنە اك...
