سۇراۋعا جاۋاپ
«تار جول، تايعاق كەشۋ» كىتاپ بولىپ باسىلىپ شىققالى ءار جەرلەردەن، اركىمدەردەن الدەنەشە حات الدىم. بۇل حاتتاردى جازۋشىلار مەنەن «تار جول، تايعاق كەشۋ» تۋرالى ءار ءتۇرلى سۇراۋلار سۇرادى. جانە كىتاپتى وقىعان ادامداردىڭ كەيبىرەۋلەرى وزىممەن جۇزدەسىپ جولىققاندا دا، اۋىزشا دا ءار ءتۇرلى ساۋالدار قويادى.
ءبارىن قورىتىپ كەلگەندە «تار جول، تايعاق كەشۋ» تۋرالى مەنەن سۇرايتىن وقۋشىلاردىڭ سۇراۋلارى مىنا تومەندەگىلەر:
«تار جول، تايعاق كەشۋدىڭ» باسىلۋى تۋرالى.
1. كىتاپ نەگە جاقسى قاعازعا باسىلماعان؟
2. نەگە جاڭىلىستارى كوپ؟
3. نەگە سونشا قىمبات؟ (3 سوم 70 تيىن).
4. قازاقتىڭ جالپى ەڭبەكشىلەرى تۇگەل وقيتىن كىتاپتى سونشا قىمبات قىلعاننان كىمگە پايدا؟
«تار جول، تايعاق كەشۋدىڭ» ەندى ءوزى تۋرالى.
5. باسقا گۋبەرنيالاردا بولعان ۋاقيعالار نەگە تۇگەل، تولىق جازىلماعان؟!
6. اكتاردىڭ، «الاشورداشىلاردىڭ» جاۋىزدىقتارى نەگە ءتيىستى جازاسىن تارتپادى؟
7. شوقايەۆتىڭ سۋرەتى نەگە باسىلماعان؟
8. كەيبىر اقتارعا قىزمەت قىلعاندار سوۆەت ۇكىمەتىنە تىلەكتەس ءتارىزدى بولىپ كىتاپقا كىرىپ كەتكەنى قالاي؟
9. سوۆەت ۇكىمەتىنە زور قىزمەت قىلعان كەيبىر ازاماتتار نەگە تولىعىراق جازىلماعان؟
10. «تار جول، تايعاق كەشۋدىڭ» ەكىنشى كىتابى شىعا ما؟ شىقسا قاشان شىعادى؟
11. سوۆەت ۇكىمەتىنىڭ جولىندا دۇشپاندارمەن مايدانداسقان، ولگەن، قىزمەت قىلعان، حاتتا، سول جولدا قۇربان دا بولعان كەيبىر ازاماتتاردىڭ سۋرەتتەرى نەگە كىرمەي قالعان؟
12. «تار جول، تايعاق كەشۋدە» اقتاردىڭ، الاشورداشىلاردىڭ» بەلسەندى، الاسۇرعان باستىقتارى بولعان كەيبىرەۋلەرى ءقازىر نەگە ۇلكەن ورىنداردا ءجۇر؟
مىنە وزگە ۋاق-تۇيەك سۇراۋلاردى قوسپاعاندا «تار جول، تايعاق كەشۋدى» وقىعانداردىڭ مەنەن سۇرايتىن سۇراۋلارى وسى. ەندى وسىعان قىسقاشا گازەت جۇزىندە جالپىلاما جاۋاپ بەرمەكپىن.
1. كىتاپ نەگە جامان قاعازعا باسىلعان، نەگە قاتەلەرى كوپ، نەگە قىمبات دەگەن سۇراۋلار.
بۇلار ماعان جاتپايتىن سۇراۋلار. بۇعان ول ۋاقىتتاعى قازاقستان باسپاسىنىڭ باسىندا وتىرعان مۇحتار ساماتوۆ جاۋاپ بەرۋى ءتيىس.
جازۋشىنىڭ جۇمىسى — كىتاپتى جازىپ اپارىپ بەرۋ. جاقسىلاپ باسۋ نەمەسە شىم-شىتىرىق قىلىپ باسۋ — باسپاحانانىڭ باسىندا وتىرعان ادامداردىكى.
سول باسپادا سول كەزدە باسىلىپ شىققان مەنىڭ «ەكسپرەسس» دەگەن ولەڭ جيناق كىتابىمنىڭ كەيبىر بەتتەرىنىڭ سوزدەرىن سونشا شىم-شىتىرىق قىلعان. اۋەلى ءوز جازعانىمدى كەي بەتتەرىندە ءوزىم دە ارەڭ وقيمىن. كەي بەتتەرىندە تاستاپ كەتكەن سوزدەرى بار، بۇزعان سوزدەرى دە بار. بۇل — باسپانىڭ كەمشىلىگى. ءبىراق كەي كىتاپتاردى باسپانىڭ باسىنداعى ادام جاقسىلاپ شىعارماق بولىپ قاداعالاسا كىتاپ ءتاۋىر بولىپ تا شىعادى.
ەندى «تار جول، تايعاق كەشۋدىڭ» ءوزى تۋرالى سۇراعان سۇراۋلارعا جاۋاپ بەرەلىك.
5-سۇراۋگا جاۋاپ: باسقا گۋبەرنيالاردىڭ وقيعالارى جازىلماعانى راس. ۋاقيعانى ءوزى كورمەگەن سوڭ ەكىنشى ادامداردىڭ ايتۋلارىنا، گازەت، جۋرنال، باسقا سونداي ماعلۇماتتار كىتاپ جازۋشىنىڭ قولىندا تولىق بولسا جازۋشى سوندا تولىعىراق قىلىپ جازادى. كومەسكى، ءشۇبالى ماعلۇماتتاردى قولدانا المادىم، سول سەبەپتى باسقا گۋبەرنيالاردىڭ ۋاقيعالارى «تار جول، تايعاق كەشۋگە» ونشا تولىق كىرمەدى. ءبىراق كىتاپ شىققاننان بەرى ەداۋىر ماعلۇمات قولىما جينالدى. ەندى ەكىنشىدە كەمدىكتەرى تولىقتىرىلماق.
6-سۇراۋعا جاۋاپ: «الاشورداشىلارعا» سوۆەت ۇكىمەتى بۇرىنعى جازالارىن كەشىرىم قىلعان.
7-سۇراۋعا جاۋاپ: شوقايەۆتىڭ جولداستارىمەن تۇسكەن سۋرەتى وزگەلەرىمەن بىرگە باسپاحاناعا بەرىلىپ ەدى، باسپاحانا ونى ماسكەۋگە جىبەرىپ باسپاعا دايىنداپ (كليشەلەتىپ) العىزىپ ەدى، باسۋعا ۇمىت قالدىرىپتى.
8-سۇراۋعا جاۋاپ: اقتارعا قىزمەت قىلعان كەيبىرەۋلەر سوۆەت ۇكىمەتىنە تىلەكتەس ءتارىزدى بولىپ كىتاپقا بايقاۋسىز كىرىپ كەتكەنى راس. ونى ەكىنشىدە تۇزەتپەكپىن.
9-سۇراۋعا جاۋاپ: ەكىنشىدە كىتاپتىڭ تولىمسىزىراق جازىلعان جەرلەرىنىڭ ءبارى دە تولىقتىرىلماق.
10-سۇراۋعا جاۋاپ: «تار جول، تايعاق كەشۋدىڭ» ەكىنشىسى شىعادى.
ءقازىر كىتاپتى تولىقتىرۋعا ءار جەردەن ماعلۇماتتار جيناپ جاتىرمىن.
11-سۇراۋعا جاۋاپ: توڭكەرىسكە قاتىناسقان كەيبىر ازاماتتاردىڭ سۋرەتتەرى قولىما تۇسپەگەندىكتەن كىتاپقا كىرە الماي قالدى.
ماسەلەن، شايمەردەن ءالجان ۇلىنىڭ، ىسقاق كوبەك ۇلىنىڭ، كولباي توگىسۇلدارىنىڭ سۋرەتتەرىن ءالى دە تابا الماي وتىرمىن. كىمدە-كىمنىڭ قولىندا وسى كىسىلەردىڭ سۋرەتتەرى بولسا، ماعان جىبەرۋىن قولقالايمىن، كەرەك بولسا باسىپ العان سوڭ، سۋرەتتەرىن جىبەرگەن كىسىنىڭ وزىنە تاۋداي العىس ايتىپ قايتارامىن.
12-سۇراۋعا جاۋاپ: «الاشوردانىڭ» بەلسەندى ادامى بولىپ، ءقازىر سوۆەتشىل بولىپ پارتياعا دا ەنىپ جۇرگەندەر بار. ەندى ەڭبەكشىل تاپقا شىن، تازا نيەتپەن قىزمەت قىلۋشىلارعا جول كەڭ، ودان قورقۋعا بولمايدى. ەڭبەكشى تاپتىڭ كوزى — ميلليون.
مىنە ازىرگە جاۋاپتارىم وسى عانا. «تار جول، تايعاق كەشۋدى» وقىعانداردان جانە توڭكەرىس وقيعالارىن جاقسى بىلەتىندەردەن زور ءوتىنىشىم: بەكەرلەرىن، كۇدىكتى سۇراۋلارىن وزىمە تاعى دا جازسىن.
سول ۋاقىتتاعى گازەت، جۋرنال ءتارىزدى ماعلۇماتتار بولسا ماعان جىبەرۋلەرىن قاتتى قولقالايمىن. «تار جول، تايعاق كەشۋدىڭ» ەكىنشىسى تەز دايارلانىپ، دۇرىس، تولىق بولىپ شىعۋى ءۇشىن، مىنە، وسى كۇنگى ءبىرىنشىسىنىڭ تەرىس جازىلعاندارى بار دەۋشىلەر بولسا، كەمىس جازىلعاندارى بار دەۋشى بولسا گازەتتەرگە، «ەڭبەكشى قازاققا» جازۋلارىن، نە وزىمە جازۋلارىن زور ءوتىنىش قىلامىن.
1928 جىل
You Might Also Like
-
كوركەم ادەبيەت تۋرالى سوڭعى كەزدەردە باسپا جۇزىندە تۇرلىشە سوزدەر جازىلىپ ءجۇر. ءبىراق جازۋشىلاردىڭ كوبىنىڭ سوزدەرىن قادالىپ وقىپ قاراعاندا، ادەبيەتكە دۇرىس باعا بەرە المايتىندىعى كورىنەدى. ارينە، ول...
-
كوركەم ادەبيەتكە جەتىك ەمەس ادامنىڭ الدىمەن بىلۋگە ءتيىس ءۇش ماسەلەسى بار.
