تارعاق
تارعاق — ورتاشا ءپىشىندى دالا بالشىقشىسى (سالماعى 230 گ). وسى ادەمى، سىمباتتى قۇستىڭ نەگىزگى ۇيالارى قازاق دالالارىندا ورنالاسقان. قىستا جىلى جاققا ۇشىپ كەتەدى (قىركۇيەكتەن ناۋرىزعا دەيىن). جەردە، شۇڭقىردا ورنالاسقان ۇياسىندا، ساۋىردە 4 شۇبار جۇمىرتقالارىن سالادى. اتالىعى مەن انالىعى كەزەكتەسىپ باسىپ، 3 اپتادان كەيىن مامىقتى بالاپاندارى شىعادى دا، ۇيالارىن بىردەن تاستاپ كەتە بەرەدى.
بالاپاندارى ەرەسەكتەرى سياقتى جاندىكتەرمەن، ياعني شەگىرتكە، قوڭىز جانە اۋىل شارۋاشىلىق زيانكەستەرىمەن قورەكتەنەدى، ءسويتىپ پايداسىن تيگىزەدى. بالاپاندارى 1 ايدان كەيىن ۇشادى. قۋاڭ قازاقستان دالالارى مەن شولدەرىندە بولاتىن بۇل قۇستىڭ سانى سوڭعى ونجىلدىقتا ازايىپ بارادى. سوندىقتان تارعاق قازاقستاننىڭ قىزىل كىتابىنا ەنگىزىلگەن جانە دۇنيەجۇزىندەگى قورعانسىز قۇستاردىڭ ءبىرى بولىپ ەسەپتەلەدى.
سانىنىڭ ازايۋىنىڭ نەگىزگى سەبەپتەرى — جەردى جىرتۋ، دالا لاندشافتىنىڭ باسقا دا وزگەرىستەرى، مالدى كوپ جايۋ، حيميالىق قوسىلىستاردى رەتسىز پايدالانۋ، اڭشىلىق. اۋىل شارۋاشىلىق جۇمىستارىن ەكولوگيالىق تۇرعىدان ۇيىمداستىرىپ، ونى قورعاۋدى حالىق اراسىندا ناسيحاتتاۋ كەرەك.
You Might Also Like
-
تاۋەكەل حان (1582-1598 ج.ج. بيلىك قۇرعان). XVI عاسىردىڭ 90-جىلدارىنان XVII عاسىردىڭ باسىنا دەيىنگى قازاق حاندىعىنىڭ تاريحى شىعايدىڭ ابداللاحقا ءوتىپ كەتۋى، تاۋەكەلدىڭ ودان قالۋى، قازاق سۇلتاندارى قا...
