InfoHub Logo

اۋەلگى زاماندا ءبىر شاھاردا ءبىر قارت پەن كەمپىر بولعان ءبىر نىساپتى تاۋفيقتى ۇلى. كۇندەردە ءبىر كۇن بۇل جىگىت ساپار شىعۋعا ويلاپ اتاسىنان، اناسىنان رۇقسات سۇراعان. رۇقسات الىپ كەتىپ بارا جاتىپ، بۇل جىگىت ءبىر شاھارعا بارىپ كىرگەن. ول شاھار تاس بولعان. ءاربىر ۇيلەرى ءھام نارسەلەرى، كىسىلەرى كەيبىرەۋى وتىن كەسكەن جەرىندە بالتاسىمەن تاس بولعان، ءقايسىبىر ادام وتىن كوتەرگەن بويىنشا تاس بولعان. قايبىرەۋى كوشەدە جۇرگەن كىسى سياقتى تاس بولعان. بۇل شاھاردىڭ نە سەبەپتەن تاس بولعانىن بىلمەي، بۇل جىگىت شاھار بويىنشا جۇرگەن. جۇرە-جۇرە پاتشانىڭ ۇيىنە كەلىپ كىرگەن. پاتشانىڭ ۇيىندە ءبىر ءتىرى ادام كورمەگەن. بولسا دا پاتشانىڭ ۇيىندە ەكى-ۇش ساعات كۇتىپ وتىرعان، ءبىر ادام كورىنەر مە ەكەن دەپ. سول ارادا پاتشا ۇيىنە پاتشانىڭ قىزى كەلگەن. ول قىز بۇل جىگىتتى كورىپ امانداسقان، ءارى سۇراعان «قايدان كەلدىڭ، قايدا باراسىڭ»، – دەپ. بۇل جىگىت ءبارىن باستان-اياق ايتىپ بەرگەن. سونان سوڭ قىز ايتقان: «بىزگە ءبىر جاقسى تازا كىسى كەرەك ەدى، ءۇش ءتۇن پاتشا ۇيىندە دۇعا قىلىپ وتىرۋعا، وسىنداي ءۇش كۇن دۇعا قىلىپ وتىرۋشى بولسا، بۇل شاھاردىڭ حالىقتارى جاڭادان ءتىرىلىپ ءوز تۇرىنە قايتاتىن ەدى»،— دەگەن. بۇل جىگىت قىزدىڭ ءسوزىن قابىل ەتىپ ىرزا بولعان. قىز بەن جىگىت ۋاعدا قىلعان، ەگەر جىگىت ءۇش ءتۇن دۇعا قىلىپ شاھار حالقى ءتىرىلىپ ءوز سۋرەتىنە قايتسا، قىز جىگىتكە تيمەك بولعان. قىز جىگىتكە ءۇش شام بەرگەن دە ءوزى كەتكەن.

بۇل جىگىت شامدى جاندىرىپ دۇعا وقۋعا كىرىسكەن. ءتۇن ورتاسى بولعان سوڭ، بۇل جىگىت جانىنا سونشا كوپ جىندار كەلگەن. جىندار كەلىپ بۇل جىگىتكە دۇعا قىلا باستاعان. كەيبىرەۋى وتپەن ورتەمەكشى بولىپ، كەيبىرەۋى ۇرماقشى بولىپ، كەيبىرەۋى قورقاتىن نارسەمەن قورقىتپاقشى بولىپ، قورقىتىپ قاراعان. بۇل جىگىت ءتىپتى قورىقپاعان. ءتۇن ورتاسى وتكەن سوڭ جىننىڭ ءبارى دە جوق بولعان. تاڭ اتقان سوڭ، بۇل جىگىت جاتىپ ۇيىقتاعان. ءبىر ۋاقىتتان سوڭ پاتشا قىزى بۇل جىگىت جانىنا كەلىپ سۇراعان «قاندايسىڭ» دەپ. جىگىت جاۋاپ بەردى:

— قۇدايعا شۇكىر، قۇدايدىڭ قۇدىرەتىمەن سالامات قالدىم، — دەپ. قىز تاعى كەتتى. ەكىنشى ءتۇن جانە شام جاندىرىپ دۇعاعا كىرىستى. ەكىنشى ءتۇنى بۇرىنعى وتكەن تۇننەن دە قاتتى قورقىنىشتى بولدى. جىگىت ءتىپتى قورىقپادى. ءتۇن ورتاسى اۋعان سوڭ جىندار تاعى دا كەتتى. بۇل جىگىت جاتىپ ۇيىقتادى. ءبىر ۋاقىتتان سوڭ قىز جانە كەلىپ بۇرىنعى سۇراعانداي تاعى سۇرادى. بۇل قىز ءبىراز وتىرىپ كەتىپ قالدى.

ءۇشىنشى ءتۇن بۇل جىگىت جانە شامدارىن جاعىپ دۇعا وقۋعا كىرىستى. بۇل ءتۇن بۇرىنعىدان دا ءتىپتى جامان قورقىنىشتى بولدى. بۇل قورقىنىشتى تىلمەن ايتىپ، قاعازعا جازىپ بىتىرە المايدى. ءتۇن ورتاسى اۋعان سوڭ جىندار كەتتى. جىگىت جاتىپ ۇيىقتادى. ەرتەڭگىسىن قىز جانە كەلگەن ەدى، جىگىتكە ايتقان:

— اي، جىگىت، سەن ءۇش ءتۇن ماشاقات شەكتىڭ، ءتورتىنشى كۇن جانە دۋالعا جازىپ قوي، حالىقتىڭ ناعىپ تىرىلگەنىن. ەگەر دە ولاي ەتپەسەڭ مەنىڭ اتام اشۋلانار. كىم مۇنداي ىستەدى دەپ.

قىز ايتۋىنشا، ءتورتىنشى ءتۇن وتكەن سوڭ تاڭ اتقاندا ءاربىر حالىقتار ءتىرىلىپ جۇرە باستادى. پاتشا دا ءتىرىلىپ ءوزىنىڭ ۇيىنە كىرگەن ەدى. اشۋلانىپ سۇراعان: «كىم بۇل ءىستى ىستەگەن؟» — دەپ. سول ارادا دۋالداعى جازۋدى وقىپ كورگەن. سول ۋاقىتتا پاتشانىڭ قىزى اتاسى جانىنا كەلىپ، اتاسىنا ايتقان:

— مىنە، وسى جىگىت ءۇش ءتۇن دۇعا قىلىپ، سىزدەردى ءتىرىلتتى. پاتشا قىزىنان سۇراعان:

— ول جىگىتكە نە بەرمەكشى بولدىڭ؟ — دەپ. پاتشا قىزى ايتقان:

— ەگەر سىزدەردى تىرىلتسە، ءوزىم تيمەك بولدىم، — دەگەن. پاتشا بۇل جىگىتتى ءتىپتى جاقسى كورىپ، قىزىن بەرمەك بولدى. سول ساعات توي قىلىپ، قىزىن بۇل جىگىتكە بەرگەن. سونان بۇل پاتشا وپات بولعان سوڭ، بۇل جىگىت پاتشا ورنىنا پاتشا بولىپ، قىز ەكەۋى جاقسى ءومىر سۇرگەن.

---