InfoHub Logo

تولعاق — جاتىر بۇلشىق ەتتەرىنىڭ جوعارىدان، ياعني جاتىر تۇبىنەن باستالىپ، تومەن قاراي ءبىرقالىپتى جيىرىلۋىنىڭ ناتيجەسىندە بولاتىن قۇبىلىس. ال كەيبىر جاعدايلاردا بەلگىلى ءبىر سەبەپتەردىڭ سالدارىنان تولعاق السىرەپ نەمەسە تولعاق بولعانىمەن دە ونىڭ ناتيجەسىز كەزدەرى بولادى، بۇل قۇبىلىستى تولعاقتىڭ بۇزىلۋى دەيمىز.

باستى سەبەپتەرى

— جۇيكەنىڭ شارشاۋى؛

— جۇقپالى اۋرۋلار؛

— جاتىر كەمىستىكتەرى؛

— جاتىردىڭ قابىنۋى؛

— جاتىر ىسىكتەرى؛

— كلينيكالىق تار جامباس؛

— سۋدىڭ كوپ نەمەسە از بولۋى نەمەسە ەرتە كەتىپ قالۋى؛

— نەگىزسىز، دۇرىس ەمدەمەۋ سالدارى.

تولعاقتىڭ بۇزىلۋى تۇرىنە قاراي ۇشكە بولىنەدى:

1.  تولعاقتىڭ ءالسىز بولۋى؛

2.  تولعاقتىڭ تىم قاتتى بولۋى؛

3.  ديسكورديناسيالىق تولعاق.

ءالسىز تولعاقتى باستالعان ۋاقىتىنا قاراي ءبىرىنشى، ەكىنشى دەپ بولەدى. ەگەر تولعاق و باستان ءالسىز، سيرەك بولىپ جاتسا، ونى تولعاقتىڭ ءبىرىنشى السىزدىگى دەيمىز. ال تولعاق ويداعىداي بولا كەلە، بەلگىلى ءبىر كەزدە السىزدەنسە، ونى ەكىنشى السىزدىك دەپ اتايمىز.

ءالسىز تولعاقتى كۇشەيتەتىن تاسىلدەردىڭ ءبىرى وكسيتوكسين جانە پروستاگلينديندەردى قولدانۋ بولىپ تۇر. بۇل دارىلەردى تامىرعا تامشىلاتىپ، 3-4 ساعات بويى قۇيادى.

تولعاق تىم قاتتى بولعان جاعدايدا تولعاقتى بەلگىلى ءبىر ۋاقىتقا توقتاتىپ نەمەسە باسەڭدەتەتىندەي جاعداي جاساۋ كەرەك.

تولعاق تىم قاتتى بولعاندا جاتىر موينى مەن بوسانۋ جولدارى تەز اشىلىپ، جاراقاتتانۋ كوپ كەزدەسەدى جانە تۋىلۋعا بەيىمدەلىپ ۇلگەرمەگەن نارەستە دە زاقىمدانۋى مۇمكىن.

ديسكورديناسيالىق تولعاقتىڭ سەبەبى جاتىر بۇلشىق ەتتەرىنىڭ رەتسىز جيىرىلۋى. سونىڭ سالدارىنان جاتىر موينى دۇرىس اشىلمايدى، ناتيجەسىندە تولعاق ۇزاققا سوزىلىپ كەتۋى مۇمكىن. سوندىقتان مۇمكىندىگىنشە تولعاقتى رەتتەۋگە ارەكەت جاساۋ كەرەك.

تولعاقتى كۇشەيتەتىن دارى-دارمەك قولدانۋعا بولمايدى! بۇلشىق ەتتى بوساڭسىتاتىن جانە سەداتيۆتىك دارى-دارمەكتى قولدانۋ كەرەك. جوعارىدا كەلتىرىلگەن تولعاقتىڭ بۇزىلۋىنىڭ بارلىق ءتۇرىن ەمدەگەندە باسقا دا اكۋشەرلىك جاعدايلاردى، مىسالى،

— بالانىڭ جاعدايى؛

— سۋ كەتكەن ۋاقىتى؛

— ايەلدىڭ جاعدايى؛

— بالانىڭ قالپى، سالماعى، جايعاسۋى جانە ت.ب.

ەسكەرە وتىرىپ، دۇرىس شەشىم قابىلداعان ءجون. قاجەت بولسا، ارىپتەستەرمەن اقىلداسۋ كەرەك.

---